ރިޔާސީ އިންތިޚާބުގައި ވާދަކުރި މައި ކެނޑިޑޭޓެއް ޤަތުލުވެގެން ދިޔުމާއެކު ކެމްޕެއިނުގެ މަސްރަޙަށް އައި މާޔޫސްކަމަށްފަހު އިކުއެޑޯރގެ ރިޔާސީ އިންތިޚާބުގެ ވޯޓުލުން މިއަދު ބާއްވައިފިއެވެ. މަސްތުވާތަކެތީގެ ވަގު ވިޔަފާރީގެ އަވައިގައި ޖެހި ގައުމު ހަލަބޮލިވެ ދާޚިލީ ހާލަތު ގޯސްވެފައިވާ އިކުއެޑޯރއަކީ މީގެކުރިން ސުލްޙަވެރި އަމާން ތަނެއްގެ ގޮތުގައި ފާހަގަކުރެވުނު ގައުމެކެވެ.
ރިޔާސީ ރޭހުގައި ބައިވެރިވި އަށް ކެނޑިޑޭޓުން ބުލެޓްޕްރޫފް ވެސްޓުގައި ކެމްޕެއިނުކޮށް ނިންމާލި މި އިންތިޚާބުގެ ސުލްޙަވެރިކަން ދެމެހެއްޓުމަށްޓަކައި ނެރެފައިވަނީ ސިފައިންނެވެ. އަދި ދެކުނު އެފްރިކާގެ މި ކުޑަ ކުޑަ ގައުމުގެ އެކި ސަރަހައްދުތަކުގައި ސިފައިން ވަނީ ހަރަކާތްތެރިވެފައެވެ.
ފަހުގެ އަހަރުތަކުގެ ތެރޭގައި އިކުއެޑޯރ ވެފައިވަނީ ކޮކެއިން ބޭރުކުރުމުގެ ވިޔަފާރިއާއި ޑްރަގް މާފިއާގެ ހާއްޔަކަށެވެ. އަދި އޭގެ ސަބަބުން ގޭންގު މާރާމާރީތައް އިތުރުވެ ގައުމު ނުރައްކަލުގެ ތެރެއަށް ވަނީ ވެއްޓިފައެވެ.
”އިކުއެޑޯރގެ ރައްޔިތުން މިއަދު ބޭނުންވަނީ ބިރެއް ޖެހިލުމެއް ނެތި ގޭންގުތަކުގެ ފަހަތުން ނުކުންނަން ކެރޭނެ ވެރިއެއް. ގައުމާއި، ގައުމުގެ މަގުތައް ސުންނާފަތިކޮށް، ކުށުގެ ވެއްޓަކަށް ހަދާފައިވާ ހެދުމާމެދު އާންމުން ތިބީ ކަންބޮޑުވެ ގޮތްހުސްވެފަ.“ ވޯޓުލާން ދިޔަ މީހަކު ބުނެފައިވެއެވެ.
