އިންފްލޭޝަން މަތިވުމުގެ ސަބަބުން އިޤްތިޞާދު ދަށްވެ ޑަޗް އިޤްތިޞާދު ރިސެޝަނަކަށް ވެއްޓިއްޖެއެވެ.
ސްޓެޓިސްޓިކްސް ނެދަލެންޑްސްގައި ބުދަ ދުވަހު ޝާއިއުކުރި އަންދާޒީ ރިޕޯޓަކުން ދެއްކި ގޮތުގައި، އަހަރުގެ ދެވަނަ ކުއާޓަރަށް ބަލާއިރު ޑަޗް އިޤްތިޞާދު ވަނީ ކޮންމެ ކުއާޓަރަކު 0.3 އިންސައްތައިގެ ވެއްޓުމެއް ވެއްޓިފައެވެ. އަދި އެގައުމުން މިހާރު ރިސެޝަނަކަށް ވެއްޓިފައިވާކަމަށް ރިޕޯޓުކޮށްފައިވެއެވެ.
ޔޫރޯ ފައިސާ ބޭނުންކުރާ ސަރަހައްދުގެ ފަސްވަނައަށް އެންމެ ބޮޑު އިޤްތިޞާދެއް އޮންނަ ނެދަރލެންޑްސްގެ އިޤްތިޞާދު ވިދިވިދިގެން ދެ ކުއާޓަރުގައި ދަށަށް ގޮސްފައިމިވަނީ، އަހަރުގެ ފުރަތަމަ ތިން މަސްދުވަހުގެ ތެރޭގައި 0.4 އިންސައްތައިގެ ވެއްޓުމަކަށް ފަހުގައެވެ.
ރިސެޝަނަކަށް ގައުމު ދިޔަ ނަމަވެސް، ކޯވިޑްގެ އާލަމީ ވަބާއާ ގުޅިގެން ކުރިމަތިވި އިޤްތިޞާދީ ހީނަރުކަމުން އަރައިގަނެ، 2021 އަދި 2022 ވަނަ އަހަރު ނެދަރލެންޑްސްގެ އިޤްތިޞާދަށް ކޮންމެ އަހަރަކު 5 އިންސައްތައިގެ ކުރިއެރުމެއް ލިބިފައިވާކަން ވަނީ ފާހަގަކުރެވިފައެވެ.
