ދިރާސާތަކުން ދައްކާގޮތުގައި ޒުވާނުން, 50 އަހަރުން ދަށުގެ މީހުންގެ ތެރޭގައި، ”ހާޓް އެޓޭކް“ ނުވަތަ ހިތް ހުއްޓޭ ބަލީގެ ޝިކާރައަކަށްވާ މީހުންގެ އަދަދު އިތުރުވެއްޖެއެވެ. އަދި އެންމެ ނޭދެވޭ އަސަރުތައް ކުރަނީ އޭގެ ތެރޭގައި ހިމެނޭ އަންހެނުންނަށް ކަމަށްވެސް ދިރާސާތަކުން ދައްކައެވެ. އެހެންނަމަވެސް އެކަމުން ރައްކާތެރިވުމަށް ކުރެވޭނެ ކަންކަން މިހާރު އަހަރެމެންނަށް އެނގެއެވެ.

ފާއިތުވި އަހަރުތަކުގައި އެއްކުރެވުނު ދިރާސީ ހެކިން އެނގޭ ގޮތުގައި ހިތުގެ މައްސަލަތައް އެންމެ ގިނައިން ކުރިމަތިލާން ޖެހެނީ އާންމުންގެ ތެރެއިން ޒުވާން އުމުރުފުރާގެ މީހުންނަށެވެ. މިއީ ދިރިއުޅުމުގެ ވައްޓަފާޅިއަށް؛ ކެއިން ބުއިމާއި ކަސްރަތުކުރުމުގެ އާދަތަކަށް އަންނަމުންދިޔަ ނޭދެވޭ ބަދަލުތަކުގެ ސަބަބުން ދިމާވެފައިވާ ކަމެއްކަމަށް ސައިންސްވެރިން ގަބޫލުކުރެއެވެ. މި އަދަދުތައް އިތުރުވެފައި މިވަނީ ކޯވިޑް-19 ގެ އާލަމީ ވަބާއިން ރައްކާތެރިވުމަށް ޖެހި ވެކްސިންތަކުގެ ސަބަބުންކަމަށް ބުނާ ވާހަކައަކީ ވަރަށްވެސް ފަހުގެ ޚިޔާލެކެވެ. އަދި މިކަމަށް ބާރުދޭނެ އެއްވެސް އިލްމީ ހެއްކެއް މިވަގުތު ނެތްއިރު، ކޯވިޑް ވެކްސިންތައް އުފެއްދި ފަރާތްތަކުން އޭގެ ސަބަބުން ކުރިމަތިކޮށްފާނެ މައްސަލަތަކާއި ގެއްލުންތައް މާބޮޑަށް ދިރާސާކޮށްފައި ނުވާކަމަށް، މި މައްސަލަ މިހާރު ބަލަމުން ގެންދާ ޔޫރަޕިއަން ޔޫނިއަންގެ ކޮމިޓީއިން ވަނީ ބުނެފައެވެ.

އެންމެ ހާސްވާންޖެހޭ މައްސަލައަކީ، ހަރު އުމުރުފުރައިގެ މީހުންގެ ފަރާތުން ހިތުގެ ބަލިތައް ފެންނަ މިންވަރު މަދުވަމުންދާއިރު، އުމުރުން ޅަ ޒުވާނުންގެ ތެރޭގައި މިއަދަދު ދުވަހެއް ދުވަހަކަށް މައްޗަށް އަރަމުންދާ މައްސަލައެވެ. ޒުވާނުން ނިސްބަތްކުރަނީ އުމުރުން 20 އަހަރާއި 50 އަހަރާއި ދެމެދުގެ މީހުންނަށެވެ. އަދި މިއީ މުޅި ދުނިޔޭގެ ހުރިހާ ހިސާބެއްގައިވެސް ބޮޑުވެފައިވާ މައްސަލައެއްކަމަށްވާއިރު، ނެޝަނަލް ޖޯގްރަފިކާއި ވާހަކަދެއްކި ޑޮކްޓަރުން ދެކެލައްވާގޮތުގައި މިއީ އާންމު ސިއްޙީ ނުރައްކަލުގެ ހާލަތެކެވެ.