ގައުމެއްގެ އިޤްތިޞާދީ ސައާދަތާއި (prosperity) ފާގަތިކަން ހިމާޔަތްކުރުމަށްޓަކައި ކުށްކުރުމާއި ކޮރަޕްޝަނުގެ އަމަލުތަކާމެދު ހަރުކަށިވުމުގެ މުހިންމުކަން ފާހަގަކުރައްވައި، ކުރިއަށް މި އޮތް ރިޔާސީ އިންތިޚާބުގައި ގައުމީ މަސްލަހަތު އިސްކުރުމަށް ބައިނަލްއަޤްވާމީ ގުޅުންތަކާއި، އިޤްތިޞާދާބެހޭ މާހިރެއްކަމަށްވާ މުޢާދް މުޙައްމަދު ޒަކީ ލަފާދެއްވައިފިއެވެ.

ޤާނޫނު ތަންފީޒުކުރުމުގައި ސިންގަޕޫރުން ޚިޔާރުކުރި އައު އުކުޅުގެ ކާމިޔާބީން ފިލާވަޅު ނެގުމަށް މުޢާދް ވަނީ ދިވެހީންނަށް ހިތްވަރުދީފައެވެ.

މުޢާދް ވިދާޅުވީ، ކުށުގެ ވެއްޓާ ދެކޮޅަށް ސާބިތުވެ ތިބޭ މުޖުތަމަޢުތަކުގައި ދިރިއުޅޭ އާއިލާތަކަކީ ރައްކާތެރިކަމުގެ އިޙުސާސްކުރެވޭ އާއިލާތައް ކަމުގައިވާއިރު، އެފަދަ މުޖުތަމަޢުތަކުގައި ވިޔަފާރިތަށްވެސް ކުރިއަރައިގެން ދާނެކަމަށެވެ. ގައުމެއް ބަދަލުކޮށްލުމަށް ކޮރަޕްޝަނާ ދެކޮޅަށް ނިންމޭ ސާބިތު ނިންމުންތަކާއި، ޤާނޫނު ތަންފީޒުކުރުމުގައި ކަސިޔާރުވުމެއްނެތް ސިޔާސަތުތަކުގެ މުހިންމުކަން ސިންގަޕޫރުގެ މިސާލުން ހާމަވާކަމަށް އޭނާ ވިދާޅުވިއެވެ.

އެއް އިރެއްގައި ކޮރަޕްޝަނާއި، އެކި ޒާތްޒާތުގެ ކުށްތަކުން ކުށުގެ ވެށި ފުރާލާފައިވާ ސިންގަޕޫރުން މިއަދު ފެންނަނީ ހަލުވި ދުވެއްޔެއްގައި ކުރިއަރަމުން އަންނަ އިޤްތިޞާދަކެވެ. އަދި މިއަދު އެގައުމަކީ ދެކުނު އިރުމަތީ އޭޝިއާގެ ސައާދަތާއި ފާގަތިކަން ރަމްޒުކޮށްދޭ ނިޝާނެކެވެ.

މުޢާދްގެ ޚިޔާލުފުޅަކީ ދިވެހިރާއްޖޭގެ މަސްރަޙަށް ރިއާޔަތްކުރާއިރު ދިވެހީންނާއި ވަރަށް ގުޅޭ ވާހަކައެކެވެ. ގުޅި ލާމެހިފައި އޮންނަ މުޖުތަމަޢުއެއް އޮންނަ، ސަގާފީ ގޮތުން މުއްސަނދި އާދަކާދައެއްގެ ވެރި މި ދިވެހިރާއްޖޭގެ މާހައުލުގައި، އަޅައިނުލެވި ދޫކޮށްލެވިފައިވާ ކުށުގެ ވެއްޓެއް އޮތުމަކީ މުސްތަޤުބަލަށް އޭގެ ނޭދެވޭ އަސަރުކުރާނެ ކަމެކެވެ. ބޭރުގެ އިންވެސްޓަރުން ހޯދައި، ދިވެހިރާއްޖޭގެ ހަގީގީ އިޤްތިޞާދީ ކުޅެދުންތެރިކަން ދެނެގަނެވެން އަންނަނީ ކުށްކުރާ މީހުންނާއި ކުރާ ކުށްތަކާއި ދެކޮޅަށް ހަރުކަށިވެ އެކަމުގެ ޒިންމާ ނަގައިގެންނެވެ.

ރިޔާސީ އިންތިޚާބަކަށް ޤައުމު ތައްޔާރުވަމުން އަންނަ މި ދަނޑިވަޅުގައި، ދިވެހިރާއްޖޭގެ ކަންކަން ކުރިއަށްދާނެ ގޮތް ނިމިގެންދާނީ އިންތިޚާބުގައި ދިވެހިން ވޯޓުދޭ ގޮތެއްގެ މައްޗަށް ކަމަށް މުޢާދް ވިދާޅުވިއެވެ. އެހެންކަމުން، ފާއިތުވެދިޔަ ތަނުގައި ކުށާއި ދެކޮޅަށް ހަރުކަށި ބަސްބުނެ ސާބިތުކަމާއެކު ބަސްބުނެފައިވާ ކެންޑިޑޭޓުންނަށް އިސްކަންދިނުމަށް މުޢާދް ބާރުއެޅުއްވިއެވެ.

މުޢާދް ވިދާޅުވަނީ ފާޅުގައި ކުށާއި ކޮރަޕްޝަނާއި ދެކޮޅަށް ބަސްބުނެ ފިޔަވަޅުއަޅާ ގައުމުތަކުން އިންވެސްޓަރުންގެ ސަމާލުކަން ދަމައިގަތުމުގެ އިތުރުން، އެ ފަރާތްތަކުގެ ވިޔަފާރި ނިންމުމުގައި ޔަގީންކަމާއި، ރައްކާތެރިކަމާއި، ސަލާމަތްކަން ކަށަވަރުކޮށްދޭ ކަމަށެވެ.

ދިވެހިރާއްޖެއަކީ އެއާ އެއްފަދަ ރީތިކަމަކާއި ފަތުރުވެރިކަމުގެ ދާއިރާގެ ކުރިއެރުމެއް ހޯދިފައިވާ އެހެން ގައުމެއް ނެތް ގައުމަކަށް ވީއިރު، ޤާނޫނުގެ އަތް ދިގުކޮށް، އެ ޤާނޫނު ތަންފީޒުކުރުމުގައި ސާބިތުކަން ދެއްކިއްޖެނަމަ ފަތުރުވެރިކަމުން ލިބޭ މަންފާވެސް އެތައް ގުނައެއް އިތުރުކުރުމުގެ ފުރުސަތު އޮތް ގައުމެއްކަމަށް އޭނާ ވިދާޅުވިއެވެ.

މުއާދްގެ ޚިޔާލުފުޅުން އެނގޭކަމަކީ ދިވެހީންގެ މުޖުތަމަޢުގައި ކުށާއި ކޮރަޕްޝަނާއި ދެކޮޅަށް ކުރެވޭ މަސައްކަތް ހަރުދަނާކޮށް ހަރުކަށިކުރުމުގެ މުހިންމުކަމެވެ. ސިންގަޕޫރުގެ މިސާލުން މިސާލު ނަގައި، މުޢާދުގެ އިރުޝާދުން އެނގޭކަމަކީ ގައުމުގެ ފާގަތިކަމާއި، އާއިލީ ރައްކާތެރިކަން އަދި ދުޅަހެޔޮ އިޤްތިޞާދެއްގެ ފަސްމަންޒަރު ބިނާވެފައި އޮތީ ކުށުގެ ވެއްޓާއި ދެކޮޅަށް މުޅި މުޖުތަމަޢުން އެކީ އެކައްޗަކަށް ނުކުމެ ކުރާ މަސައްކަތުގެ މައްޗަށް ކަމެވެ. ކަންކަމުގެ މައުލޫމާތު ދެނެހުރެ އެނގިގެން އަންނަން އޮތް އިންތިހާބުގައި ދިވެހިން ނިންމުމެއް ނިންމުމަށާއި، ކުށާއި ދެކޮޅަށް މަސައްކަތްކުރާނެކަމުގެ ސާބިތު ހެކި ދައްކާފައިވާ ކެންޑިޑޭޓަކު އިޚްތިޔާރުކުރުމުން މެނުވީ ފާގަތި އުޖާލާ މުސްތަގުބަލެއްގެ މިސްރާބަކާއި ދިމާއަށް ގައުމު ގެންދެވެން ނެތްކަމަށް މުޢާދް ވަނީ ވިދާޅުވެފައެވެ.