ރާއްޖޭގެ ރައްޔިތުން ސަރުކާރެއް އުފައްދަނީ ހަމައެކަނި ގެވަޅެއް ހޯދާކަށް ނޫނެވެ. އަދި ފުލެޓެއް ހޯދާކަށެއް ވެސް ނޫނެވެ.

ރައްޔިތުން ސަރުކާރެއް އުފައްދަނީ ފުދުންތެރި, ރައްޔިތު މީހާ އަމާންކަމާއެކު ބިރަކާނުލައި ދިރިއުޅުމުގެ މަތިވެރި މަގުސަދުގައި މެއެވެ.

އެހެނަސް ރާއްޖޭގައި ރައްޔިތު މީހާއަށް އެއްވެސް ރައްކާތެރި ކަމެއް ނެތެވެ. އަދި ރާއްޖެއަށް ޒިޔާރަތްކުރާ ފަތުރުވެރިންނަށް ވެސް އަމާންކަމެއް ނެތޭ ބުނެވިދާނެއެވެ.

ރީތި އަންހެން ކުއްޖަކަށް ނުވަތަ ދެ ޖިންސުގެ ފުރާވަރު ކުދީންނަކަށް ރާއްކާތެރިކަމާއި އަމާންކަމާއެކު މަގުމަތީގައި ހިނގާބިގާވެ އުޅުމުގެ މިނިވަންކަމެއް ނެތެވެ.

ރާއްޖެއަކީ ފަތުރުވެރިކަމުގެ މަންޒިލެކެވެ. ދޮންވެލީގެ ރީތި ގޮނޑުދޮށްތަކާއި ސުވިމިންޕޫލް ފަދަ ރީތި ފަޅުތަކުން ފަތުރުވެރިންގެ ސަމާލުކަން ގޮސް ހުއްޓިފައިވާ މަންޒިލެކެވެ. 

ކަން މިހެން ހުރިނަމަވެސް ގައުމަށް ހެޔޮނޭދޭ ބަޔަކު އުފެދި ރާއްޖެއަށް އަންނަ ފަތުރުވެރީންނާ ދިމާކޮށް ބިރުދެއްކުމުގެ ސަގާފަތެއް ވެސް އަންނަނީ އުދެމުންނެވެ.

ރާއްޖޭގެ ރަށްތަކުގައި މިހާރު އަންނަނީ ގެއެއްގައި 2 ކޮޓަރި ހުރިއްޔާ އެއްކޮޓަރި ފަތުރުވެރިޔަކަށް ކުއްޔަށް ދެމުންނެވެ. މިއީ މިފަދަ ވަސީލަތްތައް ނުއުފެދޭ ގައުމަކަށް ލިބޭނޭ އެންމެބޮޑު އެއްނިއުމަތެވެ. އެހެނަސް ދިވެހި އުންމަތަށް މިންވަރު ކޮށްދެއްވި މި ނިޢުމަތަށް ވެސް އެވަނީ ދީނީ ހަރުކަށި ބަޔަކު އަރައިގެންފައެވެ.

މި ރާއްޖޭގެ ރައްޔިތުން މި ރާއްޖެއިން ދެކެން ދުވަހަކު ވެސް ބޭނުންނުވާ އަދި މާޒީވެ ދިގު ޒަމާނުގައި ވެސް ދެކެފައިނުވާ ލަދުވެތި ހުތުރުކަން ބޮޑު ޢަމަލުތަށް ހުއްޓުވޭވަރުގެ ސަރުކާރެއް އުފައްދަން ދިވެހިންނަށް މަޖުބޫރު ވެއްޖެއެވެ.

މަގުތަކުގައި ބޮމެއް ގޮއްވާނީ ކޮންއިރަކު ކޮން ވަގުތަކު ކަމެއް ނުއެނގެއެވެ. މަގުމަތިން މީހަކު ގެއްލޭނެ ވަގުތެއް ނޭނގެއެވެ. ޒުވާނެއްގެ ގަޔަށް ވަޅިޖަހާނީ ކޮން ވަގުތަކު ކަމެއް ނޭނގެއެވެ. މި ގޮތްގޮތުން ރައްޔިތުންގެ ހިތްތަކުގައި އުފެދެމުން އަންނަ ބިރު އަންނަނީ ބޮޑުވަމުންނެވެ.

އެންމެ ފަހި މާލޭގެ އެންމެ ކާރުބާރު ބޮޑު މަގު އާދެ! މަޖީދީ މަގުގައި ގޮއްވައިލި ބޮމުގެ އިންޓެލިޖެންސް މަޢުލޫމާތު ރައީސަށް ލިބި ވަޑައިގެންފައިވިޔަސް އެމަނިކުފާނުވެސް ވަނީ އެކަން ވަންހަނާ ކުރައްވާފައިކަމަށް ކަމާބެހޭ ފަރާތްތަކުން އެބަ ތުހުމަތު ކުރެއެވެ. އެހެންކަމުން ވެރިކަން ހިންގަނީ ގޭންގަކުން ކަމަށް ތުހުމަތު ކުރެވެއެވެ.

ކިޑްނެޕް ކުރަނީ ކިހިނެއްކަމެއް އޭރަކު ރައްޔިތުންނަކަށް ނުވެސް އެނގެއެވެ. އަދި ޓޯޗަރ ކުރުމާއި ބޮލީކުރާ ވާހަކަ ތަކަކީ ވެސް ރައްޔިތުންނަށް މުޅިން އާވާހަކަތަކެކެވެ.

ވެރިކަމުގައި ހުންނަ މީހާ ގޭންގެއްގެ ދަށުވެފައި ވާކަމަށް ތުހުމަތު ކުރެވޭތީ މި ވެރިކަން ވައްޓަފާޅިއަށް ނަޒަރު ހިންގާލުމުން، ގިނަ ރައްޔިތުން ބޭނުން ވަނީ އެހެން ގޮތެކެވެ.