އިންޓަނެޓު މެދުވެރިކޮށް އާންމުކޮށް ބޭނުންކުރާ ސޮފްޓްވެއަރތަކުންގެ ބަލިފައި ހޯދާ، އޭގެ ބޭނުން ހިފުމުގައި ހަރަކާތްތެރިވެ އުޅޭ ރަޝިއާގެ ސައިބަރ ގުރޫޕްތަކުން ކުރިއަށް ގެންދިޔަ ސައިބަރ ހަމަލާތަކެއްގެ އަސަރު އެމެރިކާ ސަރުކާރުގެ އެތައް ވުޒާރާއަކަށް ކޮށްފައިވާކަމަށް އެމެރިކާގެ އެންމެ އިސް އެއް ސައިބަރސެކިއުރިޓީ އޭޖެންސީއިން ބުނެފިއެވެ.
”އެމެރިކާގެ ދައުލަތުގެ އެތައް ވުޒާރާއެއްގެ މަސްނޫއީ ނިޒާމުތަކަށް ދިން ހަމަލާގައި އެތަންތަނުގެ ”މޫވްއިޓް“ އެޕްލިކޭޝަންތަކަށް އަސަރުކޮށްފައިވާތީ ޔޫއެސް ސައިބަރ ސެކިއުރިޓީ އެންޑް އިންފްރާސްޓްރަކްޗަރ ސެކިއުރިޓީ އޭޖެންސީއިން މިގެންދަނީ ހަރަކާތްތެރިވަމުން.“ އެ ވުޒާރާގެ ސައިބަރ ސެކިއުރިޓީއާ ބެހޭ އެގްޒެކެޓިވް އެސިސްޓެންޓް ޑިރެކްޓަރުގެ މަގާމު ފުރުއްވާ އެރިކް ގޯލްޑްސްޓައިން ބުރާސްފަތި ދުވަހު ނެރުއްވި ބަޔާނެއްގައި ލިޔުއްވާފައިވެއެވެ.
ސީއައިއެސްއޭގެ އިސް އޮފިޝަލަކާ ހަވާލާދީ ނޫސްތަކުން ރިޕޯޓުކޮށްފައިވާ ގޮތުގައި އެމެރިކާ ސަރުކާރުގެ ވުޒާރާތަކުގެ އިތުރުން، އެތައް ސަތޭކަ ކުންފުނިތަކަކާއި ޖަމިއްޔާ ޖަމާއަތްތަކަށް މި ހަމަލާގެ އަސަރު ފޯރާފައިވެއެވެ. އަދި މި ނޫސްތަކުންވަނީ މާހިރުންގެ ފަރާތުން ލިބުނު އަންދާޒީ ބަޔާންތައް ވެސް ހިއްސާކޮށްފައެވެ.
