އެމެރިކާއިން ދަތުރުކުރާ އަދި އެމެރިކާއަށް އަންނަ ކޮމާޝަލް ފްލައިޓުތަކުގައި ދަތުރުކުރުން މަނާކޮށްފައިވާ މީހުންގެ ލިސްޓެއް ލީކުވެއްޖެއެވެ. މި ”ނޯ-ފްލައި“ ލިސްޓު ލީކުވެފައި މިވަނީ އެއަރލައިނެއްގެ ހިމާޔަތްކުރެވިފައިނުވާ ސާވަރއަކުންނެވެ.

ސައިބަރ ހަމަލާތަކުން ރަނގަޅަށް ރައްކާތެރިކުރެވިފައިނުވާ ޖެންކިންސްގެ ސާވަރއަކުން މި ލިސްޓު ހޯދާފައިވަނީ މައިއާ އާސަން ކްރައިމިއު ނަމަކަށް ކިޔާ ސްވިޒަލެންޑުގެ ހެކަރއެކެވެ.

އެމެރިކާއިން ”ނޯ-ފްލައި“ ލިސްޓެއް ގެންގުޅޭތާ އެތައް އަހަރެއް ވެފައިވާއިރު، 9/11 އިގެ ބިރުވެރި ހަމަލާގެ ކުރިން މި ލިސްޓުގައި އޮތީ އެންމެ 16 ނަމެވެ. އެހެންނަމަވެސް، މި ހަމަލާއަށްފަހު، ޑިޕާޓްމަންޓް އޮފް ހޯމްލޭންޑް ސެކިއުރިޓީ އުފެދިގެން ދިޔުމުން މި ލިސްޓުވަނީ އެތައް ގުނައެއް ބޮޑުވެފައެވެ.

މި ލިސްޓުގައި އޮތް މީހުންގެ ސީދާ އަދަދު އެނގެން ނެތްނަމަ ވެސް، ފަހުގެ ހިސާބުތަކާއި ހަވާލާދީ ލަފާކުރެވޭ ގޮތުގައި މި އަދަދު އުޅެނީ 47،000 އާއި 81،000 އާއި ދެމެދުގައެވެ.