ޗައިނާއާއި ރަޝިއާއިން ގުޅިގެން އަސްކަރީ ގުޅުން ބަދަހިކުރުމަށް އަހަރީ ގޮތުން ހިންގާ ވައިގެ ޕެޓްރޯލްތަކެއްގެ ތެރެއިން ސައުތު ކޮރެއާއާއި ޖަޕާނުގެ ވައިގެ ސަރަހައްދަށް އެތެރެވެފައިވާ ފައިޓަރ ޖެޓްތަކެއްގެ މައްސަލައިގައި ދެގައުމުން ކަންބޮޑުވުން ފާޅުކޮށްފިއެވެ.
ޗައިނާއާއި ރަޝިއާ ގުޅިގެން ހިންގާ ވައިގެ ޕެޓްރޯލްތަކުގެ ދެވަނަ ފިޔަވަހި ބުދަ ދުވަހު ފުރިހަމަކޮށްފައިވާއިރު މި ދަތުރުތައް ކޮށްފައިވަނީ ހުޅަނގު ޕެސިފިކް ކަނޑުގެ މަތިންނެވެ. އަދި އޭގެ ކުރީ ދުވަހުގެ ހަރަކާތްތަކުގައި ޖަޕާނުގެ ކަނޑުގެ ސަރަހައްދާއި އިރުމަތީ ޗައިނާގެ ކަނޑުގެ ސަރަހައްދު މަތިން ވައިގެ އުޅަނދުތައް ވަނީ ދުއްވާފައެވެ.
2019 އަހަރުން ފެށިގެން ޗައިނާއާއި ރަޝިއާގެ އަސްކަރިއްޔާއިން ގުޅިގެން ބާއްވަމުން އަންނަ މި ހަރަކާތްތައް ހަވަނަ ފަހަރަށް ބާއްވާފައި މިވަނީ އޭޝިއާ ޕެސިފިކް ސަރަހައްދުގައި ހަމަނުޖެހުން އިތުރުވެފައިވާ ދަނޑިވަޅެއްގައެވެ. ޗައިނާއާއި އެމެރިކާއާއި ދެގައުމުން މި ސަރަހައްދުގައި ހިންގަމުން އަންނަ އަސްކަރީ ހަރަކާތްތައް އިތުރުވެފައިވާ ދަނޑިވަޅެއްގައެވެ.
