ނ.މަނަދޫ ގެއެއްގެ ތެރޭގައި މަރާލައިފައި އޮއްވައި ފެނުނު އެ ރަށު ނަޢީމާ މޫސާގެ މަރުގެ މައްސަލައިގައި ދެ މީހަކު ހައްޔަރުކޮށްފިއެވެ.

ކޮމިޝަނަރ އޮފް ޕޮލިސް މުޙައްމަދު ޙަމީދު މިރޭ ކުރެއްވި ޓުވީޓެއްގައި ވިދާޅުވީ ނަޢީމާ މަރައިލި މައްސަލައިގެ ތަހުގީގަށް  ބޮޑެތި ކުރިއެރުންތަކެއް ލިބެމުންދާ ކަމަށާއި މި މައްސަލާގައި ތުހުމަތުކުރެވޭ ދެ މީހަކު ފުލުހުންގެ ބެލުމުގެ ދަށުގައި މިހާރު އެބަތިބި ކަމަށެވެ.

 މައްސަލައިގެ ތަހުގީގަށް މުހިންމު ހެކިތަކެއް ހުރިކަމަށް ބެލެވޭ ތަނެއް ފުލުހުން ބަލައި ފާސްކުރަމުންދާ ކަމަށް ވެސް ޙަމީދު ވިދާޅުވިއެވެ.

“މަރުގެ މައްސަލަ ތަހުގީގު ކުރުމުގެ ތަޖުރިބާކާރު، އިންސްޕެކްޓަރ މުހައްމަދު ސާމިހް އިސްކޮށް ހުރެ މާލެއިން ދިޔަ ޓީމާއި ނ.އަތޮޅުގެ ފުލުހުން، މި މަރުގެ ހަގީގަތް ހޯދައި އިންސާފު ގާއިމުކުރުމަށް ކުރަމުންދާ ބުރަ މަސައްކަތް ފަހުރުވެރިކަމާއެކު ފާހަގަކުރަން.“ ޙަމީދު ވިދާޅުވިއެވެ.

މަނަދޫ އަންނާރުމާގޭ އުމުރުން 62 އަހަރުގެ ނަޢީމާ މަރާލައިފައި އޮއްވާ ފެނުނީ މިދިޔަ އޭޕްރީލް މަހުގެ 07 ވަނަ ދުވަހުގެރޭގައެވެ. 

އަނިޔާވެރިކޮށް ނަޢީމާ މަރާލައިފައި އޮތީ އޭނާ ދިރިއުޅޭ ކޮޓަރިތެރޭ ތަޅުންގަނޑުމަތީގައެވެ.

ނަޢީމާގެ މަރުގެ މައްސަލައިގައި އޭނާ ދިރިއުޅުނު ގޭގެ އިތުރުން އެ ރަށުގެ ހަތަރު ގެއެއް ބަލައި ފާސްކޮށްފައިވެއެވެ. އޭގެތެރޭގައި ބިދޭސީން ދިރިއުޅޭ ގެއަކާއި ފަޅު ގެއެއް ވެސް ހިމެނެއެވެ. މި ތަހުގީގުގައި މަނަދޫގެ ގިނަ ބައެއްގެ ފިންގަރޕްރިންޓާއި ޑީއެންއޭ ސާމްޕަލް ވަނީ ނަގައިފައެވެ.