އަންނަ ރިޔާސީ އިންތިޚާބުގައި ވޯޓުލުމަށްޓަކައި 8 ގައުމެއްގައި ވޯޓުލާ މަރުކަޒު ގާއިމު ކުރުމަށް އިލެކްޝަން ކޮމިޝަނުން އިއްޔެ ނިންމައިފިއެވެ.
އިލެކްޝަން ކޮމިޝަނުގެ ނައިބު ރައީސް އިސްމާޢީލް ޙަބީބު މިއަދު ކުރެއްވި ޓުވީޓެއްގައި ވިދާޅުވީ އަންނަ ރިޔާސީ އިންތިހާބުގައި ރާއްޖޭން ބޭރުގައި ދިރިއުޅޭ ވީހާ ގިނަ ރައްޔިތުންނަށް ވޯޓުލުމުގެ ފުރުސަތު ފަހިކޮށްދިނުމުގެ ގޮތުން
8 ގައުމެއްގެ 9 ސިޓީއެއްގައި ވޯޓުލާ މަރުކަޒު ގާއިމު ކުރުމަށް ކޮމިޝަނުން ނިންމާފައިވާ ކަމަށެވެ.
ޙަބީބު ވިދާޅުވި ގޮތުގައި ވޯޓުލާ މަރުކަޒު ގާއިމު ކުރުމަށް ނިންމާފައިވަނީ އިންޑިޔާގެ ޓްރިވެންޑްރަމާއި ނިއުދިއްލީއާއި ސްރީލަންކާގެ ކޮލަމްބޯއާއި މެލޭޝިޔާގެ ކުއަލަލަމްޕޫރާއި ސިންގަޕޫރާއި އިނގިރޭސި ވިލާތުގެ ލަންޑަނާއި ތައިލެންޑުގެ ބެންގކޮކާއި އެކުވެރި އަރަބި އިމާރާތުގެ އަބޫދާބީ އަދި ޖަޕާނުގެ ޓޯކިޔޯގައެވެ.
މިއިން ކޮންމެ ތަނެއްގައި ވޯޓުލުމަށް 150 މީހުން ރަޖިސްޓަރީ ކޮށްފިނަމަ ވޯޓުލާ މަރުކަޒު ގާއިމު ކުރާނެ ކަމަށް ޙަބީބު ވިދާޅުވިއެވެ.
އީސީން އާންމުކޮށްފައިވާ ވަގުތީ ލިސްޓުގައިވާ ގޮތުން ރިޔާސީ އިންތިޚާބުގައި 282,755 މީހުންނަށް ވޯޓު ދިނުމުގެ ހައްގު ލިބެއެވެ. އެއީ 144,408 ފިރިހެނުންނާއި 138,347 އަންހެނުންނެވެ.
މީގެ ދެތިން ދުވަސްކުރިން ޙަބީބު ވިދާޅުވި ގޮތުގައި ވޯޓާސް ލިސްޓާ ގުޅޭ ގޮތުން 27 ޝަކުވާއެއް އީސީއަށް ވަނީ ހުށަހަޅައިފައެވެ.
އޭގެތެރެއިން 21 ޝަކުވާއަކީ މަރުވެފައިވާ މީހުން ވޯޓާަސް ލިސްޓުގައި ހިމެނޭތީ ހުށަހަޅާފައިވާ ޝަކުވާއެވެ. ދެން ހިމެނެނީ ނަން ނެތުމުގެ 3 ޝަކުވާއާއި އެޑްރެސް ބަދަލުވުމުގެ 2 ޝަކުވާއާއި 18 އަހަރު ނުފުރޭ ކުއްޖެއްގެ ނަން ހިމެނޭ ޝަކުވާއެކެވެ.
އީސީން ހާމަކޮށްފައިވާ ގޮތުން ރީ-ރަޖިސްޓްރޭޝަނަށް ހުޅުވައިލާނީ ޖުލައި 16 އިން އޮގަސްޓު 5 އަށެވެ.
ރިޔާސީ އިންތިޚާބު ބާއްވަން ނިންމާފައިވަނީ އަންނަ ސެޕްޓެމްބަރު 9 ގައެވެ. ދެވަނަ ބުރަކަށް ދާން ޖެހިއްޖެނަމަ ވޯޓުލުން އޮންނާނީ ސެޕްޓެމްބަރު 30 ގައެވެ.
އިންތިޚާބަށް ކުރިމަތިލުމުގެ ފުރުސަތު ހުޅުވާލައިފައިވަނީ ޖުލައި 23 އިން އޮގަސްޓު 3 އަށެވެ. ކެންޕޭނު ކުރުމުގެ ފުރުސަތު އޮންނާނީ އޮގަސްޓު 10 އިން ސެޕްޓެމްބަރު 8 އަށެވެ.
