އެމްޑީޕީގެ ރައީސް މުޙައްމަދު ނަޝީދުގެ ”ދަ ޑިމޮކްރެޓްސް“ ޕާޓީ އުފައްދަން އިލެކްޝަން ކޮމިޝަނުން މިއަދު ހުއްދަދީފިއެވެ.
ރައީސް ނަޝީދުގެ ”ފިކުރެއްގެ ދިރުން“ ފެކްޝަނުން ”ދަ ޑިމޮކްރެޓްސް“ ގެ ނަމުގައި ޕާޓީއެއް އުފެއްދުމުގެ ހުއްދައަށް އެދި އިލެކްޝަން ކޮމިޝަނަށް ހުށަހެޅީ މި މަހުގެ 21 ގައެވެ.
ޕާޓީ ރަޖިސްޓްރީ ކުރުމުގެ ހުއްދައަށް އެދުނީ ހެންވޭރު ހުޅަނގު ދާއިރާގެ މެމްބަރު ޙަސަން ލަޠީފްގެ ނަމުގައެވެ.
އިސީއިން މިއަދު ބޭއްވި ނޫސްވެރިންގެ ބައްދަލުވުމުގައި ވަނީ އެ ޕާޓީ އުފައްދަން ހުއްދަ ދިނުމަށް ކޮމިޝަނުގެ އިއްތިފާގުން ނިންމާފައިވާކަން ހާމަކޮށްފައެވެ. އަދި ޕާޓީ އުފެއްދުވުމުގައި އިސްކޮށް އުޅުއްވާ ބޭފުޅުންނާ ހުއްދަ ހަވާލުކުރުމަށް މިއަދު ރަސްމިއްޔާތެއް ވެސް ބާއްވާނެކަން ވަނީ ހާމަކޮށްފައެވެ.
ދަ ޑިމޮކްރެޓްސް އުފެއްދުމުގައި އިސްކޮށް ހަރަކާތްތެރިވެވެޑައިގަންނަވަނީ މިދިޔަ ހަފުތާގެ ބުދަ ދުވަހު އެމްޑީޕީން ވަކިވި ރައްޔިތުންގެ މަޖިލީހުގެ 12 މެންބަރުންނާއި އެމްޑީޕީގެ ނައިބު ރައީސް މުޙައްމަދު ޝިފާޒާއި އެސްޓީއޯގެ މެނޭޖިންގ ޑިރެކްޓަރު ޙުސައިން އަމްރުއެވެ. ނަޝީދުގެ އިރުޝާދުގެ ދަށުން އާ ޕާޓީގެ މަސައްކަތްތައް ކުރިއަށްދިޔަ ނަމަވެސް އެމަނިކުފާނު އަދިވެސް ހުންނެވީ އެމްޑީޕީގައެވެ.
