މީހަކު މަރާލަން އުޅުނުކަމަށް ތުހުމަތުކުރެވޭ މައްސަލައަކާ ގުޅިގެން ހޯދަމުން އައި މއ.ނައިޓްވިލާ އިބްރާހީމް ޢަބްދުﷲ އަމިއްލައަށް ފުލުހުންގެ އިދާރާއަށް ހާޒިރުވުމުން އޭނާ ހައްޔަރުކޮށްފިއެވެ.
ގްރޫޕް ހަދައިގެން ތޫނު ހަތިޔާރާއި ނުރައްކާތެރި ހަތިޔާރު ބޭނުންކޮށްގެން މާރާމާރީ ހިންގައި މީހަކު މަރާލަން އުޅުނުކަމަށް ތުހުމަތުކުރެވޭ މައްސަލައެއްގައި އިބްރާހީމް ޢަބްދުﷲ ހޯދަމުންދާކަން ފުލުހުން ހާމަކުރީ މި މަހުގެ 15 ވަނަ ދުވަހުއެވެ.
ފުލުހުންގެ އިދާރާއިން ވިދާޅުވީ މިއަދު އޭނާ އަމިއްލައަށް ފުލުހުންގެ އިދާރާއަށް ހާޒިރުވުމުން ހައްޔަރުކޮށްފައިވާ ކަމަށެވެ.
އަދި އޭނާގެ ބަންދާމެދު ގޮތެއް ނިންމަން ކްރިމިނަލް ކޯޓަށް ހާޒިރުކުރުމުން ބަންދަށް 30 ދުވަސް ދީފައިވާ ކަމަށެވެ.
މައުލޫމާތު ލިބޭގޮތުން އެމްޑީޕީގެ ގައުމީ މަޖިލީހުގެ މައްޗަންގޯޅި ދެކުނު ދާއިރާގެ ރައީސް އިބްރާހީމް ޢަބްދުﷲ ހައްޔަރުކުރީ ރައްޔިތުންގެ މަޖިލީހުގެ މަތިވެރި ދާއިރާގެ މެންބަރު ޙަސަން ޒަރީރަށް ހަމަލާދިން މައްސަލައިގައެވެ.
މި މަހުގެ އެއްވަނަ ދުވަހު ފަތިހުގެ ވަގުތެއްގައި ހަބީބީ ކެފޭ އެންޑް ބިސްޓްރޯތެރޭގައި އޭނާ އިންނަވަނިކޮށް ބަޔަކު ގޮސް އޭނާއަށް ހަމަލާދިނެވެ. އެ މައްސަލާގައި މީގެކުރިން ދެ މީހުން ވަނީ ހައްޔަރުކޮށްފައެވެ.
