އެމެރިކާގެ އޮފިޝަލުން ލަފާކުރާ ގޮތުގައި ރަޝިއާއިން ދަނީ ޔޫކްރޭނަށް އެރުމަށްޓަކައި ބަހަނާއެއް ދެއްކުމުގެ ގޮތުން ފޯލްސް ފްލެގް އޮޕަރޭޝަންތަކެއް ކުރުމަށް ތައްޔާރު ވަމުންނެވެ.
ރަޝިއާއިން ޔޫކްރޭނުގައި ހުންނަ ރަޝިއާގެ ބޭސްތަކަށް އަމިއްލައަށް ހަމަލާދީ ޔޫކްރޭނުގެ ބޮލުގައި ތުހުމަތު އެޅުވުމަށް ތައްޔާރުވަމުން ދާކަމަށް ޝައްކު ކުރެވޭކަމަށް ޔޫކްރޭނުގެ އަސްކަރިއްޔާއިން ވެސް ވަނީ ހާމަކޮށްފައެވެ. ރަޝިއާގެ އޭޖެންޓުން މިހާރުވެސް އަންނަނީ ނުތަނަވަސްކަން އުފެއްދީ ޔޫކްރޭންކަމަށް މީހުންނަށް ވިސްނައިދިނުމަށް މަސައްކަތްކުރަމުންކަމަށް އެމެރިކާގެ އޮފިޝަލަކު ރޮއިޓާސް ނޫސް އޭޖަންސީއާ ވާހަކަދައްކަމުން ބުނެފައިވެއެވެ.
ރަޝިއާއިން ވަނީ ބޮން ގެންގުޅުމަށް ހާއްސަކޮށް ތަމްރީންކޮށްފައިވާ ސިފައިން ޔޫކްރޭނަށް މިހާރުވެސް ފޮނުވާފައި ކަމަށްވެސް އޮފިޝަލު ބުނެފައިވެއެވެ. އެ ސިފައިންގެ މަގުސަދަކީ ޔޫކްރޭނުގައި ހުރި ރަޝިއާގެ ބޭސްތަކަށް ހަމަލާދީ އެ ހަމަލާތަކުގެ ތުހުމަތު ޔޫކްރޭނުގެ ބޮލުގައި އެޅުވުމެވެ.
ރަޝިއާއިން މިތުހުމަތުތަކަށް ވަނީ އިންކާރު ކޮށްފައެވެ. އަދި މި ތުހުމަތު ތަކުގައި އެއްވެސް ހަރުދަނާކަމެއް ނެތްކަމަށް ކްރެމްލިންގެ ތަރުޖަމާނު ޑްމިޓްރިވް ޕެސްކޮވް ހުކުރު ދުވަހު ވަނީ ބުނެފައެވެ.
