މޯލްޑިވްސް ޕޯރޓްސް ލިމިޓެޑްގެ ޗެއާމަން ކަމަށް ކެޕްޓަން މުޙައްމަދު ޝަރީފް (ސެންކޯ) އައްޔަންކުރައްވައިފިއެވެ.
އެމްޕީއެލްއަކީ ރާއްޖޭގެ ވިޔަފާރި ބަނދަރު ބަލަހައްޓާ ކުންފުންޏެވެ. މި ކުންފުނީގެ ޗެއަމަން ކަމަށް ސެންކޯ ހަމަޖައްސާފައި ވަނީ އެމަގާމުގައި ކުރިން ހުންނެވި މުޙައްމަދު ޒަކީ (ނަޒާކީ ޒަކީ) ފާއިތުވި އަހަރުގެ ނޮވެމްބަރު މަހު މަގާމުން އިސްތިއުފާ ދެއްވުމާ ގުޅިގެނެވެ. އޭނާ މަގާމުން އިސްތިއުފާ ދެއްވީ އެމްޕީއެލްގެ ތެރޭގައި ހިނގަމުންދާ ކޮރަޕްޝަންގެ އަމަލުތައް ހުއްޓުވުމަށް ތަނުގެ އިސްވެރިންނަށް ދެންނެވުމުން އެކަން ހުއްޓުވުމަށް އެމްޕީއެލްގެ ސީއީއޯ ޝާހިދު ޢަލީއާއި ބޯޑުގެ އެހެން މެންބަރުން އެއްބާރުލުން ނުދެއްވުމުގެ ސަބަބުންނެވެ.
ސެންކޯ ޝަރީފު ހުންނެވީ 2019 ވަނަ އަހަރުގެ ފެބްރުއަރީ 6 ން ފެށިގެން އެމްޕީއެލްގެ ބޯރޑް ޑިރެކްޓަރުގެ މަގާމުގައެވެ.
ސެންކޯ ޝަރީފަކީ 1986ވަނަ އަހަރުން 2005 ވަނަ އަހަރާއި ހަމައަށް ބޯޓު ދަތުކުރުމުގެ ދާއިރާގައި މަސައްކަތްކުރައްވާފައިވާ ބޭފުޅެކެވެ. ރައީސް ނަޝީދުގެ ވެރިކަމުގެ ދުވަސްވަރު ސެންކޯ ވަނީ އެމްއެންއެސްއެލްގެ ޗެއާރމަން ކަން ވެސް ކުރައްވާފައެވެ.
ސެންކޯ ޗެއަރމަން ކަމަށް ހަމަޖެހުމާ އެކު އޭނާގެ އިތުރަށް މިހާރު އެމްޕީއެލްގެ ބޯޑުގައި ހިމެނިވަޑައިގަންނަވަނީ ސީއީއޯ ޝާހިދު ޢަލީ އާއި ޑެޕިއުޓީ ސީއީއޯ އިބްރާހީމް ޢަބްދުﷲ އަދި ޖާދުﷲ ނަޒީމްގެ އިތުރުން އަޙުމަދު ލައިޝަމާއި އިބްރާހީމް ޢާރިފްއެވެ.
