އައްޑޫ އިކުއެޓޯރިއަލް ހޮސްޕިޓަލު ( އޭއީއެޗް)ގައި މާބަނޑު އަންހެނަކު ވިހެއުމުގެ ތެރޭގައި ކުޑަކުއްޖާގެ ކޮނޑު ތާށިވެގެން މިއަދު ފަތިހު މަރުވެއްޖެއެވެ.
އޭއީއެޗްގައި ވިހެއި ކުޑަކުއްޖަކު މަރުވުމާއި ގުޅިގެން އެ ހޮށްޕިޓަލުން ނެރުނު ބަޔާނުގައި ބުނީ ކުއްޖާ މަރުވީ ވިހެއުމުގެ ތެރޭގައި ކުއްޖާގެ ކޮނޑު ތާށިވުން ( ޝޯލްޑާ ޑިސްޓޯޝިއާ)ގެ ސަބަބުން ދިމާވި މައްސަލަތަކާ ގުޅިގެން ކަމަށެވެ.
މަދުން ނަމަވެސް ދިމާވާ ޝޯލްޑާ ޑިސްޓޯޝިއާގެ ހާލަތުގެ ސަބުބުން މައިމީހާއާ ކުއްޖާގެ ފުރާނައަށް ނުރައްކާ ވުމުގެ ފުރުސަތު އޮވެ އެވެ.
ހޮސްޕިޓަލުން ބުނީ ވިހެއުމުގެ ތެރޭގައި ދިމާވި ކަންކަމުގައި ވެސް ކުއްޖާ ފުރާނަ ސަލާމަތް ކުރެވޭތޯ މަސައްކަތް ކުރި ކަމަށާއި ނަމަވެސް އެކަން ކާމިޔާބު ނުވި ކަމަށެވެ.
”މި ހާދިސާގައި ކުއްޖާ ވިއްސުމަށްފަހު ތުއްތު ދަރިފުޅު ރިސައިޓޭޓް ކުރެވިފައިވޭ. ނަމަވެސް ކުއްޖާގެ ފުރާނަ ސަލާމަތް ކުރުމަށް ޑޮކްޓަރުންނާއި ނަރުހުންގެ ޓީމުން ކުރި މަސައްކަތް ވަނީ ނާކާމިޔާބު ވެފައި“ ހޮސްޕިޓަލުން ނެރުނު ބަޔާނުގައި ވެއެވެ.
އޭއީ އެޗްން ބުނީ މި ހާދިސާއާ ގުޅިގެން ބަލަން ޖެހޭ ކަންކަން ބަލައި ރަނގަޅުކުރަން ޖެހޭ ކަންކަން ބަލާނެ ކަމަށެވެ.
