ނޭޕާލުގައި ބުރާސްފަތިދުވަހު ބޭއްވުނު އާންމު އިންތިޚާބުގައި، މިހާރުގެ ބޮޑުވަޒީރު ޝަރްމާ ކޭޕީ އޮލީ ވާދަ ކުރެއްވި ދާއިރާއިން އޭނާޔާ ވާދަކުރި ކުރީގެ ރެޕް އާޓިސްޓް ބަލެންދުރަ ޝާހް ވަނީ ބޮޑު ތަފާތަކުން ކުރި ހޯދާފައެވެ.

އެގައުމުގެ އިލެކްޝަންސް ކޮމިޝަނުން ހޮނިހިރު ދުވަހު ވަނީ އުމުރުން ތިރީސް ފަސް އަހަރުގެ ޝާހް އަށް68،348ވޯޓު ލިބުނު އިރު ބޮޑުވަޒީރު އޮލީ އަށް ލިބިވަޑައިގެންނެވީ 18،734ވޯޓުކަން ޔަގީން ކޮށްދީފައެވެ. އެހެން ކަމާއެކު ޝާހު މިވަނީ ބޮޑުވަޒީރަށް ވުމާ ގާތަށް ޖެހިލާފައެވެ.
ބުރާސްފަތިދުވަހުގެ އިންތިހާބަކީ މިދިޔަ ސެޕްޓެމްބަރުމަހު ޒުވާނުން ނިކުމެ ބަދަލަކަށް ގޮވާލާ މުޒާހަރާކޮށް ވެރިކަން ވައްޓާލިފަހުން ބޭއްވި ފުރަތަމަ އިންތިހާބެވެ. ހޮނިހިރު ދުވަހުގެ ނަތީޖާއާއި އެކު ޝާހުގެ އާރު.އެސް.ޕީ ޕާޓީ ވަނީ އިންތިހާބް ކާމިޔާބް ކުރުމާއި ދިމާލަށް ހިފާފައެވެ.
ފާއިތުވި ވިއްސަކަށް އަހަރުވެސް ނޭޕާލުގައި އޮތީ ބޮޑު ތިން ޕާޓީގެ މައްޗަށް އެކުލެވޭ ކޮއެލިޝަން ސަރުކާރު ތަކެވެ.މިތިން ޕާޓީގެ ތެރެއިން ދެޕާޓީ އަކީ ކޮމިއުނިސްޓް އުސޫލު ތަކަށް ތަބާވާ ޕާޓީ ތަކެވެ.
އިންތިހާބްގެ ކުރިން އުފެދިފައިވާ އެންމެ ބޮޑު ސުވާލަކީ ޒުވާން ވެރިކަމަކާ ގައުމު ހަވާލުކުރުމަށް އެންމެން ތައްޔާރުތޯ ނުވަތަ އަނެއްކާވެސް ތިބޭނީ ކުރީގައިވެސް ތިބި ވެޓަރަން ނުވަތަ ”މުސްކުޅި“ މީހުންތޯ މިސުވާލެވެ.
ނޭޕާލުގެ އާބާދީގެ 800،000އަކީ ފުރަތަމަ ފަހަރަށް ވޯޓުލީ ޒުވާނުންނެވެ.
ރެޕް އާޓިސްޓް ބަލެންދުރަ ޝާހް އަކީ ނޭޕާލްގެ ހިޕް ހޮޕް މިޔުޒިކްގެ ދުނިޔޭގައި އެތައް އަހަރެއް ވަންދެން ހަރަކާތްތެރިވަމުން އައިސްފައިވާ ޒުވާނެކެވެ. އޭނާ ”ބަލިދާން“ގެ ނަމުގައި ނޭޕާލް ބަހުން ޔޫޓިއުބްގައި ނެރުނު ލަވަޔަށް އެތައް މިލިއަން ވިއުސް ލިބި ވަނީ މަޝްހޫރު ވެގެން ގޮސްފައެވެ.
2025ވަނަ އަހަރުގެ ސެޕްޓެމްބަރުމަހު ނޭޕާލްގެ ޒުވާނުން މުޒާހަރާތަކަށް ނިކުތީ ބޮޑުވަޒީރު އޮލީ ސޯޝަލް މީޑިޔާ ޕްލެޓްފޯމްތައް ބަންދު ކޮށްލުމާއި ގުޅިގެންނެވެ.މިއާއެކު ޒުވާނުން ވަނީ ގައުމުގައި ކޮރަޕްޝަނާއި، ފެންވަރުގެ ތަފާތު ކުރުންތައް ގެންގުޅޭކަން ފާހަގަކޮށް މުއްސަދިންގެ ދަރިން ނުވަތަ ”ނެޕޯ ބޭބީސް“ އަށް އާންމު ޓެކްސް ޕޭޔަރުންގެ ފައިސާއިން ނުހައްގު އިނާޔަތްތައް ލިބޭކަން ފާހަގަ ކޮށްފައެވެ.
ޒުވާނުންގެ މުޒާހަރާތަކުގައި 77 މީހުން ވަނީ މަރުވެފައެވެ.މުޒާހަރާތަކުގައި ރެޕް އާޓިސްޓް ބަލެންދުރަ ޝާހް ވަނީ ޒުވާނުންނާ އެއްކޮޅަށް އަޑު އުފުލާފައެވެ. އަދި ބޮޑުވަޒީރު އޮލީ އަކީ ގައުމަށް ޤައްދާރު ވެފައިވާ ޓެރަރިސްޓެއް ކަމަށް ތުހުމަތު ކޮށްފައި ވެއެވެ. ޝާހްގެ ކެމްޕެއިން ސްލޯގަން އަކަށްވީ އޭނާއަކީ ނޭޕާލްގެ ހުރިހާ ރައްޔިތުންނަށް ޚިދުމަތް ކޮށްދޭން ނިކުތް ކެންޑިޑޭޓް ކަމަށް ބުނުމެވެ.
ފެބްރިއަރީ މަހު ނެރުނު ޝާހުގެ އާރު.އެސް.ޕީ ޕާޓީގެ މެނިފެސްޓޯގައި1.2 މިލިއަން ވަޒީފާ އުފައްދާނެ ކަމަށް ވައުދު ވެފައި ވެއެވެ. އަދި ވަޒީފާ ނުލިބުމާއި ކުޑަ މުސާރަތަކުގެ މައްސަލަޔަށް ހައްލު ހޯދާދީ މަޖްބޫރުވެގެން ގައުމު ދޫކޮށްދާ މައްސަލަޔަށް ހައްލު ހޯދާދޭނެ ކަމަށް ބުނެފައި ވެއެވެ.
މީގެ އިތުރުން އެޕާޓީން ވަނީ ފަސް އަހަރު ދުވަހުގެތެރޭގައި ޕަރ ކެޕިޓާ އިންކަމް 1،447 ޔޫއެސްޑޮލަރުން 3،000ޔޫއެއްޑޮލަރަށް ބޮޑު ކޮށްދޭނެ ކަމަށް ބުނެފަ އެވެ.އަދި ގައުމުގެ އިގްތިސާދު ރަގަޅުކޮށް ޖީޑީޕީ 100ބިލިއަން ޔޫއެސް ޑޮލަށް ޖައްސާދީ ،އާންމު ރައްޔިތުންނަށް ހެލްތުކެއާ އިންޝުއަރަންސް ފަދަ ސޭފްޓީ ނެޓް ތައް ގާއިމް ކޮށްދޭނެ ކަމަށް ބުނެފައި ވެއެވެ.