އުފަންވިއިރު ގުޅިފައި ތިބި ސޯމާލިޔާގެ ތުއްތު ދެކުދިން ކާމިޔާބް ކަމާއެކު ވަކި ކޮށްފިއެވެ.ދެކުދިން ވަކި ކުރުމަށް 12 ގަޑިއިރުގެ އޮޕަރޭޝަން ކޮށްފައިވަނީ ސައޫދީއަރަބިއްޔާގެ ރިޔާޟް ގައި ހުންނަ ކިންގ އަބްދުލް އަޒީޒް މެޑިކަލްސިޓީގެ ދަށުން ހިންގާ ކިންގް އަބްދުﷲ ސްޕެޝަލިސްޓް ޗިލްރަންސް ހޮސްޕިޓަލްގައެވެ.

އޮޕަރޭޝަން ކުރި ސަރޖިކަލް ޓީމް ގައި އިސްކޮން ހުންނެވީ ޑޮކްޓަރ އަބްދުﷲ އަލް ރަބީއާ އެވެ.އޭނާއަކީ ސަލްމާން ރަސްގެފާނު ދަރުމަޔަށް ހިންގަވާ ކިންގ ސަލްމާން ހިއުމެނިޓޭރިއަން އެއިޑް އެންޑް ރިލީފް ސެންޓަރ ގެ ސުޕަރވައިޒަރުގެ އިތުރުން،ރަސްގެފާނުގެ ބެލުމުގެ ދަށުން ހިންގާ، މިގޮތަށް ގުޅިފައިތިބޭ ކުދިން ވަކިކުރުމުގެ ޚާއްސަ ޕްރޮގްރާމްވެރިޔާވެސް މެއެވެ.
12 ގަޑިއިރަށް ކުރިޔަށް ދިޔަ އޮޕަރޭޝަން ކުރީ އަށް ބަޔަކަށް ބަހާލައިގެންނެވެ. އޮޕަރޭޝަން ކުރުމުގައި ހޭނެއްތުން، ޕީޑިއޭޓްރިކް ސަރޖަރީ، ޔޫރޮލޮޖީ، އޯތޯޕީޑްކްސް އަދި ޕްލާސްޓިކް ސަރޖަރީ ފަދަ މުހިންމު ދާއިރާތަކުން 36 ކޮންސަލްޓަންޓުންނާއި ،ސްޕެޝަލިސްޓުން އަދި ޓެކްނީޓަނުން ބައިވެރިވެފައިވެއެވެ.
އޮޕަރޭޝަން އަށް ފަހު މައުލޫމާތު ދެއްވަމުން ޑޮކްޓަރ އަލް-ރަބީއާ ވިދާޅުވީ ބުރާސްފަތިދުވަހު ވަކިކުރެވުނީ ޚާއްސަ ޕްރޮގްރާމް ގެ ދަށުން ވަކިކުރެވުނު 68 ވަނަ ”ޓްވިންސް“ އެވެ. އޭނާ ވިދާޅުވީ ސައޫދީގައި ހިންގާ، އުފަންވެފައިވާއިރު ގުޅިފައިތިބޭ ކުދިން ވަކި ކުރުމުގެ ޕްރޮގްރާމްގެ ދަށުން ފާއިތުވި 35 އަހަރު ތެރޭ ދުނިޔޭގެ 28 ގައުމެއްގެ 156 ޓްވިންސް ބަލާ، ފަރުވާދީ އަދި ވަކި ކުރެވެން ތިބި ކުދިން ވަކި ކޮށްފައިވާ ކަމުގައެވެ.
ބުރާސްފަތިދުވަހު ވަކިކުރެވުނު ދެކުދިން ގެ މައިންބަފައިން ވަނީ އެއާއިލާއަށް ލިބުނު ފަރުވާ އަށާއި ޚާއްސަ އެހީތެރިކަމަށް ސަލްމާން ރަސްގެފާނަށާއި ވަލީ އަޙްދު މުހައްމަދު ބިންސަލްމާން އަށް ޝުކުރު އަދާކޮށްފަ އެވެ. މީގެ އިތުރުން ސަލްމާން ރަސްގެފާނު ހިންގަވާ ހިއުމެނިޓޭރިއަން ޕްރޮގްރާމް ވަރަށް ރަގަޅުކަން ފާހަގަކޮށް ޝުކުރު އަދާކޮށްފައި ވެއެވެ.
13 މަހުގެ ދެބެން ރަހްމާ އާއި ރަމްލާ ސައޫދީ އަރަބިއްޔާއަށް ގެންގޮސްފައިވަނީ މިދިޔަ އަހަރުގެ މޭ މަހުއެވެ. ދެކުދިން ގުޅިފަ ތިބީ ހަށިގަނޑުގެ ތިރީބައިންނެވެ. ކޮންމެ ހަށިގަނޑަކަށް ވެސް ފުރިހަމަ ދެފައި ލިބިފައި ވީނަމަވެސް އެތެރޭގެ ބައެއް ގުނަވަންތައް ވަނީ އެއް ސެޓެވެ.މީގެ އިތުރުން ކުޑަކަމުދާ ނިޒާމާއި އަދި ވިހެއުމުގެ ނިޒާމު ވަނީ އޯވަރލެޕް(ފުށުއަރާފަ) ކަމަށްވެއެވެ. ސްޕެޝަލައިޒްޑް ތަހުލީލުތަކާއި ޓެސްޓް ތަކަށްފަހު ގިނަ އޮޕަރޭޝަން ތަކެއްކޮށް ދެހަށިގަނޑު ވަކިން އުޅެވޭވަރު ވަނީ ކޮށްފައެވެ.