އިންޑިޔާ ކަނޑުން ދަތުރު ކޮށްފައިދިޔަ އީރާނުގެ ހަނގުރާމަ މަތީ މަނަވަރަކަށް އެމެރިކާގެ ސަބްމެރީންއަކުން ޓޮޕިޑޯއެއް ފޮނުވާލައިގެން މަނަވަރު ގޮއްވާލާ ފައްތާލައިފިއެވެ.

މި ހާދިސާ ހިނގިއިރު އީރާނުގެ މަނަވަރު އޮތީ އިންޑިޔާ ކަނޑުގައި ސްރީލަންކާގެ ދެކުނުން ފަންސަވީހަކަށް މޭލު ބޭރުގައެވެ. އެއީ ރާއްޖެއާވެސް ވަރަށް ކައިރި ހިސާބެކެވެ.
އެމެރިކާގެ ސެކްރެޓަރީ އޮފް ޑިފެންސް ޕީޓް ހެގްސެތު ވިދާޅުވީ އެމެރިކާގެ ސަބްމެރީނަކުން އީރާނުގެ ހަނގުރާމަމަތީ މަނަވެއް އިންޑިޔާ ކަނޑުތެރެޔަށް ފައްތާލުމުގައި ކާމިޔާބީ ހާސިލް ކުރެވިފައިވާ ކަމުގައެވެ. އަދި ބޯޓު ކަނޑަށް ފެތިގެން ދިޔައީ ހިމޭންކަމާއެކު ކަމަށް ހެގްސެތު ވިދާޅުވިއެވެ. ބޯޓުގެ ނަން ހާމަ ނުކުރައްވާ ހެގްސެތު ވިދާޅުވީ ބައިނަލްއަގްވާމީ ސަރަހައްދުން ދަތުރު ކުރަން ރައްކާތެރިވާނެކަމަށް އެ މަނަވަރުން ހީކުރި ކަމަށާ އެހެން ނަމަވެސް އެކަން އެގޮތަށް ނުވި ކަމުގައެވެ.
ހެގްސެތުގެ ބަޔާނުގެ ކުރިން ސްރީލަންކާ ކަނޑުގެ ސިފައިވަނީ މިކަމުގެ މައުލޫމާތު ހާމަ ކޮށްފައެވެ. ލަންކާގެ އޮފިޝަލުން ހާމަ ކޮށްފައިވާ ގޮތުގައި ބުދަދުވަހު ހެނދުނުގެ ވަގުތެއްގައި އެގައުމުގެ ދެކުނުން ފަންސަވީހަކަށް މޭލު ބޭރުން ދަތުރު ކުރަނިކޮށް ފައްތާލެވުނު އީރާނުގެ މަނަވަރަކުން ފޮނުވި ޑިސްޓްރެސް ސިގްނަލް އަކަށް ޖަވާބުދީ ސްރީލަންކާގެ ނޭވީ ސިފައިން ވަނީ ހަރަކާތްތެރިވެފައެވެ. އަދި އޭހީވާން ދިޔަ ސިފައިން ވަނީ 32 މީހުން ކަނޑުމަތިން ސަލާމަތްކޮށް އަދި ފައްތާލިމަނަވަރުން 80 ހަށިގަނޑު ނެރެފައި ކަމަށް ލަންކާގެ ނޭވީން ބުނެފައި ވެއެވެ.
ސްރީލަންކާ ނޭވީގެ ތަރުޖަމާނު ހާމަ ކުރި ގޮތުގައި އީރާނުގެ މަނަވަރު ”އައިރިސް ދީނާ“ ގެ ޑޮކިއުމަންޓް ތަކުން ފެނުނު ގޮތުގައި ހަމަލާ ދިންއިރު ބޯޓުގައި 180 މީހުން ތިބިކަމަށް ގަބޫލު ކުރެވެއެވެ. މަނަވަރު ދަތުރު ކުރީ ލަންކާގެ އިގްތިސާދީ ސަރަހައްދުން ބޭރުން ނަމަވެސް ލަންކާޔާ ވަރަށް ގާތުން ކަމަށްވާތީ އިންޓަނޭޝަނަލް އުސޫލުތަކުގެ ދަށުން އެހީތެރިކަން ފޯރުކޮށް ދިނީ ކަމަށް ނޭވީގެ ތަރުޖަމާން ބުނެފައި ވެއެވެ.
ސްރީލަންކާގެ ފޮރިން އެފެއާސް މިނިސްޓަރ ވިޖީތާ ހެރަތު ވިދާޅުވީ މަނަވަރުން ސަލާމަތް ކުރެވުނު މީހުންވެސް ތިބީ ވަރަށް ބޮޑަށް ފިހި އަނިޔާތައްލިބިފައި ކަމުން އެމީހުންނަށް ވަނީ ދެކުނުގެ ޕޯޓް ސިޓީ ގޯލްގެ ހޮސްޕިޓަލެއްގައި ފަރުވާދޭން ފަށާފައެވެ.
އީރާނާ ދެކޮޅަށް މިހާރު ކުރިޔަށްދާ ހަގުރާމައިގައި ސްރީލަންކާއިން ވަކި ކޮޅަކަށް ޖެހިފައެއް ނުވެއެވެ. އަދި މައްސަލަ އިތުރަށް ހޫނުވަމުން ދިޔަނުދިނުމަށްޓަކައި ހުރިހާ ފަރާތަކުންވެސް ކެއްތެރިވުމަށް ގޮވާލާފައި ވެއެވެ. މީގެ އިތުރުން ސުޕްރީމް ލީޑަރު އާޔަތުﷲ އަލީ ޚާމަނާއީ އަވަހާރަ ކޮށްލެވުމުން ފޮރިން އެފެއާސް މިނިސްޓަރު ވިޖީތާ ހެރަތު ވަނީ ތައުޒިޔާ ވެސް ވިދާޅުވެފައެވެ.
2015 ވަނަ އަހަރު ކަނޑަށް ބާލާފައިވާ މަނަވަރު ”އައިރިސް ދީނާ“ އަކީ ”ސްޓްރެއިޓް އޮފް ހޮރްމޫސް“ އަދި ގަލްފް އޮފް އޮމާން ބެލެހެއްޓުމުގެ މަސައްކަތުގައި ހަރަކާތެރިވާ މަނަވަރެކެވެ. މަނަވަރު އިންޑިޔާ ކަންޑަށް އައީ ނިމުނު ހަފްތާގައި އިންޑިޔާއިން ބޭއްވި މިލިޓަރީ އެކްސަރސައިޒެއްގައި ބައިވެރިވުމަށެވެ.
އަނެއް ކޮޅުން އެމެރިކާގެ މަދަދާއެކު އިޒްރޭލުން އީރާނަށް ދެމުންގެންދާ ހަމަލާތަކުގެ ހަވަނަ ދުވަސް ނިމުނު އިރު އިޒްރޭލުން ބުނަނީ އީރާނުގެ ވެރިރަށް ތެހެރާނުގައިވާ ސެކިއުރިޓީ ހެޑްކުއާޓަރު ތައް ހަލާކު ކޮށްލެވިފައިވާ ކަމުގައެވެ.
އީރާނުގެ އިތުރުން އިޒްރޭލުން ގެންދަނީ ލުބްނާންގެ ހިޒްބުﷲ މަގާމްތަކަށްވެސް ހަމަލާ ދެމުންނެވެ.އަދި އެއްގަމު މަގުންވެސް ވަނީ ލުބްނާނަން ސިފައިން ފޮނުވާފައެވެ.
އީރާނުންވެސް ހިއްވަރާއެކު ރައްދު ހަމަލާތައް ދެމުން ގޮސްފައި ވެއެވެ.މިގޮތުން ސައޫދީއަރަބިއްޔާ އަދި ކުވޭތަށް އީރާނުން ބުދަދުވަހު ވަރުގަދަ ހަމަލާތަކެއް ދީފައިވެއެވެ. ތުރުކީ އިންވެސް ވަނީ އެގައުމަށް އަރަށް އައި ހަމަލާތަކެއް މަތަކޮށްފައިވާ ކަމަށް ބުނެފައެވެ.