އިޒްރޭލާއި އެމެރިކާ ގުޅިގެން އީރާނާ ދެކޮޅަށް ފެށި ހަނގުރާމަޔާ ގުޅިގެން ސައޫދީ އަރަބިއްޔާ ގައި ނުފުރިފައި ތިބި ގަލްފް ކޯޕޮރޭޝަން ކައުންސިލްގައި ހިމެނޭ ގައުމު ތަކުގެ ރައްޔިތުން ނަށް ޚާއްސަ ކޮށްގެން އެގައުމުގެ މިނިސްޓްރީ އޮފް އިންޓީރިއަރ އިން ހޮޓްލައިން ނަމްބަރު ތަކެއް ގާއިމް ކޮށްފިއެވެ.

އެ މިނިސްޓްރީން ހޯމަ ދުވަހު ނެރުނު ބަޔާނެއްގައި ބުނެފައިވާ ގޮތުން ގަލްފް ގައުމު ތަކަށް ނިސްބަތްވާ ގިނަ އަދަދެއްގެ މީހުން ސައޫދީ އެއާޕޯޓްތަކުގައި ބަންދު ވެފައި އެބަތިއްބެވެ.އެހެން ކަމުން އެމީހުން ގެ ވެލްވެއަރ އަށް ކޮށްދޭން ޖެހޭ ހުރިހާ ކަމެއް ހަމަޖައްސާދެމުން ދާކަމަށް ބުނެފައި ވެއެވެ.

އަދި އެމީހުންނަށް ފުރޭގޮތް ވަންދެން އާއިލާތަކާ ގުޅުމަށާ އަދި ގުޅަންޖެހޭ ތަންތަނަށް ގުޅޭނެ އިންތިޒާމްވެސް ހަމަޖައްސާދީފައިވާކަމަށް އިންޓީރިއަރ މިނިސްޓްރީން ބުނެފައި ވެއެވެ.މިހާރު ހުޅުވާލާފައިވާ ހޮޓްލައިން(992) އަކީ ޖެނެރަލް ޑައިރެކްޓަރޭޓް އޮފް ޕާސްޕޯޓްސްގެ ނަމްބަރެވެ.

ގަލްފް ގައުމުތަކުގެ ހުރިހާއެންމެންވެސް ޕާސްޕޯޓްސް ޑިޕާޓްމަންޓުގެ އޮޕަރޭޝަންސް ޑިވިޝަންއާ ގުޅަމުން ގެންދިއުމަށް އެފަރާތުން އެދިފައި ވެއެވެ. އަނެއްކޮޅުން އެމެރިކާއިންވެސް ގެންދަނީ އަރަބި ގައުމުތަކުގައި ތިބި އެމެރިކާގެ ރައްޔިތުން އެގައުމުތައް ދޫކޮށް ދިއުމަށް އަންގަމުންނެވެ.

ސްޓޭޓް ޑިޕާޓްމަންޓުން ނެރެފައިވާ އެޑްވައިސަރީ އެއްގައިވަނީ ބަހްރެއިން،މިސްރު،އީރާން،އީރާޤް،އިޒްރޭލް، ވެސްޓް ބޭންކު،ޣައްޒާ، ޖޯޑްން ،ކުވެއިތު،ލުބްނާން އޮމާން،ޤަތަރު،ސައޫދީ އަރަބިއްޔާ، ސީރިޔާ، ޔުނައިޓަޑް އެރެބް އެމިރޭޓްސް އަދި ޔަމަން ގައިތިބި އެމެރިކާގެ ރައްޔިތުންނަށް ސޭފްޓީ ރިސްކް ވަރަށް ބޮޑުކަމަށާ އެހެން ކަމުން އެ ގައުމުތަކުން އަވަހަށް ފޭބުމަށް ވަނީ ގޮވާލާފައެވެ.