އިޒްރޭލާއި އެމެރިކާ ގުޅިގެން އީރާނާ ދެކޮޅަށް ހޮނިހިރުދުވަހު ފެށި ހަނގުރާމަ ތިންވަނަ ދުވަހަކަށް ކުރިޔަށް ގޮސްފައިވާއިރު، އެންމެ ވަރުގަދަ ހަމަލާތައް އަދި ކުރިޔަށް އޮތީ ކަމަށް އެމެރިކާއިން ބުނެފިއެވެ.

ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވީ މިއީ ހަނގުރާމައިގެ އުކުޅުތައް ކަމަށާ މިކަންކަން އަދި ހާމަ ކުރެވެން ނޯންނާނެ ކަމުގައެވެ.

ހަމަލާތަކުގެ ރައްދުގައި އީރާނުންވެސް ދޭ ހަމަލާތައްދަނީ ވަރުގަދަ ކުރަމުންނެވެ. މިގޮތުން ޤަތަރު ގެ ވެރިރަށް ދޯހާ، ދުބާއީ އަދި ކުވެއިތުގައި ވެސް ބާރުގަދަ ގޮވުން ތަކުގެ އަޑު އިވެމުން ދާކަމަށް ޚަބަރު ލިބެއެވެ.

ހޯމަ ދުވަހުގެ ހަބަރުތައް ބުނާ ގޮތުން ކުވެއިތުގައި ހުންނަ އެމެރިކާ އެމްބަސީން ވަރަށް ބޯކޮށް ދުން އަރަމުން ދާތަން ފެނިފައި ވެއެވެ.ކުވޭތަށް ފޮނުވާލި ގިނަ ހަމަލާތަކެއް އެގައުމުގެ ސިވިލް ޑިފެންސް ބާރުތަކުން މަތަކޮށްފައިވާ ކަމަށް ޚަބަރުލިބެއެވެ.ބަހުރެއިނުންވެސް ބުނެފައިވާ ގޮތުގައި އެގައުމުން އެއާރެއިޑް އެލަރޓްތައް ބޭނުން ކުރަން ވަނީ ފަށާފައެވެ.މިގޮތުން ނުރައްކާ ކުރިމަތިވުމުން އާންމުން އެންމެ ގާތުގައިވާ ރައްކާތެރި ތަންތަނަށް ވަނުމުގެ ފުރުސަތު ލިބި ދެވޭނެއެވެ. ބައެއް މައި ބްރިޖްތައް ބަންދުކޮށްފައިވާއިރު ދަތުރު ފަތުރު ކުރުމުގައިވެސް ކޮންމެހެން ބޭނުމެއް ޖެހިގެން މެނުވީ މައި މަގުތަކުން ދަތުރު ނުކުރުމަށް ވަނީ އަންގާފައެވެ.މިހަމަލާތަކުގައި މަރުވި އަދި ޒަޚަމްވި މީހުންނަށް ބަލާއިރު، ލުބްނާނުން 52 މީހުން މަރުވެފައިވާއިރު،ކުވެއިތުން އެކަކު އަދި ޔޫއޭއީން ތިން މީހުން މަރުވެފައި ވެއެވެ. އަދި ޤަތަރުން 16 މީހުންނަށް އަނިޔާވެފައިވާ ކަމަށް ޚަބަރުތައް ބުނެއެވެ.އީރާނުން ބުނެފައިވަނީ މުހިންމު ކަނޑުއޮޅިއެއްކަމަށްވާ ސްޓްރެއިޓް އޮފް ހޮރްމޫޒް ހުރަސް ކުރަން އުޅޭ ކޮންމެ އުޅަނދެއް އަންދާލާނެ ކަމުގައެވެ.މިކަންޑުއޮޅިއަކީ ގަލްފް ގައުމުތަކުން ތެލާއި ގޭސް އުފުލުމަށް ބޭނުން ކުރާ މުހިންމު ކަނޑު އޮޅިއެކެވެ.އިރާނުން ދެމުންދާ ރައްދުހަމަލާތައް ކުށްވެރިކޮށް ސައޫދީއަރަބިއްޔާ،ބަހްރެއިން،ޖޯޑްން،ކުވެއިތު، ޤަތަރު އަދި ޔޫއޭއީ ގުޅިގެން ވަނީ ބަޔާނެއްނެރެ، އެގައުމުތަކަށްވެސް އަމިއްލަ ގައުމު ދިފާއު ކުރުމުގެ ހައްގު އޮންނަން ޖެހޭނެ ކަމަށް ބުނެފައެވެ.އަދި އެގައުމުތަކުގެ ސެކިއުރިޓީ އާއި ހަމަޖެހުން ޔަގީންކޮށް، ރައްޔިތުންނާއި ޓެރިޓަރީތައް ހިމާޔަތް ކުރުމުގެ އިތުރުން ރައްދު ހަމަލާތައް ދިނުމުގެ ހައްގު އޮންނަން ޖެހޭނެ ކަމަށް އެގައުމުތަކުން ބުނެފައި ވެއެވެ.މިބަޔާނުގެ ރައްދުގައި އީރާނުގެ ފޮރިން މިނިސްޓަރ އައްބާސް އަރަގްޗީ ވިދާޅުވީ އީރާނުން ގަލްފްގެ އަވަށްޓެރި ގައުމުތަކާ ދެކޮޅަށް ތެދުވަން ބޭނުން ނޫންކަމަށާ، މިހާރުވެސް އޮތް ރަގަޅު އަވަށްޓެރި ކަމުގެ ގުޅުންތައް އެގޮތުގައި ދަމަހައްޓަން ބޭނުން ކަމަށް އަރަގްޗީ ވިދާޅުވިއެވެ. އަދި އީރާނުން މިކުރާކަމަކީ އެމެރިކާއިން ދެމުންގެންދާ ހަމަލާތަކަށް ރައްދު ދިނުންކަމަށް ޚާރިޖީ ވަޒީރު ވިދާޅުވެފައި ވެއެވެ. އަނެއް ކޮޅުން އީރާނުން ލިބޭ ޚަބަރުތަކަށް ބަލާއިރު، ހަމަލާތަކުގައި އީރާނުން މިހާތަނަށް 201 މީހުން މަރުވެ، 747 މީހުން ޒަޚަމް ވެފައި ވެއެވެ.އީރާނަށް ހަމަލާދޭން ފެށިފަހުން ފުރަތަމަ ފަހަރަށް ވައިޓްހައުސްގައި ހުންނަވާ ވާހަކަފުޅު ދައްކަވަމުން އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައިވަނީ އީރާނާއި ދެކޮޅަށް ހަނގުރާމައެއްފެށީ މިވަގުތަކީ އީރާނުގެ ”ރެޖީމް“ ނުވަތަ ނުފޫޒުގަދަ ވެރިކަމުން ކުރަމުން ގެންދާކަންކަން ހުއްޓުވުމަށް ލިބޭނެ އެންމެ ފަހުގެ ރަގަޅު ފުރުސަތު ކަމަށް ވާތީ ކަމުގައެވެ.ޓްރްމްޕް ވިދާޅުވީ ހަމަލާތަކުގައި މިހާތަނަށް 1250 ޓާގެޓަށް ހަމަލާ ދީފައިވާ ކަމުގައެވެ.އެމެރިކާއާއި ގުޅިގެން އިޒްރޭލުން ހޮނިހިރު ދުވަހު އީރާނަށް ދޭންފެށިހަމަލާތަކުގައި އެގައުމުގެ ސުޕްރީމް ލީޑަރ އާޔަތުﷲ ޚާމަނާއީ އާއި އޭނާގެ އާއިލާގެ ބައެއް ބޭފުޅުންގެ އިތުރުން ސަރުކާރުގެ އިސް ބައެއް ފަރާތްތައް ވަނީ މަރުވެފައެވެ.