އިޒްރޭލުން އީރާނާދެކޮޅަށް ހޮނިހިރުދުވަހު ދޭންފެށި ވަރުގަދަ އުދުވާނީ ހަމަލާތައް އަދިވެސް ހުއްޓާނުލާ ކުރިޔަށްގެންދާއިރު،ރައްދުގައި އީރާނުންވެސް ވަށައިގެންވާ ބައެއް ގައުމުތަކުގައިވާ އެމެރިކާގެ ތަންތަނަށް މެދުނުކެނޑި ދަނީ ހަމަލާ ދެމުންނެވެ.

އީރާނުގެ ހަމަލާތަކުން ޔޫއޭއީގައި 3 މީހުން މަރުވެފައިވާއިރު ކުވޭތުންވެސް އެކަކު މަރުވެފައިވާ ކަމަށް ވެއެވެ.އެމެރިކާގެ ރައީސް ޑޮނަލްޑް ޓްރަމްޕް ވަނީ މަރަލާގޯއިން ވޮޝިންގޓަން އަށް އާދީއްތަ ދުވަހުގެރޭ ވަދައިގެންފައެވެ. ޓްރަމްޕް ވިދާޅުވެފައިވަނީ އީރާނާދެކޮޅަށް ހިންގާ އޮޕަރޭޝަން ކުރިޔަށް ދަނީ ކަނޑައެޅިފައިވާ ޝެޑިއުލް އަށްވުރެ ކުރިޔަށް ކަމުގައެވެ.އަދި އެމެރިކާސިފައިން ހަމަލާދީ އީރާނުގެ ނުވަ ނޭވީ ޝިޕް ފައްތާލާފައިވާ ކަމަށް ޓްރަމްޕް ވިދާޅުވެފައިވެއެވެ.މީގެ އިތުރުން ކަނޑައަޅާފައިވާ ހުރިހާ އަމާޒެއް ހާސިލް ވަންދެން މިލިޓަރީ އޮޕަރޭޝަން ކުރިޔަށް ގެންދެވޭނެ ކަމުގައި ޓްރަމްޕް ވިދާޅުވެފައި ވެއެވެ. މިއޮޕަރޭޝަންގައި ބައިވެރިވި އެމެރިކާސިފައިންގެ ތެރެއިން ތިން މީހުން މަރުވެފައިވާ ކަމަށާ އަދި މަރުވާ ސިފައިންގެ އަދަދު މިއަށްވުރެ އިތުރުވާނެކަން އެއީ ގަބޫލުކުރަންޖެހޭނެ ހަގީގަތް ކަމަށް ޓްރަމްޕް ވިދާޅުވެފައި ވެއެވެ.އިޒްރޭލުގެ ޑިފެންސް ފޯސަސް(އައިޑީއެފް) ވެސް ބުނެފައިވަނީ އީރާނާ ދެކޮޅަށް ފެށިއޮޕަރޭޝަންގެ ފުރަތަމަ ދުވަހު މުހިންމު އެތައްކަމެއް ހާސިލް ކުރެވިފައިވާ ކަމުގައެވެ.އަދި ކުރިޔަށްވެސް އޮތީ ހަނގުރާމައިގެ ދުވަސްތައް ކަމުގައި ބުނެފައި ވެއެވެ.އީރާނުން ދިން ރައްދު ހަމަލާތަކުގައި އިޒްރޭލުގެ ނުވަމީހުން މަރުވެފައިވާއިރު އީރާނުން މަރުވި މީހުންގެ އަދަދުވަނީ 153އަށް ވުރެ މައްޗަށް އަރާފައެވެ.ސުޕްރީމް ލީޑަރ އާޔަތުﷲ އަލީ ޚާމަނާއީ އަވަހާރަވެފައިވުމާއި އެކު،ވަގުތީ ލީޑަރޝިޕް ކައުންސިލެއް ވަނީ އެކުލަވާލާފައެވެ. މިކައުންސިލަށް ނަންދީފައިވަނީވެސް ޚާމަނާއީގެ ނަންފުޅުންނެވެ. އީރާނުގެ ޚާރިޖީ ވަޒީރު ވިދާޅުވީ އައު ސުޕްރީމް ލީޑަރަކު ދެދުވަހެއްގެތެރޭގައި ހޮވޭނެ ކަމުގައެވެ.އެމެރިކާގެ މަދަދާއެކު އިޒްރޭލުން ފެށި ހަގުރާމައިގެތެރެޔަށް ފެތެމުންދާ ގައުމުތަކުގެ އަދަދު ދަނީ އިތުރު ވަމުންނެވެ. ބަހްރެއިނުން ބުނެފައިވަނީ ބަހްރެއިނަށް ދޭ ހަމަލާއަކީ ހަމައެކަނި އެގައުމަށް ދެވޭ ހަމަލާއެއް ނޫން ކަމަށާ އެއީ ގަލްފް ކޯޕޮރޭޝަން ކައުންސިލް (ޖީސީސީ)ގައި ހިމެނޭ ހުރިހާ ގައުމުތަކާ ދެކޮޅަށް ދެވޭ ހަމަލާއެއްކަމުގައެވެ.އަނއެއްކޮޅުން އިގިރޭސިވިލާތް ،ފްރާންސް އަދި ޖަރމަނީ ވެސް ވަނީ މެދުއިރުމަތީގައި ހިމެނޭ އެގައުމުތަކުގެ ”މުދާ“ ހިމާޔަތް ކުރުމަށް ފިޔަވަޅު އަޅަން ތައްޔާރަށް ތިބިކަމަށް ބުނެފައެވެ.މިކަން ބަޔާން ކޮށް އެތިން ގައުމުން ނެރުނު ބަޔާނުގައި އިރާނުން ވަށައިގެންވާ ގައުމުތަކަށް ދެމުން ގެންދާ ހަމަލާތައް ކުށްވެރިކޮށް، އެކަން ހުއްޓާލުމަށް ގޮވާލާފައި ވެއެވެ.މިއިން އެއްވެސް ގައުމަކުން އިޒްރޭލުގެ އުދުވާނީ ހަމަލާތައް ކުށްވެރި ކޮށްފައެއް ނުވެއެވެ.