ރޭ ހާރުދަމުގެ ވަގުތުގައި މއ. ސިޓީވިލާގައި ރޯވި އަލިފާންގަނޑު ނިއްވާލެވިފައިވާކަމަށް މޯލްޑިވްސް ނޭޝަލަނަލް ޑިފެންސް ފޯސް (އެމްއެންޑީއެފް)އިން ބުނެފިއެވެ.

އެމްއެންޑީއެފުން ބުނީ، މި ހާދިސާގެ މަޢުލޫމާތު އެ މުއައްސަސާއަށް ލިބިފައިވަނީ ހާރުދަމު 3:05ގައި ކަމަށެވެ. އެއާއެކު ފަޔަރފައިޓަރުން އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ފެށި ކަމަށް އެމްއެންޑީއެފުން މަޢުލޫމާތުދެއެވެ.

އެމްއެންޑީއެފުން ބުނީ، އަލިފާންގަނޑު އެއްކޮށް ނިއްވާލެވިފައިވަނީ ފަތިހު 4:15 ވަނިކޮށް ކަމަށާއި، މި ހާދިސާގައި އެ ގޭގެ އެކި ބައިތަކަށް ގެއްލުންވެފައި ވާކަމަށެވެ.

މި ހާދިސާގައި އެއްވެސް މީހަކަށް ގެއްލުމެއް ވީކަމުގެ ރިޕޯޓެއް ލިބިފައި ނުވާކަމަށްވެސް އެއްއެންޑީއެފުން ބުނެއެވެ.