ތާރީޙީ ގޮތުން ކޮންމެ އިސްތިއުމާރީ ބާރަކުންވެސް ބޭނުންކުރާ ހާއްސަ އުކުޅެއް އޮވެއެވެ. އެއީ، އެބައިމީހުންގެ އަޅުވެތިކަމުގެ ދަށުގައިވާ މީހުންނަށް، އެ ނިޒާމުގެ ތެރޭގައި ބައިވެރިވުމަކީ ނުފޫޒު ގަދަވުން ކަމަށާއި، ކިޔަމަންތެރިވުމަކީ ތަސައްރަފު ފުދުން ކަމަށް ވިސްނައިދިނުމެވެ. މި އުކުޅު މިއަދު ’އިސްލާމީ ނޭޓޯ‘ އިން އެހުރީފެންނާށެވެ. މިއީ މުސްލިމުންގެ މެދުގައި އުފެދޭ ރުޅިއާއި އުދާސް މެނޭޖުކޮށް، ނުވަތަ އެހެން ފަރާތްތަކާ މެނޭޖުކުރަން ހަވާލުކުރުމާ، އަދި ނުރައްކަލެއް ނެތް ގޮތުގައި ނައްތާލެވިދާނެކަމުގެ ޔަގީންކަން ހުޅަނގުގެ ބާރުތަކަށް ދިނުމަށްޓަކައި އުފައްދާފައިވާ ސުންނީ އިއްތިހާދެކެވެ.
ހަގީގަތާ ކުރިމަތިލަމާ ހިނގާށެވެ. މިފަދަ އިއްތިހާދެއް އޭގެ ހަގީގީ މާނައިގައި އޮތް ނަމަ، މިއަދު ގައްޒާގެ ހާލަތު ފެންނަން އޮތް ގޮތަކަށް ނުއޮތީހެވެ.
މި ފޭކް ދަޅަ ދައްކަނީ ކީއްވެގެން ހެއްޔެވެ؟ ސަބަބަކީ، ’އިސްލާމީ ނޭޓޯ‘ ގެ އަސްލު މަގްސަދަކީ ޒަޔަނިސްޓުންނާ ދެކޮޅުވެރިވުމެއް ނޫނެވެ. އޭގެ ބަދަލުގައި، އެއީ މުސްލިމް ރައްޔިތުން ކޮންޓްރޯލްކޮށް، ވަކި އުސޫލެއްގެ ތެރޭގައި ހިފެހެއްޓުމެވެ. މިއީ ޔަހޫދިންނަށްވުރެ ބޮޑަށް، އަމިއްލަ ގައުމުގެ ރައްޔިތުންގެ ނުރުހުމަކަށް ބިރުގަންނަ ރަސްކަންތަކާއި މުއްސަނދި ވެރިކަންތައް ހިމާޔަތްކުރުމަށް އެކުލަވާލާފައިވާ ރޭވުމެކެވެ، މިފަދަ ވެރިން އެންމެ ޖެހިލުންވަނީ މިއަދު ރައްޔިތުންނަށް ހަގީގަތް ހާމަވާތީއެވެ.
މިފަދަ ފާޅުކަން ބޮޑު މުނާފިގު ސިފަތަކަށްތުރެ ’އިސްލާމީ ނޭޓޯ‘ ގެ ތެރޭގައި ވަންހަނާވެފައިވާ ޒަޔަނިސްޓު ފިކުރު މާ ނުރައްކާތެރިއެވެ. ފާޅުގަ ޒަޔަނިޒަމާ ގުޅުމުން އާންމުންގެ ނުރުހުމާއި ދެކޮޅުވެރިކަން އަމާޒުވާނެއެވެ. ނަމަވެސް، ވަންހަނާވެގެން ތިބެ ޒަޔަނިސްޓުންނާ އެއްވެސް ދެކޮޅުވެރިކަމެއް އުފެދުމުގެ ފުރުސަތު ނުދީ، ހިމޭންކަމާއެކު މިފަދަ ހަރަކާތްތައް ނައްތާލާ ކަމެކެވެ. މިއީ އިސްތިއުމާރީ ގައުމުތަކުގެ އެޖެންޑާތައް ކުރިއަށް ގެންދިއުމަށްޓަކައި، މުސްލިމުންގެ މޫނާއި ސޫރަ ބޭނުންކުރުމެވެ.
މިސާލެއްގެ ގޮތުން އިމްރާން ޚާން ޖަލުގައި ހުންނެވި ނަމަވެސް، އޭނާއަކީ އަދިވެސް މި ނިޒާމަށް އޮތް ބޮޑު ގޮންޖެހުމަކަށް ވެފައިވަނީ މި ސަބަބަށްޓަކައެވެ. ފާޅުގައާއި، ސިއްރުގައި، ނުވަތަ ނުސީދާ ގޮތެއްގައި ވިޔަސް އިޒްރޭލާއެކު ގުޅުން ގާއިމުކުރުމަށް އޭނާ ދެކޮޅު ހެއްދެވުމަކީ، އިސްތިއުމާރީ ބާރުތަކުން ދުނިޔެ ހިންގުމަށް ގެންގުޅޭ ނިޒާމާ ޚިލާފު ކަމެކެވެ.
ފަލަސްތީނުގެ ހައްގުގައި އެއްވެސް ޝަރުތަކާ ނުލައި ސާބިތުވެ ހުރުމާއި، ކަޝްމީރާއި ގައްޒާގެ މައްސަލައަކީ ސިޔާސީ މަންފާ ހޯދުމަށް ބޭނުންކުރާ ވަސީލަތްތަކެއްގެ ބަދަލުގައި އެއީ އަނިޔާ ލިބެމުންދާ މުސްލިމުންގެ މައްސަލަތަކެއްގެ ގޮތުގައި އޭނާ ވަނީ ކަނޑައަޅުއްވާފައެވެ. މިއީ މުސްލިމު ގައުމުތަކުގެ ރައްޔަތުންނަކީ ރަމްޒީ ތަމްސީލު ތަކުން އަބަދުގެ އަބަދަށް ވައިވައްދާފަ ބޭތިއްބޭނެ ބައެއް ކަމަށް ދެކޭ ދެކުމަށް ކުރިމަތިވި ބޮޑު ބިރެކެވެ. އެހެންކަމުން، ޕާކިސްތާނުގެ ސިޔާސީ މައިދާނުގަ އިސްތިއުމާރީންނަށް ލެންބިގެންތިބި މީހުންނަށް ރިސްވަތުބަހާ، އޭނާ މަގާމުން ދުރުކުރެވުނީއެވެ.
މީގައި އޮތް އެންމެ ބޮޑު ހިތާމައަކީ ނުވަތަ މަލާމާތަކީ، އިސްލާމީ އަސްކަރީ އިއްތިހާދަކީ މުސްލިމުންގެ އެއްބައިވަންތަކަން ރަމްޒުކޮށްދޭ ބާރެއް ކަމަށް ދެއްކި ނަމަވެސް، މިއަދު މުސްލިމުން ވަނީ ދުވަހަކުވެސް ބަލިކަށި ނުވާ މިންވަރަށް އެތެރެއިން ގުޅިގެން ނިކަމެތިކޮށްފައެވެ.
މުސްލިމު ގައުމުތަކުން އެއްބަސްވެ އިންކާރު ކުރިނަމަ، ”ބޯޑް އޮފް ޕީސް“ ނަމުގައި ގާޒާގަ ހިންގާ މި އޮޅުވާލުންތައްވެސް ނިމުމަކަށް ގެނެވުނީހެވެ. ނަމަވެސް، އެ އިއްތިހާދުން އިޚްތިޔާރު ކުރީ އެކަމުގައި ބައިވެރިވުމެވެ. ނަސްލު ނައްތާލުމުގެ ލާއިންސާނީ ޖަރީމާތަކަށް ހަރުކަށި ފިޔަވަޅު އެޅުމުގެ ބަދަލުގައި، އެ މީހުން ފުއްދާލީ ހަމައެކަނި ބަޔާންތަކަކުންނެވެ. އަމިއްލަ ރައްޔިތުންނާއެކު ސާބިތުވެ ތިބުމުގެ ބަދަލުގައި، އެ މީހުން އިސްކަންދިނީ އިސްތިއުމާރީ ބާރުތަކުގެ ރުހުން ހޯދުމަށެވެ. އަދި އެއީ ’ހަރުދަނާ‘ ސިޔާސީ ނުވަތަ އިގްތިސާދީ ނިންމުމެއް ކަމަށް ދައްކައި، އެކަމަށް ތައުރީފު ހޯދުމަށް އެދި ފަޚުރުވެރިވިއެވެ
ކަން މިހެން އޮތްނަމަވެސް ދުނިޔޭގެ ތާރީޙަށް ބެލުމުން އިސްތިއުމާރީ ބާރުތަށް ތާއަބަދު ދެމިނުއޮންނަކަން އެގެއެވެ، ނަމަވެސް އެމީހުންގެ އާރާބާރު އަދި މުއްސަދި ކަމުގަ މަސްތުވެފަ ތިބޭއިރު މިކަން ނުދަނެތެވެ، ފިރުއައުނާއި އޭނާގެ ލަސްކަރު ފަނާވެ ނެތިދިޔަގޮތް މިސާލަކަށް ފުދެއެވެ، މިފަދަ އެތަށް މިސާލު އެހުރީ ފެންނާށެވެ.
ވީމާ މިއަދު މިވަނީ ހުޅަންގުގެ އިސްތިއުމާރާ ދެކޮޅަށް ރަސިޔާ، ޗައިނާ އަދި މުސްލިމުންގެ ތެރެއިން ބަޔަކު ގުޅިގެން އިތުރަށް ފަހަތަށް ނުޖެހޭނެކަމުގަ ބުނެ ތެދުވެފައެވެ، ހަނގުރާމަ ކުރަން ބޭނުންނަމަ ހަނގުރާމަ ކުރަންވެސް ތައްޔާރު ކަމުގަ އެމީހުން އެވަނީބުނެފައެވެ، ވީމާ މިއަދުމިހިގަނީ ދުނިޔޭގަ މިއޮތް ޝައިތާނީ ބާރު ވެއްޓި ނިމުމުގެ މަރުހަލާއެވެ، ދުނިޔެވީ ސަލާމަތަށްޓަކާ ވެސް އެމީހުނާ ދުރުވެ ވަކިވާންވީ ވަގުތެވެ. އޮއިވަރު ބަދަލުވެއްޖެއެވެ.
– މުހައްމަދު މުސްތާގު –
