ކާބޯތަކެތީގެ ޚިދުމަތްދޭ ތަންތަނުން ނަގަމުން އަންނަ ފީއާއި ކެޓަގަރީ ފީ، މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)އިން 50 އިންސައްތައަށް ކުޑަކޮށްފިއެވެ.

ކާބޯތަކެތީގެ ޚިދުމަތްދޭ ތަންތަނާއި ފަރާތްތައް ރަޖިސްޓަރީކޮށް، ލައިސަންސް ދޫކުރުމުގައި ޢަމަލުކުރާނެ ގޮތުގެ އިންތިޤާލީ އުސޫލުގެ ދަށުން، ކާބޯތަކެތީގެ ޚިދުމަތްދޭ ތަންތަން ރަޖިސްޓަރީކުރުމަށް ނަގަމުންދާ ރަޖިސްޓްރޭޝަން ފީއާއި ކެޓަގަރީ ފީ ކުޑަކުރުމަށް ނިންމާފައިވާކަމަށް އެ އޮތޯރިޓީން ވަނީ ބުނެފައެވެ.

އެ އޮތޯރިޓީން ބުނިގޮތުގައި ކާބޯތަކެތީގެ ޚިދުމަތްދޭ ތަންތަނުގެ ރަޖިސްޓްރޭޝަން ފީއާއި ކެޓަގަރީ ފީ 50 ޕަސެންޓަށް މިހާރު ވަނީ ކުޑަކޮށްދީފައެެވެ.  

މި އަގަށް ބަދަލު ގެނެސްފައި މި ވަނީ، މިއަދުން ފެށިގެން ދެ އަހަރު ދުވަހުގެ މުއްދަތަކަށް ކަމަށް އެމްއެފްޑީއޭއިން ބުނެއެވެ.