ހދ. ކުޅުދުއްފުށީ ރީޖަނަލް ހޮސްޕިޓަލްގައި ޕްރައިވެޓް ރޫމް، އައިސޮލޭޓް ކުރެވޭގޮތަށް ފެސިލިޓީއެއް އެޅުމަށް އަލްޓެކް މޯލްޑިވްސް ޕްރައިވެޓް ލިމިޓެޑްއާއި ހަވާލުކޮށްފިއެވެ.

ހެލްތު މިނިސްޓްރީގެ ފަރާތުން މި މަސައްކަތް އަލްޓެކް މޯލްޑިވްސްއާ ހަވާލުކޮށްފައި ވަނީ 53،560،648.01 ރުފިޔާ (ފަންސާސް ތިން މިލިޔަން ފައްސަތޭކަ ފަސްދޮޅަސް ހާސް ހަސަތޭކަ ސާޅީސް އަށް ރުފިޔާ އެއް ލާރި) އަށެވެ.

މި މަސައްކަތް ނިންމުމަށް ހަމަޖެހިފައި ވަނީ 435 ދުވަހުގެ ތެރޭގައެވެ.ހެލްތު މިނިސްޓްރީގެ ފަރާތުން އެއްބަސްވުމުގައި ސޮއި ކުރެއްވީ މިނިސްޓަރ އޮފް ސްޓޭޓް ފޮރ ހެލްތު ޚަދީޖާ ޢަބްދުއްޞަމަދު ޢަބްދުﷲ އަދި އަލްޓެކް މޯލްޑިވްސްގެ ފަރާތުން ސޮއި ކުރެއްވީ ޖެނެރަލް މެނޭޖަރ، ހުސައިން ތަސްމީން އެވެ.

މި މަސައްކަތަށް ފަންޑުކޮށްފައި ވަނީ އޭޝިއަން އިންފްރާސްޓްޗަރ އިންވެސްޓްމަންޓް ބޭންކް (އޭ.އައި.އައި.ބީ) އިންނެވެ.

ކުޅުދުއްފުށީ ސިޓީގައި ހުންނަ ހދ. ކުޅުދުއްފުށީ ރީޖަނަލް ހޮސްޕިޓަލަކީ ގްރޭޓަރ މާލެ ސަރަހައްދު ފިޔަވައި، ރާއްޖޭގައި އެންމެ ގިނައިން ބަލިމީހުންނަށް ހިދުމަތްދޭ ހޮސްޕިޓަލެވެ.