ޕާކިސްތާންގެ ކަރާޗީގެ ޝޮޕިންގ މޯލް އެއްގައި އަލިފާނުގެ ބޮޑުހާދިސާއެއް ހިނގުމުގެ ސަބަބުން ހަ މީހުން މަރުވެ އިތުރު ވިއްސަކަށް މީހުންނަށް އަނިޔާތައް ލިބިއްޖެއެވެ.

ވަރަށް ބައިބޯ ވިޔަފާރި މަރުކަޒެއް ކަމަށްވާ ގުލްޕްލާޒާ ޝޮޕިންގ މޯލްގެ ގްރައުންޑް ފްލޯގެ ފިހާރައެއްގައި ހޮނިހިރު ދުވަހުގެރޭ ރޯވި އަލިފާން، އެތައް ފިހާރަޔަކަށް ވަނީ ފެތުރިގެން ގޮސްފައެވެ. އަދި އާދީއްތަ ދުވަހަށް އަލިވިލުނު އިރު ކޮންޓްރޯލް ކުރެވިފައިވަނީ އަލިފާން ގަނޑުގެ 30 އިންސައްތަކަމަށް އޮފިޝަލުން ހާމަ ކޮށްފައި ވެއެވެ.

ސައުތު ޑެޕިއުޓީ އިންސްޕެކްޓަރ ޖެނެރަލް ވިދާޅުވީ މިހާދިސާގައި ތިންމީހުން މަރުވި ކަމަށް ފުރަތަމަ ރިޕޯޓް ކުރެވުނު ނަމަވެސް ފަހުން އިތުރު ދެމީހުން މަރުވެފައިވާކަން ހާމަވެ، އަދި ފިހިގެން ފަރުވާ ދެމުން ދިޔަ އިތުރު މީހަކު މަރުވެފައިވާ ކަމުގައެވެ.
އެހީގެ މަސައްކަތުގައި އުޅޭ ފަރާތްތަކުން މައުލޫމާތު ދީފައިވާ ގޮތުގައި ރޯވި ޝޮޕިނގ ކޮމްޕްލެކްސް ގައި 1،200 ފިހާރަ ހިމެނޭ އިރު މަރުވި ބައެއް މީހުން އަދިވެސް ނުފެނި ވުމަކީ އެކަށީގެންވާ ކަމެކެވެ. އަލިފާން ގަނޑު ފެތުރިގެން ދިޔަލެއް ބާރު ކަމުން އިމާރާތުގެ ބައެއް ވެއްޓިފައިވެސް ވެއެވެ.އެހެން ކަމުން މީހުން ސަލާމަތް ކުރުމުގެ މަސައްކަތަށް ވަނީ ހުރަސް އެޅިފައެވެ.
ފުލުހުން މައުލޫމާތު ދިން ގޮތުގައި ފުރަތަމަ ހޯދުންތަކުން ހީވާ ގޮތުގައި އަލިފާން ރޯވެފައިވަނީ ކަރަންޓް ޝޯޓް ސާކިޓަކުން ނެވެ.އަދި އެއްތަނުގައި ރޯވި ނަމަވެސް މުޅިކޮމްޕްލެކްސް އަށް އަލިފާން ފެތުރުނު ކަމަށް ބުނެފައިވެއެވެ. މީގެ އިތުރުން ރޯވި ހަގީގީ ސަބަބު އިނގޭނީ ތަފްސީލް ތަހުގީގްތަކަކަށް ފަހުގައި ކަމަށް ފުލުހުން ބުނެފައިވެއެވެ.
މިހާދިސާއާއި ގުޅިގެން ޕާކިސްތާންގެ ރައީސް އާސިފް އަލީ ޒަރްދާރީ އަދި ބޮޑުވަޒީރު ޝަހްބާޒް ޝަރީފް ވަނީ މަރުވި މީހުންގެ އާއިލާތަކަށް ތައުޒިޔާ ވިދާޅުވެފައެވެ.އަދި މީހުންނާ މުދާ ސަލާމަތް ކުރުމަށް ވެވެންހުރި ހުރިހާ ކަމެއް ކޮށް ދިނުމަށް އިދާރާތަކަށް އަންގަވާފައި ވެއެވެ.މީގެ އިތުރުން ގެއްލުން ލިބުނު ވިޔަފާރި ވެރިންނަށް އެހީތެރިވެދީ އަދި ފިހުނު މީހުންނަށް ފަރުވާ ލިބޭނެ ކަން ޔަގީން ކުރުމަށްވެސް ބޮޑުވަޒީރު އަންގަވާފައިވެއެވެ.