މުޅިދުނިޔެޔަށް މަޝްހޫރުވި ދުބާއީ ޗޮކްލެޓް ކުނާފާ އަށްފަހު ދެކުނު ކޮރެޔާގައިވެސް އެފަދަ ކެއުމުގެ ފޮނިބާވަތެއް އުފައްދައި އެއަށް މަގްބޫލްކަން ލިބެންފަށާފައިވާ ކަމަށް ޚަބަރުލިބެއެވެ.

ޕިސްތާޝިއޯ ކްރީމް އާއި ކުނާފާ ޕޭސްޓްރީ އެތެރެޔަށް އަޅައިގެން ދުބާއީގައި ފުރަތަމަ ތައްޔާރުކުރި ކުނާފާ ޗޮކްލެޓަކީ ގިނަ ބައެއްގެ މަގްބޫލުކަން އެއަށް ލިބިގެން ދިޔަ ބާވަތެކެވެ.

މިޗޮކްލެޓަށް ދުނިޔޭގައި އެހާ މަގްބޫލުކަން ލިބިފައިވުމާއި އެކު ދެކުނު ކޮރެޔާގައި އަލަށް އުފެއްދި ޑެސަރޓް“ ނުވަތަ ފޮނިކާއެތީގައިވެސް ބޮޑަށް ބޭނުން ކޮށްފައިވަނީ ޕިސްތާޝިއޯ އާއި ކޮކްލެޓް ކަމަށް ވެއެވެ.

މާޝްމެލޯ އެއްގެ ގޮތުގައި އިޝްތިހާރު ކުރިނަމަވެސް ރައިސް ކޭކް އަކާއި ބޮޑަށް ވައްތަރު ޗޮކްލެޓް މާޝްމެލޯގެ ތެރެޔަށް ޕިސްތާޝިއޯ ކްރީމް އާއި ކުނާފާ އަޅާފައިވާ ކަމަށް ވެއެވެ. މިބާވަތް ބާޒާރަށް ނިކުތުމާއިއެކު ދެކުނު ކޮރެޔާގައި ކުރިން މިބާތުގެ ތަކެތި ނުވިއްކާ ތަންތަނުންވެސް މިއައު ބާވަތް ވިއްކަމުން ދާކަމަށް ވެއެވެ.  އަދި ނެރޭތާ މަދު މިނިޓް ކޮޅެއްގެތެރޭ ވިކި ހުސްވާ ކަމަށް ވެއެވެ.

ދެކުނު ކޮރެޔާގައި މަޝްހޫރުވި މިއައު ޑެސަރަޓް ފުރަތަމަ އާންމުވީ މިދިޔަ އަހަރުގެ ސެޕްޓެމްބަރުމަހު ކަމަށް ވެއެވެ. އެއށްފަހު މަޝްހޫރު ބޭންޑެއްގެ މެމްބަރަކު އޭގެ ފޮޓޯ އެއް އާންމު ކުރުމާއި ގުޅިގެން އާންމުންގެ ސަމާލުކަން އައިސްފައިވެއެވެ.

މިވަގުތު މިއައު ކުނާފާ މާޝްމެލޯ ގެ އަގުހުރީ 5ހާސް ވޮން އާއި 10 ހާސް ވޮންއާއި ދެމެދުގައެވެ. (5ހާސް ވޮން އަކީ 3 ޔޫއެސް ޑޮލަރެވެ.) ނަމަވެސް ޑިމާންޑް އޮތްލެއް ބޮޑުކަމުން އަގު އަދި މައްޗަށް އަރާނެ ކަމަށް ދަނީ ބެލެމުންނެވެ.

ޑެސަރޓް ގެ ބާވަތްތައް ވިއްކާ ފިހާރަތަކާއި ރެސްޓޯރަންޓް ތަކުގެ އިތުރުން ސޫޝީ ވިއްކާ ބާ ތަކުންނާއި ނޫޑްލް ޝޮޕްތަކުންވެސް މިހާރު މިބާވަތް ލިބެން ހުން ކަމަށްވެއެވެ.

ލޯކަލް ކޮންވީނިއެންސް ސްޓޯ ޗެއިން ”ސީޔޫ“ އިން ނެރުނު މިއައު މާޝްމެލޯ ނެރުނުތާ މިވީ މުއްދަތުގައި 1.8 މިލިއަން އެތި ވިކިފައިވާކަމަށް ވެއެވެ. އެމީހުންގެ މަންދޫބަކު ބުނި ގޮތުގައި މިއައު ކޮކްލެޓްގެ ބާވަތަށް އޮތް ޑިމާންޑް، އުފައްދާ ޕްލާންޓް ގެ ކެޕޭސިޓީ އަށް ވުރެމާމައްޗެވެ. މިބާވަތަށް އޮތް ޑިމާންޑް ބޮޑުކަމުން އެކަކަށް އެންމެ ގިނައިން ގަނެވޭ ވަރުވެސް މިހާރު ބައެއް ތަންތަނުން ވަނީ ކަނޑައަޅާފައެވެ.