އީރާނުގައި ހިނގަމުން އަންނަ މުޒާހަރާތަކުގައި މަރުވި މީހުންގެ އަދަދު 65 އަށް އަރައިފިއެވެ.

2025 ވަނަ އަހަރުގެ ޑިސެމްބަރު މަހުގެ 28 ވަނަ ދުވަހުން ފެށިގެން އިރާނުގައި އެގައުމުގެ އާންމުން މަގުތަކަށް ނިކުމެ މުޒާހަރާތައް ފަށާފައި ވަނީ އެ ގައުމުގެ އިގްތިސާދު ދަށްވެ އިރާނުގެ ފައިސާގެ އަގު ދަށްވެފައި ވާތީއެވެ.

ސަރުކާރާ ދެކޮޅަށް ކުރަމުން އަންނަ މުޒާހަރާތައް ވަރުގަދަވެ ބައިގިނަވެފައި ވާއިރު އީރާނުގެ ހިއުމަން ރައިޓްސް އެކްޓިވިސްޓް ނިއުސް އެޖެންސީ (އެޗްއާރްއޭއެންއޭ) އިން ބުނި ގޮތުގައި އީރާނުގައި ހިނގި މުޒާހަރާތަކުގައި މަރުވި މީހުންގެ އަދަދު 65 އަށް ވަނީ އަރައިފި އެވެ.

އެ ޖަމާއަތުގެ ވެބްސައިޓުގައި ޝާއިއުކޮށްފައިވާ ރިޕޯޓުގައި ބުނެފައި ވަނީ މުޒާހަރާތައް ވިދިވިދިގެން 13 ދުވަސް ވަންދެން ކުރިއަށް ގެންގޮސްފައިވާއިރު 31 ޕްރޮވިންސްގެ 180 ސިޓީއެއްގައި 512 ތަނެއްގައި މުޒާހަރާ ކުރި ކަމަށެވެ.

އޭގެ ނަތީޖާއެއްގެ ގޮތުން މުޒާހަރާގެ 50 މީހުންނާއި ގާނޫނު ތަންފީޒުކުރާ އަދި ސަލާމަތީ ގޮތުން މަސައްކަތްކުރާ 14 އޮފިޝަލުންނާއި ސަރުކާރާ ގުޅުން ހުރި އާންމު މީހަކު މަރުވެފައިވާ ކަމަށް ބުނެފައިވެ އެވެ.

އަދި މުޒާހަރާތަކުގައި ބައެއް މީހުން ޒަޚަމްވެ 2،311 މީހުން ބަންދުކޮށްފައިވާ ކަމަށްވެސް ރިޕޯޓުތައް ބުނެއެވެ.

މަރުވި މީހުންނާއި ޒަޚަމްވި މީހުންނާ ބެހޭ ގޮތުން ކަމާބެހޭ ފަރާތްތަކުން މިހާތަނަށް އެއްޗެއް ބުނެފައެއް ނުވެއެވެ.