ވެނެޒުއޭލާގައި ނަގާތެލުގެ 50 މިލިއަން ފީފާއާއި ހަމަޔަށް އެމެރިކާ އަށް ލިބޭނެ ކަމަށް އެމެރިކާގެ ރައިސް ޑޮނަލްޑް ޓްރަމްޕް ވިދާޅުވެއްޖެއެވެ.

މިއީ 2.8ބިލިއަން ޑޮލަރުގެ ތެލެވެ. ސޯޝަލް މީޑިޔާ ޕްލެޓްފޯމް ޓުރުތު ސޯޝަލްގައި ލިއުއްވަމުން ޓްރަމްޕް ވިދާޅުވެފައިވަނީ މިގޮތުން އަތުލާ ތެޔޮ ސީދާ އެމެރިކާގެ ބަނދަރުތަކަށް ގެންގޮސް، ބާޒާރުގެ އަގުގައި ވިއްކައިގެން ލިބޭ ފައިސާ ވެނެޒުއޭލާގެ ރައްޔިތުންނާއި އެމެރިކާގެ މަންފާއަށް ބޭނުންކުރުމަށްޓަކައި، އެ ފައިސާގެ ކޮންޓްރޯލް އޭނާ ނަންގަވާނެ ކަމަށެވެ. މި މަޝްރޫޢު ”ވަގުތުން“ ތަންފީޒުކުރުމަށް އެމެރިކާގެ އެނާޖީ ސެކްރެޓަރީ ކްރިސް ރައިޓަށް އަންގަވާފައިވާކަން ވެސް އޭނާ ހާމަކުރެއްވިއެވެ. އަންގާރަ ދުވަހު ޓްރަމްޕް ވިދާޅުވީ މި ތެޔޮ ސްޓޯރޭޖް އުޅަނދުތަކުގައި ސީދާ އެމެރިކާގެ ބަނދަރުތަކަށް ގެންދެވޭނެ ކަމަށެވެ. ޓްރަމްޕްގެ ނިންމުން އިއުލާނު ކުރެއްވިއިރު، ވެނެޒުއޭލާގެ ތެލުގެ ރިޒާވް ގެމައްޗަށް އަތްގަދަކޮށް އެމެރިކާގެ ހީނަރުވެފައިވާ ހަކަތައިގެ ސިނާއަތް 18މަސްދުވަހުގެ ތެރޭގައި އަލުން ވަރުގަދަ ކުރައްވާނެ ކަމަށް ކުރިން ވަނީ ވިދާޅުވެފައެވެ. އަދި ވެނެޒުއޭލާގެ ބާވެފައިވާ އިންފްރާސްޓްރަކްޗަރ އަލުން ބިނާކުރުމަށްޓަކައި ވެސް ބޮޑެތި އިންވެސްޓަރުން އެމެރިކާ އަށް ލިބޭނެ ކަމަށް ޓްރަމްޕް ވިދާޅުވެފައި ވެއެވެ. ނަމަވެސް މިކަމަށް އެތައް މިލިއަން ޑޮލަރު ޚަރަދުވާނެ ކަމަށް އެނަލިސްޓުން ވަނީ ބުނެފައެވެ. އެމެރިކާގެ އެންމެ ބޮޑު ތިން ތެޔޮ ކުންފުނިން މިކަމާ ގުޅޭގޮތުން ސީދާ ވަކި އެއްޗެއް ބުނެފައި ނުވިނަމަވެސް މި ކުންފުނިތަކުގެ މަންދޫބުން ވެނެޒުއޭލާގެ މައްސަލައާއި ގުޅޭގޮތުން މަޝްވަރާކުރުމަށް އަންނަ ހުކުރު ދުވަހު ރައީސް ޓްރަމްޕާ ބައްދަލުކުރުމަށް ވަނީ ހަމަޖެހިފަ އެވެ.ވެނެޒުއެލާގައި އުފައްދާތެލުގެ 50 މިލިއަން ފީފާ ތެޔޮ އެމެރިކާ އަށް ލިބޭނެކަން ޓްރަމްޕް އިއުލާން ކުރައްވާފައިވަނީ ކުރީގެ ނާއިބް ރައީސް ޑެލްސީ ރޮޑްރިގޭސް ރައީސް ކަމުގެ ހުވާކުރެއްވިތާ އެއްދުވަސް ފަހުންނެވެ. އެކަމަނާ އަކީ އެމެރިކާ އަށް މަދަދުވެރިވާ ފަރާތެއް ކަމަށް ތުހުމަތު ކުރެވިފައެވެ. 

މި މަހުގެ ތިންވަނަ ދުވަހުގެރޭ އެމެރިކާސިފައިން ވެނެޒުއެލާއަށް ދިން ކުއްލި އަސްކަރީ ހަމަލާއަކަށްފަހު ވަނީ ރައީސް ނިކޮލަސް މަދޫރޯ އާއި އަނބިކަނބަލުން ސީލިޔާ ގަދަ ބާރުން އެމެރިކާ އަށް ގެންގޮސްފައެވެ. އަދި އެދެކަނބަލުންގެ މައްޗަށް ވަނީ މަސްތުވާއެއްޗެތީގެ ވިޔަފާރި ފުޅާދާއިރާއެއްގައި ކުރައްވާ ކަމުގެ ތުހުމަތުގައި ދައުވާ އުފުލާފައެވެ.