ރާއްޖޭގައި ގަވައިދާ ޚިލާފަށް އުޅެމުންދާ ބިދޭސީން ދެނެގަތުމަށް ހިންގަމުންދާ އޮޕަރޭޝަނުގެ ދަށުން މިއަދު 2 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.

އިމިގްރޭޝަނުން މަޢުލޫމާތު ދިންގޮތުގައި، މިއަދު ކުރިއަށްދިޔަ އޮޕަރޭޝަނުގައި ވަނީ މާލޭގެ 8 ތަނެއް ބަލައިފާސްކޮށް، ވިޔަފާރިކުރަމުންދިޔަ 2 ތަނެއް ބަންދުކޮށްފައެވެ.

ގަވައިދާ ޚިލާފަށް ރާއްޖޭގައި ދިރިއުޅެ، އަދި އެކި މަސައްކަތްތައް ހުއްދަނެތި ކުރަމުންދާ ބިދޭސީން ދެނެގަނެ ފިޔަވަޅު އެޅުމަށް އިމިގްރޭޝަނުން ދަނީ ވޭތުވެދިޔަ ދެ އަހަރެއްހާ ދުވަހުގެ ތެރޭގައި މެދުކެނޑުމެއްނެތި އެކި އޮޕަރޭޝަންތައް ހިންގަމުންނެވެ.

މިގޮތުން އަތުލައިގެންފައިވާ ބިދޭސީންގެ ތެރޭން އެންމެ ފާހަގަކޮށްލެވެނީ މުޑުދާރުކޮށް ކާތަކެތި ތައްޔާރުކޮށް ވިއްކަމުންދާ ފަރާތްތަކެވެ.

އެފަދަ ދެ ތަނެއް ފާއިތުވި ދެ ހަފުތާއެއްހާ ދުވަހުގެ ތެރޭގައިވެސް ވަނީ ހޯދައި، ބިދޭސީންތަކެއް އިމިގްރޭޝަންގެ ބެލުމުގެ ދަށަށް ގެންގޮސްފައެވެ.