ސަޢޫދީ އާއި ޤަތަރާ ދެމެދު ހައި ސްޕީޑް ރޭލުން ގުޅާލަން އެއްބަސްވުމެއްގައި ސޮއިކޮށްފިއެވެ.

ސައުދީގެ ރަސްމީ މީޑިއާގައި ހޯމަ ދުވަހު ނެރުނު ބަޔާނެއްގައި ބުނެފައިވާ ގޮތުގައި ”ހައިސްޕީޑް އިލެކްޓްރިކް ޕެސެންޖަރ ރޭލްވޭ“ އިން ރިޔާޒުގެ ކިންގް ސަލްމާން އިންޓަނޭޝަނަލް އެއާޕޯޓާއި ދޯހާގެ ހަމަދު އިންޓަނޭޝަނަލް އެއާޕޯޓާ ގުޅުވައިދޭނެ ކަމަށެވެ.

މީޑިއާ ރިޕޯޓުތައް ބުނާގޮތުން ސައުދީގެ އަލް ހޮފޫފް އާއި ދައްމާމް ވެސް މި ނެޓްވޯކްގައި ހިމެނޭނެއެވެ. އެ ރޭލު ގަޑިއަކު 300 ކިލޯމީޓަރަށް ވުރެ ބާރު މިނުގައި ދަތުރު ކުރާއިރު، ދެ ވެރިރަށް ދެމެދު ދަތުރު ކުރުމަށް ގާތްގަނޑަކަށް ދެ ގަޑިއިރު ހޭދަވާނެ އެވެ. މި މަޝްރޫއުގެ ސަބަބުން އަހަރަކު 10 މިލިއަން ފަސިންޖަރުންނަށް ހިދުމަތް ލިބި، ދެ ގައުމުގައި 30،000 ވަޒީފާ އުފެދިގެންދާނެ ކަމަށް އެ ބަޔާނުގައި ބުނެފައިވެއެވެ.

މި އެއްބަސްވުމުގައި ސޮއި ކުރެއްވީ ގަތަރުގެ އަމީރު ޝެއިޚް ތަމީމް ބިން ހަމަދު އަލް ޘާނީ އާއި ސައުދީ ވަލީއަހުދު މުހައްމަދު ބިން ސަލްމާންއެވެ.

ހަ އަހަރު ދުވަހުގެ ތެރޭގައި ނިންމުމަށް ހަމަޖެހިފައިވާ މި މަޝްރޫއަކީ ގަލްފުގެ ދެ ގައުމު ގުޅިގެން ކުރިއަށް ގެންދާ މިފަދަ ފުރަތަމަ މަޝްރޫއެވެ.