ދެކުނު އެފްރިކާގެ ވެރިރަށް ޖޯހަނަސްބާރގް ގައި ފެށި ޖީ-20 ގައުމުތަކުގެ އެންމެ އިސްވެރިންގެ ސަމިޓަށް އެމެރިކާގެ ރައީސް ވަޑައިނުގަންނަވާގޮތަށް ވަނީ ނިންމަވާފައެވެ.

ނަތީޖާއަކަށް ވެގެން މިދިޔައީ އެ ސަމިޓްގެ ހުރިހާ މޮޅަކާއި ކާމިޔާބެއް ޗައިނާއަށް ލިބިގެން ދިއުމެވެ.
2 ދުވަހުގެ މުއްދަތަށް ޖޯހަނަސްބާރގް ގައި ބޭއްވޭ ޖީ-20 ގެ ސަމިޓްގައި ރައީސް ޓްރަމްޕް ބައިވެރިވެ ވަޑައި ނުގަންނަވާ ސަބަބެއްކަމުގައި ހާމަކުރައްވާފައިވަނީ 1991 ވަނައަހަރާ ހަމަޔަށް އެ ގައުމުގެ ބައިމަދު ދޮންމީހުން ކުރި ވެރިކަން ނިމުމަކަށް ގެނެސް މިއަދު ކަޅު ނަސްލުގެ އަޣްލަބިއްޔަތުން ވެރިކަން ކުރާއިރު ބައިމަދު ދޮންމީހުންގެ ހައްގުތައް ފުރިހަމައަށް ރައްކާތެރި ނުކުރުން ކަމަށް ބުނެފައިވެއެވެ.

މާޒީވެ ދިޔަ ދިގު ޒމާނުގައި ދޮންމީހުން ދެކުނު އެފްރިކާގައި ވެރިކަން ކުރިއިރު ގައުމުގެ އަސްލު ވަޒަންވެރިން ތިބީ ހުރަގެއެއްގައި ބަންދުކޮށްފައިކަން ރައީސް ޓްރަމްޕް ހަނދާނުން ފޮހެވިގެން ހިނގައްޖެއެވެ.
ރައީސް ޓްރަމްޕް ވިދާޅުވެފައިވަނީ ދެކުނު އެފްރިކާގެ ޖޯހަނަސްބާރގް ގައި ޖީ-20 ގެ ސަމިޓް ބޭއްވުމަކީ އިންސާނިއްޔަތަށް ފުރައްސާރަކުރުން ކަމަށެވެ. ރައީސް ޓްރަމްޕްގެ ބޯއިކޮޓް ކުރުމުގެ ސިޔާސަތު ދެކުނު އެފްރިކާގެ މައްޗަށް ނުހިނގާނެ ކަމަށާއި އެމެރިކާ، ދުނިޔޭގެ އެންމެ ބޮޑު އިގްތިސާދުގެ ހައިސިއްޔަތުން ކަންތައް ކުރަންޖެހޭނެގޮތްވެސް ނޭންގޭ ޖާހިލެއްކަން ދޭހަވާ މޭރުމަކުން ދެކުނު އެފްރިކާގެ ރައީސް ސިރިލް ރާމަފޯސާ ވަނީ ރައްދު ދެއްވާފައެވެ.
ކަންތައް މިހިސާބަށް ގޮސްފައިވަނިކޮށް ޖީ-20 ސަމިޓުގައި ބައިވެރިވުމަށް އެމެރިކާއިންވެސް ދެކުނު އެފްރިކާއަށް ވަފުދެއް ފޮނުވަން ރައީސް ޓްރަމްޕް ނިންމެވި ޚަބަރެއް މިދިޔަ ހުކުރު ދުވަހު މީޑިއާތަކުގައި އާންމެވެގެން ހިނގައްޖެއެވެ. މިހާރަކަށް އައިސް ގޮތް ދޫ ނުކުރުމެތެރޭގައި ހެދޭ ނުހެދޭއެއް ނޭންގި ބައިނަލް އަގްވާމީ ދުނިޔެއިން ޗައިނާއަށް އެމެރިކާއިން މަގުފަހިކޮށްދެނީ ކަމަށްބުނެ ބަކްނެލް ޔުނިވަރސިޓީގެ ޕޮލިޓިކަލް ސައިންސާއި އިންޓަރނޭޝަނަލް ރިލޭޝަންސްގެ ޕްރޮފެސަރ ޒިގުން ޒޫ، އަލްޖަޒީރާއަށް މައުލޫމާތު އޮޅުންފިލުވާ ދީފައި ވެއެވެ. އަދި އެމެރިކާއިން އެފަދަ މުހިންމު ބައްދަލުވުންތައް ބޯއިކޮޓް ކުރުމުން ޗައިނާއާއި ޔޫރަޕިއަން ޔޫނިއަނަށް އިތުރު ފުރުސަތު ހުޅުވިގެންދާނެއެވެ. އެހެންނަމަވެސް ބައެއް އޮބްޒާރވަރުން ދެކޭގޮތުގައި ރައީސް ޓްރަމްޕް ބައިވެރިވެ ވަޑައިނުގަތުމުން މައިގަނޑުގޮތެއްގައި ޗައިނާއަށް ފޯކަސް އަމާޒުކުރެވިގެން ދިޔަސް މުޅި މަންޒަރުން ރައީސް ޓްރަމްޕް ބޭރުވެގެން ނުދާނެއެވެ. އިނގިރޭސި ވިލާތުގެ އިންސްޓިޓިއުޓް އޮފް ޑިވެލޮޕްމެންޓް ސްޓަޑީޒްގެ ޕޮލިޓިކަލް އަދި އިކޮނޮމިސްޓް ޖިންގް ގޫ ވެސް ވަނީ ހަމަމިމޭރުމުން އެކަމަނާގެ ރައުޔު ހާމަކޮށްފައެވެ. އަދި އެމެރިކާއިން މިގޮތަށް ގްލޯބަލް ހިއްސާ ތަކުން އެއްފަރާތްވުމުން ޗައިނާއަށް ފުރުސަތު ހުޅުވިގެންދާނެކަމަށާއި ޗައިނާއިން އެ ފުރުސަތުގެ ބޭނުން އެންމެ މަތީ ދަރަޖައަށް ހިފަމުންގެންދާނެކަމަށްވެސް އެކަމަނާގެ ރައުޔުގައި ބުނެފައި ވެއެވެ.
ޗައިނާއިން ގްރީން އެނަރޖީގައި ވަރަށް އިސް ދައުރެއް އަދާކުރަމުން ގެންދިއުމާއެކު އެފްރިކާގެ ގައުމުތަކާއެކު ރަނަގަޅުގުޅުމެއް ޗައިނާ އުފައްދާނެކަމަށް ބެލެވޭ ކަމުގައިވެސް ޒޫ ބުނެފައި ވެއެވެ.
ޖީ-20 ގެ ބައްދަލުވުމުގައި ޗައިނާއިން ބައިވެރިވާ ވަފުދުގައި އިސްކޮށްހުންނަވާނީ އެ ގައުމުގެ ޕްރިމިއަރ ލީ ގިއާންގް އެވެ. ފަހަކަށް އައިސް އުމުރުން 72 އަހަރުގެ ރައީސް ޝީ ޖީންޕިން ގެންދަވަނީ ބޭރުގައުމުތަކުގެ އިސް ބައްދަލުކުރެއްވުންތަކުގައި އެމަނިކުފާނުގެ ބަދަލުގައި ޗައިނާގެ އެންމެ އިސް ވެރިންނަށް ފުރުސަތު ދެއްވަމުންނެވެ.
މިއަހަރުގެ ޖީ-20 ސަމިޓަކީ އެފްރިކާ ބައްރުގައި ބޭއްވޭ ފުރަތަމަ ބައްދަލުކުރުމެވެ. މިފަހަރުގެ ބައްދަލުކުރުމުގައި އެފްރިކަން ޔޫނިއަނުން ފުރިހަމަ މެންބަރެއްގެ ގޮތުގައި ބައިވެރިވާނެއެވެ. ދެކުނު އެފްރިކާއިން ރިޔާސަތު ބަލަހައްޓާ މި ދައުރުގައި އެފްރިކާއަށް ދިމާވެފައިވާ މޫސުމަށް އަންނަ ބަދަލުތަކުން ލިބޭ ގެއްލުމަށް ހައްލެއް ހޯދުމަށާއި އަދި ގައުމުތައް ދަރަނިވެރިވަމުން ދިއްމަށް ލުޔެއް ހޯދަން ބާރު އަޅާނެއެވެ.
އެފްރިކާގެ ގައުމުތަކަށް ތަފާތު މައުދަނާއި ރަންރިހީގެ މުއްސަނދިކަން ލިބިފައިވާއިރު ބައެއް ގައުމުތައް އަންނަނީ ވަރަށް ބާރު ދުވެއްޔެއްގައި ތަރައްގީގެ ހަރުފަތްތައް ގިރާކުރާމުންނެވެ. މި ތަރައްގީ އާއިގެން ކުރިއަށް ދިއުމުގައި ޗައިނާފަދަ އިގްތިސާދީގޮތުން ބާރުގަދަ ގައުމަކާއެކު ކުރިއަށް ދިއުމަށް ބޭނުންވާނެއެވެ. ޗައިނާގެ ޕްރިމިއަރ ލީ ގިއާންގް ވަނީ މިހަފުތާގައި ޒެމްބިއާއަށްވެސް ވަޑައިގެންފައެވެ. ޒެމްބިއާއަކީ މިހާރުވެސް ޗައިނާއާއެކު 5.7 ބިލިއަން އެމެރިކާ ޑޮލަރުގެ ވިޔަފާރި ބައިވެރިއެކެވެ. މީގެ 28 އަހަރު ކުރިން ޒެމްބިއާއާއި ޓެންޒޭނިއާ ގުޅުވާދޭން އަޅާފައިވާ ރެއިލްވޭ ބާވެފައިވުމުގެ ސަބަބުން 1.4 ބިލިއަން އެމެރިކާ ޑޮލަރުގެ މަޝްރޫއެއްގެ ދަށުން އެ ރެއިލްވޭ އަލުން އާކޮށް އެއްގަމާއި ކަނޑުމަގުން އެ ދެ ގައުމު ގުޅާލުމަށް މިދިޔަ ސެޕްޓެމްބަރ މަހުގެ ތެރޭގައި ޗައިނާއާއެކު ވަނީ އެއްބަސްވެފައެވެ.