ދެކުނު ޔޫކްރެއިންގެ އޮޑިއްސާ ސަރަހައްދުން އެމެރިކާގެ ލިކްވިފައިޑް ގޭސް ޔޫކްރެއިނަށް އެތެރެ ކުރުމުގެ އެއްބަސްވުމުގައި ރައީސް ޒެލެންސްކީ ސޮއިކުރެއްވިތާ އެއްދުވަސްފަހުން އެ ބަނދަރުގައި އޮތް ތުރުކީއަށް ނިސްބަތްކުރެވޭ ޓޭންކަރަކަށް ރަޝިޔާއިން ޑްރޯން ހަމަލާއެއްދީ ރޯކޮށްލައިފިއެވެ.

ރަޝިޔާއިން ހަމަލާދިންއިރު އެ ޓޭންކަރ އެމް. ޓީ. އޮރިންދާއިން ގެންދިޔައީ ދެކުނު ޔޫކްރެއިންގެ އޮޑިއްސާ ސަރަހައްދުގެ އިޒްމައިލް ބަނދަރުގައި ލިކްވިފައިޑް ޕެޓްރޯލިއަމް ގޭސް ހުސްކުރަމުންނެވެ. މި ހަމަލާގައި ބޯޓުގެ އެއްވެސް ފަޅުވެރިއަކަށް ހާނީއްކައެއް ނުލިބޭ ކަމަށް ޚަބަރުތަކުގައި ބުނެފައި ވެއެވެ. މީގެ ކުރިންވެސް ރަޝިޔާއިން ވަނީ ޑްރޯނާއި މިސައިލުން ހަމަލާދީ އޮޑިއްސާ ސަރަހައްދުގެ ބްލެކްސީއަށް ވީ ފަރާތުގެ ބަނދަރު ސަރަހައްދަށް ބޮޑެތި ގެއްލުންތަކެއް ދީފައެވެ.

މި ހަމަލާއާއި ގުޅޭގޮތުން ޔޫކްރެއިން ސަރުކާރުން ނުވަތަ ރަޝިޔާއިން މިހާތަނަށް ވާހަކަ ދައްކާފައެއް ނުވެއެވެ. އެހެންނަމަވެސް މިދިޔަ ހޯމަދުވަހުގެ ރޭ އޮޑިއްސާ ބަނދަރު ސަރަހައްދުގެ ރަށްތަކަށާއި ހަކަތައިގެ ވަސީލަތްތަކަށް ރަޝިޔާއިން ހަމަލާދީ ބޮޑެތި ގެއްލުންތަކެއް ދީފައިވާކަމަށް އޮޑިއްސާގެ މިލިޓްރީ އެޑްމިނިސްޓްރޭޝަންގެ އެންމެ އިސްވެރިޔާ އޯލެހް ކިޕަރ ވަނީ މީޑިއާތަކަށް މައުލޫމާތު ދީފައެވެ. ރަޝިޔާގެ ޑްރޯން ހަމަލާގެ ސަބަބުން ރޯވި އަލިފާންގނޑުގައި އަމިއްލަ މީސްމީހުންގެ އުޅަނދުފަހަރަށްވެސް ބޮޑެތި ގެއްލުންތަކެއް ވަނީ ލިބިފައިކަމަށްވެސް އޭނާ ކިޔާދީފައި ވެއެވެ. އިޒްމައިލް އަކީ ޔޫކްރެއިންގެ އެކްސްޕޯރޓަށް ވަރަށް މުހިންމު ބަނދަރެކެވެ.
ރަޝިޔާގެ ހަމަޅާތައް ޔޫކްރެއިންގެ ހަކަތައިގެ ވަސީލަތްތަލަށް އަމާޒުކުރަމުންގެންދާތީވެ، މިއަންނަ ފިނި މޫސުމުގެ ފިނކަމުން ސަލާމަތް ވުމަށްޓަކައި ލިކްވިފައިޑް ޕެޓްރޯލިއަމް ގޭސް އިމްޕޯރޓް ކުރަން ޔޫކްރެއިނުން ބޭނުންވެއެވެ. ގޭސް އިމްޕޯރޓް ހުއްޓުވަން ރަޝިޔާއިން ހަމަލާދެމުން ގެންދާނަމަ ފިނިމޫސުމުގައި ޔޫކްރެއިނުގެ ރައްޔިތުން ވަރަށް ބޮޑު ހިތްދަތިކަމެއް އުފުލަން ޖެހޭނެއެވެ. މިދިޔަ ހޯމަދުވަހުގެ ހަމަލާދިންއިރު ރައީސް ޒެލެންސްކީ ހުންނެވީ ރަސްމީ ދަތުރުފުޅެއްގައި ގްރީކުގައެވެ. އެމަނިކުފާނުގެ ދަތުރުފުޅަކީ އެމެރިކާގެ ލިކުވިފައިޑް ޕެޓްރޯލިއަމް ގޭސް ގްރީކުގެ އުތުރު ސަރަހައްދުގެ އެލެގްޒެންޑްރޯޕޮލިސް ބަނދަރުގައި އަޅާފައި އޮންނަ ޕައިޕްލައިނުން އޮޑެއްސާއަށް ގެނައުމުގެ އިންތިޒާމްތައް ހަމަޖެއްސެވުމަށްޓަކައި ކުރައްވާ ދަރުތުފުޅެކެވެ. ޚަބަރުތަކުން އެނގޭގޮތުގައި މިއަންނަ ޖެނުއަރީންފެށިގެން އެ ޕައިޕްލައިނުން އޮޑެއްސާގެ ބަނދަރަށް ގޭސް ފޯރުކޮށްދޭން ފަށާނެއެވެ.
ރަޝިޔާގެ ހަމަލާތަކާ ގުޅިގެން އިޒްމައިލް ބަނދަރާ އިންވެގެން އޮންނަ ރޮމޭނިއާގެ 2 އަވަށަކުން މީހުންނާއި ޖަނަވާރު ރައްކާތެރި ހިސާބުތަކަށް ގެންދިއުމުގެ މަސައްކަތް އެ ގައުމުން ފަށައިފިއެވެ.
ރަޝިޔާގެ ހަމަލާތަކުގައި ޔޫކްރެއިނަށް ބޮޑެތި ގެއްލުންތަކެއް ލިބެމުންދާއިރު ޔޫކްރެއިންގެ އެތެރޭގައި ހިނަގަމުންގެންދާ ޚިޔާނާތާއި ކޮރަޕްޝަންގެ މައްސަލަތައްވެސް ވަނީ ހައްދުންނައްޓާލާ ފައެވެ. އެ މައްސަލަތައް ތަހްގީގު ކުރެވެމުންދާއިރު ރައީސް ޒެލެންސްކީގެ އަރިސް ބޭފުޅުންވެސް ޝާމިލް ވުފައިވާކަމާއި މިހާތަނަށް ހޯދިފައިވާ 100 މިލިއަން އެމެރިކާ ޑޮލަރުގެ ހަކަތައާބެހޭ ޚިޔާނާތުގައި އެބޭފުޅުންނަށްގެ ބައިވެރިވުން އޮތް ކަންވެސް އެނގިފައިވެއެވެ.

ތުރުކީގައި ބޭއްވެމުންދިޔަ ޔޫކްރެއިން ހަނގުރާމަހުއްޓުވުމާބެހޭ މަޝްވަރާތައް ހުއްޓިފައި އޮތުމަށްފަހު މިއަންނަ ބުދަދުވަހު އެވާހަކަތައް އަލުން ފެށުމަށްޓަކައި ރައީސް ޒެލެންސްކީ ތުރުކީއަށް ވަޑައިގަންނަވާނެކަން އިއުލާންކުރައްވައިފިއެވެ. ހަނގުރާމަހުއްޓުވުމުގެ މަޝްވަރާތައް އެކުވެރިގައުމުތަކާއެކުވެސް ވަނީ ކުރެވިފައި ކަމަށާއި ހަނގުރާމަ ނިމުމަކަށް ގެނައުމަށްޓަކައި ޔޫކްރެއިނުން ކުރެވެން އޮތް ހުރިހާ މަސައްކަތެއް ކުރައްވަން ގަސްދުކުރައްވާކަން އެ މަނިކުފާނުގެ ވާހަކަފުޚުގައި ވިދާޅުވިއެވެ. އަދި ހަނގުރާމައިގެ އަސީރުން ބަދަލުކުރުމަށްވެސް ވަނީ މިހާރު ކްރެމްލިންއާއެކު އެއްބަސްވުމަކަށް އާދެވިފައިވާ ކަމަށް ވިދާޅުވިއެވެ.