ޗައިނާގެ ހައި-ސްޕީޑް ރޭލުދަތުރުތައް ގަޑިއަކު 350 ކިލޯމީޓަރގެ ދުވެލީގައި ސާޅީސް ހާސް ކިލޯމީޓަރގެ ސަރަހައްދެއް ފަހާފޮށްޓަކުން ރޮއްޖެއް ޖަހާލާފަދައިން ގުޅާލައިފިއެވެ. އޭގެ ސަބަބުން މަތިންދާ ބޯޓުގައި ކުރާ ކުރު ދަތުރުތައް ގެއްލުމާ ކުރިމަތިލާންވެސް މިވަނީ ޖެހިފައެވެ. ހަމައެކަނި މޮޅު އިޝްތިހާރުތަކަކުން ނޫނެވެ.

މަތިންދާބޯޓުން ފައިހަމަނުކުރެވޭނެ ވަގުތާއި ދުވެލީގައި ކުރު ރާސްތާތަކުގެ ދަތުރުތައް ފުރިހަމަ ކޮށް ހަގީގަތުގައިވެސް ނިންމާލެވޭތީއެވެ.
ދާދިފަހަކާ ޖެހެންދެންވެސް އެއަރޕޯރޓް ޗެކިންއަށް ދެ-ތިން ގަޑިއުރު ކުރިންގޮސް ކިޔޫގައި ޖެހި ފްލައިޓްގައި ގަޑިއެއްހާއިރުން ކަޑައްތު ކޮށްލެވޭ ދަތުރުތައް މިއަދު ލަންޑަންގައި ކުރެވޭ ހައި-ސްޕީޑް ރޭލު ދަތުރުތަކުގައި ހަމަޖެހިލައިގެންތިބެ ރަށްބޭރުން ގަޑިއަކު ތިންސަތޭކަ ކިލޯމީޓަރަށް ވުރެން ބާރު ދުވެލީގައި ދަތުރުކުރަމުން މަންޒިލަކަށްފަހު މަންޒިލެއް ކަޑައްތުކުރަމުން މިދަނީ ހުވަފެނީ އާލަމެއްގައިހެން ހީވެއެވެ. މަތިންދާ ބޯޓުގެ ދުވެލި ޖައްވުތެރޭގައި ބާރުވެދާނެއެވެ. އެކަމަކު ބިންމަތީގައި ދަތުރުވެރިން ބޭނުންވާ މަގްސަދު ހާސިލުކޮށްދިނުމުގައި ރޭލު ދަތުރުތައް މިވަނީ ކާމިޔާބު ހޯދާފައެވެ.
މިސާލެއްގެގޮތުން ބެއިޖިންގުން ޝެންހާއިއަށް ކުރެވޭ 1300 ކިލޯމީޓަރުގެ ދަތުރަށް ބަލާލުން ރަނގަޅުވާނެއެވެ. ހަތަރު ގަޑިއިރުގެ ރޭލު ދަތުރެކެވެ. މަތިންދާ ބޯޓުގައި އެ ދަތުރުކުރުމަށް 2 ގަޑިއިރު ކުރިން އެއަރޕޯރޓަސް ދާން ޖެހެއެވެ. ޗެކިން އިން ކުރުމުގެ ކިއޫގައި ހޭދަވާނެ ވަގުތު އަދި ސެކިއުރިޓީ ޗެކް ކުރުމުގެ އުދަނގޫ އުފުލަން ހޭދަކުރަން ޖެހޭނެ ވަގުތު އަންދާޒާ ކުރާކަށްވެސް ނޭގެއެވެ. ފްލައިޓަށް އެރުމަށްޓަކައި ކުރަނަޖެހޭ އިންތިޒާރުގެ ދިގުމިނަށް ފްލައިޓް ވަގުތަށް ފުރުމާއި ނުފުރުން އިތުރުކުރަން ޖެހޭނެއެވެ. އެއަށްފަހު މަންޒިލަށް ދެވުމުން ޗެކް އައުޓް ކުރުމާއި ޓެކްސީއެއްގައި ސިޓީ ސެންޓަރަށް ކުރަންޖެހޭ ދަތުރުގެ ވަގުތުވެސް ގުނާލަން ޖެހޭނެއެވެ.
ރޭލު ދަތުރުތަކުން ދަތުރުވެރިންޖީބަށް ލިބޭ ލުއި ހިސާބު ހަދާލާއިރު ސަލާމަތްކުރެވޭ ވަގުތުގެ އަގުވެސް ހިމަނާލަން ޖެހޭނެއެވެ. ރޭލުދަތުރުތަކުގެ ދަތުރުތައް އޮތީ %95 ގަޑިއަށް ފަށާ އަދި ނިންމާކަން ސާބިތުކޮށްދީފައެވެ. މަތިންދާ ބޯޓުގެ ދަތުރުތަކަށްވުރެން ރޭލުދަތުރުތަކަށް މޫސުމުގެ އުދަނގޫ ކުރިމަތި ވުމާއި ޖައްވުތެރޭގެ ނުރައްކާތެރި ހާދިސާތައް މެދުވެރިވުން ދުރުކަމަށްވެސް ބެލެވެއެވެ. ލަގެޖްގެ އިންތިޒާރުގައި ބެލްޓް ކައިރީގައި ހުރުމާއި ކަސްޓަމްސް އިން ކޮށްފާނެ އުދަނގުލަކަށްވެސް ވިސްނާލަން ޖެހޭނެއެވެ. އަދި ޓިކެޓް ތަކުގެ އަގުވެސް އާންމުގޮތެއްގައި ކޮންމެވެސް މިންވަރަކަށް އަގު ހެޔޮ ކަންވެސް ގަބޫލުކުރެވެއެވެ.
މިއަދު ޗައިނާއިން ހައި-ސްޕީޑް ރޭލުދަތުރު ތައާރުފް ކޮށްފައިވާއިރު މާދަމާގެ ދުނިޔޭގައި ހައ-ސްޕީޑް ރޭލުދަތުރުތައް އެހެންގައުމުތަކުގައިވެސް އާންމުވެގެންދާނެއެވެ. ދުނިޔޭގައި އެންމެ ބާރަށް ކުރިއަރަމުންދާދާއިރާއަކީ ދަތުރުފަތުރު ކުރުން ކަމުގައި މިއޮތީ ވެފައެވެ. ދަތުރުފަތުރު ކުރުމާއި ތަރައްގީ ގުޅި ލާމެހިފައި މިއޮތީ އަލުން ވަކި ނުކުރެވޭނެ މިނަވަރަށެވެ.
މިހުރިހާކަމަކަށް ބަލާއިރު ކައިރި މުސްތަގްބަލެއްގައި މަތިންދާބޯޓުން ކުރާ ކުރު ދަތުރުތަކަށް މާރކެޓް ހޯދުމަށް ގޮންޖެހުންތަކަކާ ކުރިމަތިލާން ޖެހޭނެކަމަށް ދަތުރުފަތުރާ ބެހޭ ތަޖްރިބާކާރުން މިހާރުވެސް އިންޒާރުދޭން ފަށައިފިއެވެ.