ސުރުޚީގައި ބުނެފައިވާ ނަތަންޔާހޫގެ ސްޓޭޓްމެންޓަށް ޖަވާބު ދިނުމުގެ ގޮތުން މިހާރު އެ ގައުމަށް ވަޑައިގެން އުޅުއްވާ އެމެރިކާގެ ނައިބު ރައީސް ޖޭ ޑީ ވޭންސް ވިދާޅުވެފައިވަނީ “ އަހަރެމެން އެގޮތް ބޭނުންވެސް ނުވާކަމަށާއި އެކަމަކު މެދުއިރުމަތީގައި އެމެރިކާގެ މަސްލަހަތު ރައްކާތެރި ކުރުމަށްޓަކައި ބައިވެރިއަކު ބޭނުންވާ “ ކަމަށެވެ.
ބޮޑުވަޒީރު ނަތަންޔާހޫގެ އޮފީހުގައި މީޑީއާއަށް މައުލޫމާތު ދެއްވަމުން އިސްރާއީލަށް ހަމާސްގެ ފަރާތުން ދެން ދުވަހަކުވެސް ނުރައްކަލެއް ނާންނާނެ މިންވަރަށް ހަމާސް ފިޔަތައް ކޮށާލުމާއި އަދި ގައްޒާ އަލުން އާރާސްތު ކުރުމުގައި އެމެރިކާއާއި އިސްރާއީލަށްވެސް ބައިވަރު ގޮންޖެހުންތައް އެބަހުރިކަމަށް ނައިބުރައީސް ވޭންސް އިތުރަށް ވިދާޅުވިއެވެ. އަދި ކިތަންމެ ގިނަ ހުރަސްތަކެއް ގިރާކުރަން ޖެހުނު ކަމުގައިވިޔަސް އެމެރިކާއިން ހަމާސްގެ ކިބައިން މިލިޓްރީ ބާރު ވަކިކޮށް ގައްޒާގެ ރައްޔިތުންނަށް އަރާމުގައި ދިރިއުޅެވޭނެގޮތަށް އެ ޝަހަރު އަލުން އާރާސްތުކުރާނެއެވެ. މި މަސައްކަތުގައި އެމެރިކާއަށް އެކުވެރި އަރަބި ގައުމުތަކުގެ އެއްބާރުލުންވެސް ލިބޭނެއެވެ. ގައްޒާއާބެހޭ ގޮތުން ރައީސް ޓްރަމްޕްގެ ހުށައެޅުން ކާމިޔާބު ކުރެވޭނެކަމުގެ އިތުބާރާއެކު ނައިބުރައީސް ވިދާޅުވިއެވެ. އަދި އަބްރަހަމް އެކޯރޑްގެ ނަންދީފައިވާ މުއާހަދާގެ ދަށުން މެދުއިރުމަތީގައި ސުލްހަ ގާއިމްވެގެންވެސް ދާނެއެވެ. އެއަށްފަހު މެދުއިރުމަތީގައި އެމެރިކާގެ މަސްލަހަތު ބެލެހެއްޓުމަށްޓަކައި އިސްރާއީލަކީ ބައިވެރިއަކަށްވުން ބޭނުންވާނެއެވެ. ރައީސްޓްރަމްޕްގެ ސުލްހައިގެ ޕްލޭން އޮތީ ރަނގަޅު މަގަށް އެޅިފައި ކަމަށްވެސް ވޭންސް ވިދާޅުވިއެވެ.
ނައިބުރައީސް ޖޭ ޑީ ވޭންސްގެ ވާހަކަފުޅުތަކާ ގުޅިގެން ނަތަންޔާހޫ ބުނެފައިވެއެވެ. ފާއިތު ވެގެންދިޔަ އަހަރުދުވަހު އެމެރިކާއާއި އިސްރާއީލުގެ ގުޅުން ވަރަށް ރަނގަޅަށް ވަނީ ދުނިޔެއަށް ތަމްސީލު ކޮށްދެވިފައެވެ. އެހެންނަމަވެސް މިހާރު ދުނިޔޭގެ މަސްރަޙްދަނީ ބަދަލު ވަމުންނެވެ. އިސްރާއީލަކީ އެމެރިކާގެ ޕްރޮޓެކްޓޮރޭޓެއް ނޫނެވެ. އިސްރާއީލުން އިސްރާއީލުގެ ހުރިހާކަމެއް ބެލެހެއްޓޭނެއެވެ. އަދި އިސްރާއީލާބެހޭގޮތުން އެންމެ ފަހުބަސް ބުނާނީވެސް އިސްރާއީލުންނެވެ. އެމެރިކާއަކުން ނޫނެވެ.
ގައްޒާ ހަނގުރާމަ ނިމުމަކަށް އައުމަށްފަހު ރައީސް ޓްރަމްޕްގެ ހުށައެޅުމުގައިބުނެފައިވާގޮތަށް ގައްޒާގެ ސެކިއުރިޓި ކަންތައް ބެލެހެއްޓުމުގައި އެއްވެސް ވަރަކަށް ތުރުކީގެ ބާރުތަކުން ބައިވެރި ކުރަން ނަތަންޔާހޫ އެއްބަސް ނުވާނެކަމަށް އިޝާރާތް ކޮށް ނައިބު ރައީސަށް ދެންނެވި ކަމަށް ވެއެވެ. ގައްޒާގެ ހަނގުރާމަ ފެށުމާއެކު ތުރުކީއާއި އިސްރާއީލުގެ ގުޅުން ވަނީ ވަރަށް ނިކަމެތި ވެފައެވެ. ރައީސް ޓްރަމްޕްގެ މަޝްރޫއު ހަމާސްއަށް ވިސްނާދިނުމުގައި ވަރަށް މުހިންމު ދައުރެއް ތުރުކީން ވަނީ އަދާކޮށްފައެވެ. އަދި ގައްޒާއަށް ފޮނުވޭ ބައިނަލް އަގްވާމީ ލަޝްކަރުގައި ތުރުކީގެ ބާރުތައް ޝާމިލު ކުރެވޭނެކަމަށް ތުރުކީގެ ރައީސް ވިދާޅުވިއެވެ.
ރައީސް ޓްރަމްޕްގެ ސުލްހައިގެ މަޝްރޫއުގެ ފުރަތަމަ ފިޔަވަހި ކާމިޔާބު ކުރެވިއްޖެ ކަމަށް ބެލިފައިވާއިރު ދެން ކުރިއަށްއޮތީ ހަމާސް ހަތިޔާރު ބެހެއްޓުމާއި ގައްޒާގެ ސެކިއުރިޓީ ބަލަހައްޓާނެ ފަލަސްތީނުގެ ފުލުން ތަމްރީނު ކުރުމުގެ މަސްއޫލިއްޔަތެވެ.
