މާލެ ސިޓީގެ އެކި ސަރަހައްދުތަކުގައި ހުރި އުޅަނދުތައް ފުލުހުން ޓޯ ކުރަން ފަށައިފިއެވެ.
ޓޯ ކުރަމުންދަނީ އާންމު ދަތުރުފަތުރަށާއި ހިނގާބިނގާވެ އުޅުމަށް ދަތިވާގޮތަށް ހުރި އުޅަނދުތަކާއި ކަފިހިހުރަސް މަތީގައި ޕާކްކޮށްފައި ހުންނަ އުޅަނދުތައް ކަމަށް ފުލުހުން މަޢުލޫމާތުދެއެވެ.
މިއީ، މާލޭގެ މަގުތަކުގެ ސަލާމަތާއި ރައްކާތެރިކަން ކަށަވަރުކޮށް، މަގުތައް ތަރުތީބުކުރުމަށް ކުރަމުންދާ މަސައްކަތެއް ކަމަށް ފުލުހުން ބުނެއެވެ.
އެހެންކަމާއެކު މިފަދަ ގޮތްގޮތަށް އުޅަނދުތައް ޕާކުނުކުރުމަށާއި އަދި، ޕާކުކުރުމަށް ޚާއްޞަކޮށްފައިވާ ސަރަހައްދުތަކުގައި ޕާކުކުރުމަށް ސަމާލުކަންދިނުމަށް ފުލުހުން ވަނީ އުޅަނދުތައް ދުއްވާ ފަރާތްތަކަށް ހަނދާންކޮށްދީފައެވެ.
ފުލުހުން ދަނީ ދޭތެރެދޭތެރޭން، މިފަދަ ގޮތްގޮތަށް ޕާކުކޮށްފައި ހުންނަ އުޅަނދުތައް ނަގައި، މަގުތައް ތަރުތީބުކުރުމުގެ މަސައްކަތް ކުރަމުންނެވެ.
މިގޮތުން، މީގެ ކުރިން ފުލުހުން ބުނެފައިވަނީ، އެގޮތަށް ޓޯކުރާ އުޅަނދުތައް ދޫކުރެވޭނީ 48 ގަޑިއިރު ފަހުން ކަމަށާއި، އަދި އެފަދައިން ޕާކުކޮށްފައި ބަހައްޓާ އުޅަނދުތައް ދުއްވި މީހުންނާމެދު ފިޔަވަޅު އަޅާނެ ކަމަށެވެ.
