ކެއިންބުއިމުގައި އާންމުކޮށް ބޭނުންކުރާ ތަކެތީގެ ބައެއް ބާވަތްތައް އެސްޓީއޯއިން ގަނޑުކޮށް އެތެރެކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ނިންމަވައިފިއެވެ.

އެކްސްގައި ކުރެއްވި ޕޯސްޓެއްގައި ރައީސުލްޖުމްހޫރިއްޔާ ވިދާޅުވީ، މިގޮތަށް ނިންމަވާފައިވަނީ ވަޒީރުންގެ މަޖިލީހުގެ ލަފާގެ މަތިން ކަމަށެވެ.

މިއީ ކާބޯތަކެތީގެ ރައްކާތެރިކަން ކަށަވަރުކުރުމަށް އެމަނިކުފާނު ގެންގުޅުއްވާ ސިޔާސަތުގެ ދަށުން ނިންމެވި ނިންމެވުމަށް ކަމަށް އެމަނިކުފާނު ވަނީ ވިދާޅުވެފައެވެ.

މިގޮތުން، އެސްޓީއޯއިން ގަނޑުކޮށް އެތެރެކުރުމަށް ނިންމާފައިވާ ބާވަތްތަކުގެ ތެރޭގައި ހިމެނެނީ ކާޑުގެ ބާވަތްތަކާއި، ރާއްޖެއަށް އެންމެ ގިނައިން އެތެރެކުރާ 10 ބާވަތުގެ މޭވާއާއި، 10 ބާވަތުގެ ތަރުކާރީއާއި، މުގާއި، ބިހާއި އަދި އަލުތްވެވެ.

ފަހަކަށްއައިސް ރާއްޖޭގައި ދަނީ އާދަޔާ ޚިލާފަށް ތަކެތީގެ އަގު އުފުލެމުންނެވެ. މިގޮތަށް ތަކެތީގެ އަގު އުފުލެން ފެށުމާއެކު އެސްޓީއޯ މެދުވެރިކޮށް ސަރުކާރުން ދަނީ ރައްޔިތުންނަށް ހެޔޮ އަގުގައި ތަކެތި ލިބޭނެ މަގު ފަހިކޮށްދެއްވަމުންނެވެ.