ގްލޯބަލް އިންވެސްޓްމަންޓް ހަބެއްގެ ގޮތުގައި އޮމާންގެ ދައުރު ހަރުދަނާކޮށް، ޑިޖިޓަލް ޓްރޭޑް އެޖެންޑާ ކުރިއެރުވުމަށް އަޅާ ބޮޑެތި ފިޔަވަޅުތަކުގެ ތެރެއިން އިންވެސްޓަރުންނަށް އާ ގޯލްޑަން ވިސާ ޕްރޮގްރާމެއް އޮގަސްޓް 31 ގައި ތައާރަފްކުރުމަށް އޮމާނުން ތައްޔާރުވެއްޖެއެވެ.

މިނިސްޓްރީ އޮފް ކޮމާސް، އިންޑަސްޓްރީ އެންޑް އިންވެސްޓްމަންޓް ޕްރޮމޯޝަނުން ބުނީ މި އިސްނެގުމަކީ އިގްތިސާދީ ސިންދަފާތަށް އެހީތެރިވެދީގެން އިންވެސްޓަރުންނަށް ދިގު މުއްދަތަކަށް ހަމަޖެހުން ހޯދައިދިނުމަށް ފަރުމާކޮށްފައިވާ ޕްރޮގްރާމެއް ކަމަށެވެ.

ގޯލްޑަން ވިސާ ތައާރަފް ކުރާނީ އޮމާންގެ މަތީ ފެންވަރުގެ ކުންފުނިތަކަށް އެއްބާރުލުން ދިނުމުގެ އަމާޒުގެ ދަށުން ތައާރަފްކުރާ ”އަލް މަޖީދާ ކުންފުނި“ ތަކުގެ އިތުރުން، ވިޔަފާރި ރަޖިސްޓްރޭޝަނާއި، އިލެކްޓްރޯނިކް ޓްރާންސްފާ ކުރުމަށް ”އޮމާން ބިޒްނަސް“ ޕްލެޓްފޯމްގައި ތަޢާރަފްކުރާ އާ ހިދުމަތަކާއެކުގައެވެ. މި އިސްލާހުތަކުގެ ބޭނުމަކީ އިންވެސްޓަރުންނާއި ވިޔަފާރިތަކަށް ސަލްޓަނޭޓުގައި ހިންގުމަށް ފަސޭހަ ކުރުމެވެ.

މިކަން އިއުލާން ކުރުމަށް ހަމަޖެހިފައިވަނީ ދުފާރުގެ ގަވަރުނަރު ސައްޔިދު މަރްވާން ބިން ތުރުކީ އަލް ސައީދުގެ ބެލުމުގެ ދަށުން ސަލާހުގައި ބާއްވާ ހަރަކާތެއްގައެވެ.

އަދި މި ޕްރޮގްރާމްގެ ތެރެއިން ކޮންސްޓްރަކްޝަން ދާއިރާ ކުރިއެރުވުމުގެ މަގުޞަދުގައި ސުލްތާން ޤާބޫސް ޔުނިވާސިޓީ، ޖަރުމަން ޔުނިވާސިޓީ އޮފް ޓެކްނޮލޮޖީ، އޮމާން އެނާޖީ އެސޯސިއޭޝަން، އަދި އެބިނާއާ އެކު އެއްބާރުލުން ދިނުމުގެ އެއްބަސްވުންތަކުގައި ސޮއިކުރުމަށްވަނީ ހަމަޖެހިފައެވެ.

އެ މިނިސްޓްރީގެ ޑިރެކްޓަރު ޖެނެރަލް އޮފް ޕްލޭނިން މުބާރަކް ބިން މުހައްމަދު އަލް ދޫހާނީ ވިދާޅުވި ގޮތުގައި ގޯލްޑަން ވިސާ އާއި އެއާ ގުޅުން ހުރި އިސްލާހުތަކުގެ މަގުސަދަކީ ބޭރުގެ އިންވެސްޓަރުންނާއި ލޯކަލް ވިޔަފާރިތަކަށް ވެސް އޮންނަ ފުރުސަތުތައް ފަހިކޮށްދީ، އޮމާންގެ ތެރޭގައިއާއި އަދި ބައިނަލްއަގްވާމީ މާކެޓްތަކުގައި ވިޔަފާރިތައް ފުޅާކުރުމަށް އެހީތެރިވުމެވެ.