ޓިކްޓޮކްގެ ނިއުޔޯކުގެ އޮޕަރޭޝަންތަކަށް އިސްރާއީލް ޑިފެންސް ފޯސަސް (އައިޑީއެފް)ގެ ކުރީގެ ޓްރެއިނަރަކު އައްޔަން ކުރުމުން މެލޭޝިއާ ސަރުކާރުން ޓިކްޓޮކްއާއި ދެކޮޅަށް ފިޔަވަޅު އަޅަން ވިސްނަމުންދާކަމަށް ކޮމިއުނިކޭޝަން މިނިސްޓަރު ޑަޓޫކް ފަހުމީ ފަޟީލް އާދީއްތަ ދުވަހު ވިދާޅުވެއްޖެ އެވެ.
ފަހުމީ ފާހަގަކުރެއްވި ގޮތުގައި މެލޭޝިއާގައި ޓިކްޓޮކް ހިންގަނީ ލައިސަންސެއްގެ ދަށުން ކަމަށާއި، ކުރިއަށް އޮތް ތަނުގައި އެގައުމުގައި އެކުންފުނީގެ ހަރަކާތްތެރިކަމާއި ގުޅޭ އެއްވެސް ނިންމުމެއް ނިންމާނީ ސެޕްޓެމްބަރު މަހުގެ ކުރީކޮޅު އެ ކުންފުންޏާއެކުގައި ބާއްވާ ރަސްމީ މަޝްވަރާތަކަށް ފަހުގައެވެ.
އޭނާ މިހެން ވިދާޅުވީ ކުއަލަލަމްޕޫރުގައި ބޭއްވި ކަރްނިވަލް ސުމުދު ނޫސަންތާރާ އިވެންޓުގައި ވީއާރު ”ޣައްޒާ ޓައިމް ޓަނަލް“ ލޯންޗު ކުރެއްވުމަށް ފަހު، ޓިކްޓޮކުގެ ނިއުޔޯކް މަގާމަކަށް އައިޑީއެފް ސިފައިންގެ މީހެއް އައްޔަން ކުރުމާ ގުޅިގެން އުފެދުނު މައްސަލަތަކާ ބެހޭ ގޮތުން ސުވާލު ކުރުމުންނެވެ.
މި މައްސަލައަށް މެލޭޝިއާގައި ހާއްސަ ސަމާލުކަމެއް ލިބިފައިވާއިރު، މެލޭޝިއާގެ އާންމުންގެ ޝުއޫރުތައް ފެށުނީއްސުރެ ހުރީ ފަލަސްތީނާއި އެކުގައެވެ.
އަދި އެގައުމުގައި ކުރާ ވިޔަފާރިތަކާއި، ހިންގާ ކުންފުނިތަކުން އާންމު މަސްލަހަތަށް ހާއްސަ ސަމާލުކަމެއް ބެހެއްޓުމަށް ސަރުކާރުން ވަނީ އިލްތިމާސްކޮށްފައެވެ.
