އެއްފަހަރަކު ބާޒަކާ މާބަނޑު އަންހެނަކު ދިމާވިއެވެ.
ބާޒު: ކަމަނާގެ ހާލު ރަނގަޅުހެއްޔެވެ؟
އަންހެންމީހާ: އަހަރެން އެބަ ވަރަށް ބިރުގަނެއެވެ. އަހަރެން މިއިނީ ވިހަންވެފައެވެ. އަހަރެން ބޭނުންވަނީ އަހަރެންގެ ދަރިފުޅަށް އެންމެ މޮޅު އެންމެ އަރާމު ދިރިއުޅުން ހޯދައިދޭށެވެ. އެކަމަކު އަހަރެންނަށް ދަރިން ބެލެނީ އެންމެ ރަނގަޅަށްކަން އެނގޭނީ ކިހިނެއްހެއްޔެވެ؟
ބާޒު: ދަރިން ބެލުމަކީ އެކުދިންނަށް އެންމެ އަރާމު ދިރިއުޅުން ހޯދައިދިނުމެއް ނޫނެވެ. އެކަން އޮތީ އޭގެ ހަމަ ސީދާ އިދިކޮޅަށެވެ. ޅަ ބާޒުތައް އުފަންވުމުން އަހަރެންގެ ހާލީގެ ވަށައިގެން މަޑު ދޫނިފަތާއި ވިނަ އަތުރަމެވެ. އެއީ އެސޮރުމެންނަށް ހޫނުކަންދޭ އަދި ރައްކާތެރި ތަނަކަށް އެ ހާލި ހެދުމަށްޓަކައެވެ. އެކަމަކު އެސޮރުމެން ބޮޑެތިވެ އުދުހެންފަށާ ވަގުތު ޖެހުމުން އަހަރެން އެ ހުރިހާ އެއްޗެއް ނަގަމެވެ. ބަހައްޓަނީ ހަމައެކަނި ތޫނު ކަށިތަކެވެ.
އަންހެންމީހާ: އަސްތާއެވެ! ތިޔައީ ހާދަހާ ބޮޑު އަނިޔާއެކެވެ.
ބާޒު: އެއީ އަނިޔާއެއް ނޫނެވެ. އެފަދަ ކަންކަމުން ދަސްވާނީ ކުރިއަށް ފިޔަވަޅުއަޅާށެވެ. އެ ކަށިތަކުގެ ސަބަބުން އެއަށްވުރެ ރަނގަޅު ދިރިއުޅުމެއް ހޯދަން އުދުހިގެން ދާން އެސޮރުމެން މަސައްކަތްކުރާނެއެވެ. އަރާމު ތަންމައްޗަކީ ދިރިއުޅުމުގެ އެއްވެސް ކަމެއް ދަސްކޮށްދޭނެ ތަނެއް ނޫނެވެ.
އަންހެންމީހާ: އެސޮރުމެން ވެއްޓިދާނެ ނޫންހެއްޔެވެ؟
ބާޒު: ބައެއް ފަހަރަށް ވެއްޓެންވެސް ދެއެވެ. އަހަރެން ހިފަނީއެވެ. އަނެއްކާވެސް ނަގާ އެއްލަނީއެވެ. އަމިއްލައަށް އުދުހެން ދަސްވަންދެން އަހަރެން ހަދަނީ އެހެންނެވެ. އުދުހެން ރަނގަޅަށް ދަސްވުމުން އަހަރެން އެސޮރުމެން ދޫކޮށްލަނީއެވެ. އޭގެ ފަހުން އަހަރެން އެސޮރުމެންނަށް އެހީވާކަށް ނުހަދަމެވެ.
އަންހެންމީހާ: އެސޮރުމެން ރަނގަޅަށް އެކަމަށް ތައްޔާރުވެސް ނުވަނީސްހެއްޔެވެ؟
ބާޒު: އެސޮރުމެން އަމިއްލައަށް އެކަމަށް މަސައްކަތް ނުކޮށެއް ދުވަހަކުވެސް ތައްޔާރެއް ނުވެވޭނެއެވެ. އަހަރެން ހާލީގައި ބައިތިއްބާހާ ހިނދަކު ދުވަހަކުވެސް އެސޮރުމެންނަށް ކަމެއް ދަހެއްނުވާނެއެވެ. ކަންކަން ދަސްކުރަން ދޫކޮށްލުމަކީ އެއީ އަނިޔާއާއި ހިތާމައިގެ ތެރެއަށް އެސޮރުމެން ދޫކޮށްލުމެއް ނޫނެވެ. އެއީ އެސޮރުމެންނަށް އަމިއްލައަށް އުޅެން ދަސްކޮށްދިނުމެވެ. ހަޔާތުގައި ދިމާވާ ކަންކަމާ ކުރިމަތިލާން ދަސްކޮށްދިނުމެވެ. ފަހަރެއްގައި އެއީ މައިމީހާއަށް ބަލަން ކެތްނުވާ މަންޒަރަކަށްވެސް ވެދާނެއެވެ.
އަންހެންމީހާ: އަހަރެންނަށް ތިޔަކަން ދަސްކޮށްދިނީތީ ބާޒަށް ވަރަށް ބޮޑަށް ޝުކުރު އަދާކުރަމެވެ. އަހަރެންނަށް ތިޔަ ނަގައިދިނީ ވަރަށް ޙިކުމަތްތެރި ފިލާވަޅެކެވެ.
އަންހެންމީހާ މަޑުމަޑުން ހިނގައިގަތެވެ. ބާޒު ބުނިފަދަ މަންމައަކަށް ވުމަށް ޢަޒުމް ކަނޑައަޅައިގެންނެވެ. އޭނާ ދަރިފުޅަށް ދަސްކޮށްދޭނީ އަމިއްލައަށް ދިރިއުޅޭށެވެ. ދިމާވާ ކަންކަމާ އަމިއްލައަށް ކުރިމަތިލާށެވެ. އޭނާއަކީ ދަރިފުޅަށް ކަންކަން ކޮށްދީ ހިމާޔަތްދޭން އަބަދު ދުނިޔޭގައި ހުންނާނެ މީހެއް ނޫންކަން ގަބޫލުކުރަމުންނެވެ.
(ތަރުޖަމާއެއް)
