ތައިލަންޑްގެ ބޮޑުވަޒީރު ޕެޓޮންގޓާން ޝިނަވަޓްރާ، ކެމްބޯޑިޔާގެ ކުރީގެ ލީޑަރ ހުން ސެންއަށް ކުރެއްވި ފޯން ކޯލްއެއްގެ މައްސަލައިގައި ތައިލަންޑްގެ ކޮންސްޓިޓިއުޝަނަލް ކޯޓުން އެކަމަނާ މަގާމުން ވަކިކޮށްފިއެވެ.

ޕެޓޮންގޓާން މަގާމުން ވަކި ކުރެވުނީ ”އެޓިކްސް“ ނުވަތަ ގެންގުޅެންޖެހޭ އުސޫލްތަކާ ޚިލާފް އިބާރާތްތަކެއް ފޯން ކޯލްގައި ބޭނުން ކުރެއްވި ކަމުގެ ކުށުގައެވެ. މިގޮތުން ތައިލަންޑާ ކެމްބޯޑިޔާގެ ގުޅުން ގޯސްވެފައިވާ ދަނޑިވަޅެއްގައި ހުންސެން އަށް ”އަންކަލް“ ވިދާޅުވެގެން ވާހަކަފުޅުދެއްކެވުމާއި އަދި އަމިއްލަ ގައުމު،ތައިލަންޑްގެ އަސްކަރިއްޔާގެ ހުރި އުނިކަންކަން ފާހަގަ ކުރައްވައި އެކަމަށް ފާޑުވިދާޅުވެފައިވާ ކަމަށްވެއެވެ.

ކޯލް ލީކް ކޮށްލާފައިވަނީ ހުންސެން ކަމަށް ވެއެވެ. މިކަމުގެ ސަބަބުން އެކަމަނާގެ އަގުވެއްޓި އަދި ތައިލަންޑްގެ އަސްކަރިއްޔާގެ ނަމަށްވެސް ވަނީ ހުތުރު އަރާފައެވެ.

ހުކުރުދުވަހު ކޯޓުގެ ނުވަ ފަނޑިޔާރުގެ މެދުގައި ނެގުނު ވޯޓުގައި ޕެޓޮންގޓާން ވަކި ކުރުމަށް ހަ ފަނޑިޔާރުން ވޯޓު ދީފައި ވެއެވެ. އެފަޑިޔާރުން ވިދާޅުވެފައިވަނީ ބޮޑުވަޒީރަކު ގެންގުޅެންޖެހޭ ”އެތިކަލް ސްޓޭންޑަޑ“ް އެކަމަނާ ހިފަހައްޓަވާފައި ނުވާކަމަށެވެ. ޕެޓޮންގޓާން ވިދާޅުވެފައިވަނީ އެކަމަނާ މަސައްކަތް ކުރެއްވީ ހަނގުރާމަޔަކަށް ނުގޮސް ޒާތީ ގާތް ގުޅުމެއްގެ ތެރޭން ސުލްހަ ގާއިމް ކުރެވޭތޯއެވެ.

ތައިލަންޑާ ކެމްބޯޑިޔާއާއި ދެމެދު ދާދި ފަހުން ވަނީ ފަސް ދުވަހަށް ދެމިގެން ދިޔަ ހަމަލާތަކެއް ބަދަލު ކުރެވި އެތައްބަޔަކު މަރުވެފައެވެ.

އުމުރުފުޅުން 39 އަހަރުގެ ޕެޓޮންގޓާން ޝިނަވަޓްރާ އަކީ ކުރީގެ ބޮޑުވަޒީރު ތަކްށިން ޝިނަވަޓްރާގެ ދަރިކަނބަލެކެވެ. ކޯޓުން ޕެޓޮންގޓާން ޝިނަވަޓްރާ މަގާމުން ވަކުކުރުމާއެކު އެކަމަނާ ވެގެން ގޮސްފައިވަނީ 2008ވަނަ އަހަރުގެ ފަހުން ތައިލަންޑްގައި މިގޮތަށް ކޯޓުގެ އަމުރަށް މަގާމުން ވަކި ކުރެވުނު ފަސްވަނަ ބޮޑުވަޒީރަށެވެ.

ޕެޓޮންގޓާން ޝިނަވަޓްރާ ގެ ބަދަލުގައި ބޮޑުވަޒީރެއް ހޮވާނީ ރައްޔިތުންގެ މަޖިލީހުންނެވެ.ފޯން ކޯލްގެ މައްސަލައިގައި ވެރިކަންކުރާ ކޮއެލިޝަންގައި ހިމެނުނު ބޮޑު އެއްޕާޓީން ތާއީދު އަނބުރާ ގެންދިއުމާއި ގުޅިގެން ވެރިކަންކުރާ ”ފިއުތައި“ ޕާޓީ އަށް މަޖިލީހުގައި މިވަގުތު އޮތީ ވަރަށް ހަނި އަގުލަބިއްޔަތެކެވެ.