ޗައިނާގައި ކޮންމެ އަހަރަކު ބާއްވާ ޚާއްސަ ސިޔާސީ ހަރަކާތެއް ކަމަށްވާ މިލިޓަރީ ޕެރޭޑް ބައްލަވާލެއްވުމަށް މިއަހަރު އުތުރު ކޮރެޔާގެ ލީޑަރު ކިމް ޖޮންގ އުން ވަޑައިގަންނަވާނެކަން ޗައިނާއިން ހާމަ ކޮށްފިއެވެ.

މި ރަސްމިއްޔާތުގައި ރަޝިޔާގެ ރައީސް ވްލަޑިމިއަރ ޕޫޓިން ވެސް ބައިވެރިވެ ވަޑައިގަންނަވާނެކަން ކުރިން ވަނީ ހާމަކޮށްފައެވެ.
ކިމްގެ މިދަތުރުފުޅު ވެގެންދާނީ ކިމްއަށް ވަރަށް ޚާއްސަ ”މަލްޓިލެޓަރަލް“ އަދި ”އިންޓަނޭޝަނަލް“ ބައްދަލްވުމަށެވެ. ޚާއްސަކޮށް މިދަނޑިވަޅަކީ ޗައިނާ އިސްކޮން އޮންނަ ”ވަރލްޑް އޯޑަރ“ އެއް ވަރުގަދަ ކުރުމަށް ޗައިނާގެ ރައީސް ޝީ ޖިންގޕިންގ މަސައްކަތް ކުރައްވަމުން ގެންދަވާ ދަނޑިވަޅަކަށް ވާތީއެވެ. ކިމް އާއި ޕޫޓިން ޗައިނާއަށް ދަތުރުފުޅެއް ކުރައްވަން އެއްބަސްވެ ވަޑައިގަތުމުން ޗައިނާ ގެ ނުފޫޒް އުތުރުކޮރެޔާ އަދި ރަޝިޔާގެ މައްޗަށް ކޮންމެވެސް ވަރަކަށް ނަމަވެސް އޮތްކަން ހާމަވެއެވެ.
އަނެއްކޮޅުން އެމެރިކާގެ ރައީސް ޓްރަމްޕްވެސް ގެންދަވަނީ ޔޫކްރެއިން ހަނގުރާމަ ހުއްޓާލުމާބެހޭ ގޮތުން ކަމަށްބުނެ ރައީސް ޕޫޓިންއާއެކު ”ޑީލް“ އެއް ހައްދަވަން މަސައްކަތް ކުރައްވަމުންނެވެ.
ޕެރޭޑް ގެ ރަސްމިއްޔާތުގައި ޓްރަމްޕް ބައިވެރިވެ ވަޑައެއް ނުގަންނަވާނެއެވެ. ނަމަވެސް ޓްރަމްޕް ވަނީ އުތުރު ކޮރެޔާގެ ލީޑަރު ކިމް އާ ބައްދަލް ކުރައްވަން ބޭނުން ކަމަށް ވިދާޅުވެފައެވެ. މިކަމަށް ކިމް އަދި ވަކިއެއްޗެއް ވިދާޅެއްނުވެއެވެ.
ސެޕްޓެމްބަރ 3 ވަނަ ދުވަހު ޗައިނާގެ ވެރިރަށް ބޭޖިންގ ގައި ބާއްވާ ޚާއްސަ މިލިޓަރީ ޕެރޭޑް އަކީ ދުނިޔޭގެ ދެވަނަ ބޮޑު ހަނގުރާމަ ނިމުނުތާ 80 އަހަރު ފުރުން ވެސް ފާހަގަ ކުރުމަށް ބާއްވާ ހަރަކާތެކެވެ. މިފަދަ ޕެރޭޑްތަކުގައި ޗައިނާގެ އަސްކަރިއްޔާ ފުޅާވެ ބާރުގަދަ ވަމުން ދާ މިންވަރު ދައްކާލުން އޮވެއެވެ.މިއީ ގައުމު ދިފާއު ކުރުމުގެ ފުރިހަމަ ބާރު ލިބިގެންވާކަން ޗައިނާގެ ރައްޔިތުންނަށާ ބޭރުގެ ބާރުތަކަށް ދައްކާލުމަށް ކުރާކަމެކެވެ. މިޕެރޭޑް އަކީ ގައުމީ ފެންވަރުގައި އެކަމާމެދު ފަޚުރުވެރިވާ،އަދި ގައުމިއްޔަތު ދިރުވާ،ދައުލަތަށާ ޕާޓީ އަށް އޮތްލޯބި ދައްކާދޭ ކަމެއްކަމަށް ވެއެވެ.
މި ޚާއްސަ ޕެރޭޑް ބައްލަވާލެއްވުމަށް ދުނިޔޭގެ އެތައް ލީޑަރުންނެއް ޗައިނާ އަށް ޒިޔާރަތް ކުރައްވާނެއެވެ.