މީޑިއާ ބިލުގައި އެއްބަސްނުވެވޭ ކަންކަން އެބަހުރި: މިނިސްޓަރު 

Loading

August 28, 2025
profile
Facebook
Twitter
WhatsApp

މީޑިއާތަކާ ގުޅޭގޮތުން ހުށަހެޅިފައިވާ ބިލުގައި އެއްބަސްވެވަޑައިނުގެންނެވޭ ގިނަ ކަންތައްތަކެއް އެބަހުރި ކަމަށް، ޒުވާނުން ބާރުވެރިކުރުވުމާއި، މަޢުލޫމާތާއި ފަންނާ ބެހޭ ވަޒީރު އިބްރާހީމް ވަޙީދު (އަސްވާޑު) ވިދާޅުވެއްޖެއެވެ.

ތުޅާދޫ ދާއިރާގެ އަމިއްލަ މެންބަރު ޢަބްދުލް ޙަންނާން އަބޫބަކުރު ހުށަހެޅުއްވި މި ބިލު އިއްޔެ ވަނީ މަޖިލީހަށް ބަލައިގެންފައެވެ. އަދި މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން މިއަދު ވަނީ މި ބިލާގުޅޭ މަސައްކަތް ފެށުމަށް ތާވަލުކޮށްފައެވެ.

އެ ބިލާ ގުޅިގެން ކަންބޮޑުވުން ފާޅުކުރުމަށް ނޫސްވެރިން މިއަދުވެސް ރައީސް އޮފީސް ސަރަހައްދުގައި އިހުތިޖާޖު ކުރަމުން އަންނައިރު، މިނިސްޓަރު ވަޙީދާއި ރައީސް އޮފީހުގެ ތަރުޖަމާނު މިނިސްޓަރު އިބްރާހީމް ޚަލީލް ވަނި ކަންބޮޑުވުން ފާޅުކުރަން ތިބި ނޫސްވެރިންނާ ބައްދަލުކުރައްވާފައެވެ.

އެ ސަރަހައްދުގައި ހުންނަވައި، މިނިސްޓަރު ވިދާޅުވީ، މީޑިއާ ބިލުގައި އެއްބަސްނުވެވޭ ބައިވަރު ކަންކަން އެބަހުރި ކަމަށާއި، އެ ކަންކަމަށް ހައްލު ހޯދަން ރައްޔިތުންގެ މަޖިލީހަށް ވަޑައިގެން ލަފާދެއްވާނެ ކަމަށެވެ.

ނޫސްވެރިން ތަކުރާރުކޮށް ސުވާލު ދެންނެވިނަމަވެސް، އެއްބަސްނުވެވޭ ކަންކަމަކީ ކޮބައިކަން މިނިސްޓަރު ވިދާޅުވެދެއްވާފައެއް ނުވެއެވެ.

މިކަމާ ގުޅިގެން ނޫސްވެރިން ވަނީ ނުރުހުން ފާޅުކޮށް، ވަޒީރުކަމުގެ މަގާމު މާ މުހިންމީތޯ ދަންނަވާފައެވެ. އެއަށް ޖަވާބުދެއްވަމުން ވަޒީރު ވަނީ، އެމަނިކުފާނަކީ ނޫސްވެރިންދެކެ ލޯބިފުޅުވާ ބޭފުޅެއް ކަމަށް ވިދާޅުވެފައެވެ.

އޭގެ އިތުރުން، މަޖިލީހުގެ މެޖޯރިޓީ ލީޑަރު އިބްރާހީމް ފަލާހް ”ނޫސްވެރިން އުލުބައިންދަން“ ގޮވައިލެއްވި ގޮވައިލެއްވުމާމެދު މިނިސްޓަރު ވަނީ ނުރުހުން ފާޅުކުރައްވާފައެވެ. 

ކުރިން ނޫސްވެރިކަމުގެ ދާއިރާގައި މަސައްކަތްކުރެއްވި، އަދި އޭރު އޮތް ނޫސްވެރިންގެ އެކި އިހުތިޖާޖުތަކުގައި ނުކުންނެވި މިނިސްޓަރު ވަޙީދަކީ މިހާރުވެސް މީޑިއާއެއް ހިންގަވާ ބޭފުޅެކެވެ.

Loading

Leave a Reply

ޚިޔާލު ފައުޅު ކުރެއްވުމުގައި ދީނީ، ޤާނޫނީ އަދި ސުލޫކީ މިންގަނޑުތަކަށް ސަމާލުކަން ދެއްވުން އެދެމެވެ.

ފަހުގެ އަޕްޑޭޓް