ޕާކިސްތާންގެ ޕަންޖާބް ޕްރޮވިންސް އަށް ބޯކޮށް ވާރޭވެހި ބޮޑެތި ސަރަހައްދު ތަކެއްގައި ވަރަށް ބޮޑަށް ފެންބޮޑުވުމުގެ ސަބަބުން އެހިސާބުތަކުގައި ދިރިއުޅޭ ދެލައްކައެއްހާ މީހުން ރައްކާތެރި ހިސާބުތަކަށް ބަދަލު ކުރެވިފައިވާކަމަށް ޚަބަރު ލިބެއެވެ. މިހާވަރަށް ފެންބޮޑުވެފައި ވަނީ ތިންކޯރެއް ފުރި، ބަންޑުން ދިއުމުގެ ސަބަބުންނާއިއެކު ކަމަށް ޚަބަރު ލިބެއެވެ.

ބައެއް ހިސާބުތަކުގައި ފެންގަނޑު ބޮޑުވެފައިވާ ވަރުން މީހުން ސަލާމަތް ކުރުމަށް ބޮއްކުރާފަދަ ބޯޓުތައް ބޭނުން ކުރިކަމަށް ވެއެވެ. މިގޮތުން ބޯޓުތަކުގައި 32،000 ހަށް ވުރެގިނަ މީހުން ވަނީ ސަލާމަތް ކޮށްފައެވެ.

ކޯރުތަކުގެ ފެންގަނޑު ޕާކިސްތާނާ ހަމަޔަށް ދެމިގެން އަންނަނީ އިންޑިޔާއިން ކަމަށް ވާއިރު، އިންޑިޔާއިން ދާދިފަހުން ވަނީ ދެބަސްވުމެއްގައި ކުރިން ޑޭމްތައް ބަންދުކޮށް ހުއްޓުވާލާފައިވާ ފެންގަނޑު އަލުން ދޫކޮށްލާނެކަން އަންގާފައެވެ. މިގޮތުން ޑޭމްތައް ހުޅުވާލުމުން ޕާކިސްތާންގެ އެންމެ އާބާދީ ބޮޑު ޕްރޮވިންސްކަމަށްވާ ޕަންޖާބަށް ވަނީ އާދަޔާ ޚިލާފް ބޮޑެތި ގެއްލުން ލިބި 800އެއްހާ މީހުން މަރުވެސް ވެފައެވެ.

ޕާކިސްތާންގެ ނެޝަނަލް ޑިޒާސްޓަރ މެނޭޖްމަންޓް އޮތޯރިޓީން ވަނީ އާންމުން ކޯރުތަކާ ކައިރިޔަށް ވީހާވެސް ނުދިއުމަށާ އަދި ބިންތިރި ސަރަހައްދު ތަކުން ރައްކާތެރި ހިސާބުތަކަށް ބަދަލުވުމަށް އަންގާފައެވެ.

ޕާކިސްތާން ގެ ބޮޑުވަޒީރު ޝަހުބާޒް ޝަރީފްވަނީ މިކަމުގައި މައިސަރުކާރުން ސަރަހައްދީ އޮތޯރިޓީ ތަކާ ގުޅިގެން މަސައްކަތް ކުރަމުން ދާކަމަށް ވިދާޅުވެފައެވެ. މިގޮތުން ގުޖްރާތު، ސިއަލްކޮޓް އަދި ދެވަނައަށް އެންމެ ބޮޑުއާބާދީ އޮންނަ ލާހޫރުގެ އާބަން ސަރަހައްދުތަކަށް އަމާޒުކޮށްގެން، ފެންބޮޑުވުން ހުއްޓުވުމަށް މަސައްކަތްތަކެއް ކުރެވެމުންދާ ކަމަށް ޝަހްބާޒް ޝަރީފް ވިދާޅުވެފައި ވެއެވެ. ސިއަލްކޮޓް އަށް، ފާއިތުވި 49 އަހަރުވެސް އޮތް، އެންމެ ބޮޑަށް ވާރޭ ވެހުމުގެ ރެކޯޑް ވަނީ ފާއިތުވި 24 ގަޑިރުތެރޭ ބަދަލުވެފައި ކަމަށް ވެއެވެ. އެހެންކަމުން ބޮޑެތި ސަރަހައްދުތަކެއްވަނީ ފެނުއަޑީގައެވެ.

މިދުވަސްވަރަކީ ޕާކިސްތާން އަދި އިންޑިޔާގެ ބައެއް ހިސާބުތަކަށް ބޯކޮށް ވާރޭވެހި ބޮޑެތި ސަހައްދު ތަކުގައި ފެންބޮޑުވަމުންދާ ދުވަސް ވަރެކެވެ.