އައިނު ހެދުމުގެ ހުރިހާ ޚަރަދެއް އާސަންދައިގެ ދަށުން ހަމަޖައްސައިދޭ ދެވަނަ އައިނު ފިހާރަ، ހުޅުމާލޭ ހޮސްޕިޓަލުގައި ހުޅުވައިފިއެވެ.
”އެމްސީޖީއެޗް އޮޕްޓިކަލްސް ހުޅުމާލެ“ގެ ނަމުގައި ހުޅުވި މި އައިނު ފިހާރަ ރަަސްމީކޮށް ހުޅުވައިދެއްވީ އިމާރާތްކުރުމާއި، ގެދޮރުވެރިކަމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބެވެ.
މި ރަސްމިއްޔާތުގައި ވާހަކަފުޅުދައްކަވަމުން ހުޅުމާލޭ ހޮސްޕިޓަލުގެ ސީއީއޯ އިބްރާހީމް ޢަބްދުއްރައްޒާޤް ޙަލީމް ވިދާޅުވީ، މިއީ އާންމުންނަށް ކުރިމަތިވެފައިވާ ބޮޑެތި ދަތިތަކަށް (ޚާއްޞަކޮށް އައިނުގެ އަގުބޮޑުކަމާއި އެކަމުގެ ސަބަބުން ދިމާވެފައިވާ ދަތިތަކަށް) ހައްލެއް ހޯއްދަވައިދެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެޅުއްވި ވަރަށް އަގުހުރި ފިޔަވަޅެއް ކަމަށެވެ.
އައިޖީއެމްއެޗްގައި ހުންނަ އައިނު ފިހާރައިން ލިބޭ ހުރިހާ ޚިދުމަތެއް މި ފިހާރައިންވެސް ލިބޭއިރު، ދުވާލަކު ސާޅީހަކަށް އައިނު ހަދައި ދޫކުރެވޭނެ ކަމަށްވެސް އޭނާ ވިދާޅުވިއެވެ.
ހަމަ އެއާއެކު، އެ ފިހާރައިން ހެދެން ނެތް ލޯކޮޅުވެސް އާސަންދައިގެ ދަށުން ރާއްޖޭން ބޭރުން ހެދޭނެ އިންތިޒާމު ހަމަޖެހިފައިވާކަމަށް އޭނާ ވިދާޅުވިއެވެ.
ކުރީގެ ރައީސް މުހައްމަދު ނަޝީދުގެ ސަރުކާރުން ފެށިގެން މިހާތަނަށް އާސަންދައިގެ ދަށުން އައިނަކަށް ދެމުން އައީ 1000 ރުފިޔާއެވެ.
މިދިޔަ ޖުލައި މަހުގެ ތެރޭގައި ރައީސުލްޖުމްހޫރިއްޔާގެ ޑރ. މުޙައްމަދު މުޢިއްޒު ވަނީ އެ އަދަދު 2000ށް ބަދަލުކުރައްވާފައެވެ.
ނަމަވެސް އައިނުތަކުގެ އަގު ބޮޑުވުމުގެ ޝަކުވާ އާންމުން ކުރަންފެށުމާއެކު، ރައީސް މުޢިއްޒު ވަނީ، އާސަންދައިގެ ދަށުން ހުރިހާ ޚަރަދެއް ކުރާގޮތަށް ސަރުކާރުގެ އައިނު ފިހާރައެއް ހުޅުވާނެކަން އިޢުލާން ކުރައްވާފައެވެ.
އެގޮތުން ހުޅުވި ފުރަތަމަ އައިނު ފިހާރަ ވަނީ މިދިޔަ ޖުލައި މަހު އައިޖީއެމްއެޗްގައި ހުޅުވާފައެވެ.
