މެލޭޝިޔާގައި މަސައްކަތްކުރާ ބޭރުމީހުންގެ ތެރެއިން އެންމެ ގިނައީ ބަންގްލާދޭޝް މީހުން ކަން އެގައުމުގެ ހޯމް މިނިސްޓަރ ހާމަ ކުރައްވައިފިއެވެ.މިގޮތުން އަށް ލައްކަޔަށްވުރެގިނަ ބަންގްލޭޝްގެ ރައްޔިތުން، ލޭބަރާ އިންގެ ގޮތުގައި މިވަގުތުވެސް މެލޭޝިޔާގައި އުޅޭކަމަށް ވިދާޅުވެފައިވެއެވެ.
މަޖިލީހުގައި ކުރެވުނު ސުވާލަކަށް އަންގާރަ ދުވަހު ޖަވާބު ދެއްވަމުން މިނިސްޓަރު ވިދާޅުވީ ވަރކް ވިސިޓް ފާސް މިހާތަނަށް ބަންގްލާދޭޝްގެ 803،332 މީހުންނަށް ދޫކޮށްފައިވާ ކަމަށާ އެއީ މެލޭޝިޔާގެ ފޮރިން ލޭބަރ ފޯސް ގެ 37 އިންސައްތަ ކަމުގައެވެ.
މިނިސްޓަރ ސައިފުއްދީން ވިދާޅުވީ ކޮވިޑްއަށްފަހު ގައުމުގެ އިގްތިސާދު ހަމަޔަކަށް އެޅެމުން އައިދަނޑިވަޅުގައި ބޭރުގެ ލޭބަރާ އިންގެ ބޭނުން ވަރަށް ބޮޑަށް ޖެހުނު ކަމުގައެވެ. މިގޮތުން 2022 ވަނަ އަހަރު ބޯޑަރު ހުޅުވާލުމުން ބަންގްލާދޭޝް ގެ 50ހާސް މީހުން އެގައުމަށް އެތެރެވެފައިވާ ކަމުގައި މިނިސްޓަރު މައުލޫމާތު ދެއްވާފައި ވެއެވެ.
މިނިސްޓަރ އިތުރަށް ވިދާޅުވި ގޮތުގައި ބޭރުގެ މަސައްކަތު މީހުންނަށް ވަޒީފާ ދިނުމުގެ އުސޫލުތަކަށް 2023 ވަނަ އަހަރު ލުއިތަކެއް ދިނުމުން އެއަހަރުވެސް ގިނަ އަދަދެއްގެ ބޭރު މީހުންގެ ވަޒިފާ ޔަގީންވެފައިވާ ކަމުގައެވެ.މިގޮތުން އެއަހަރު އެކަނިވެސް ބަންގްލާދޭޝްގެ ހަތަރު ލައްކައެއްހާ މަސައްކަތްތެރިން މެލޭޝިޔާއަށް ގޮސްފައިވެއެވެ.
ހުއްދަ ހޯދައިގެން އެތެރެވެފައިވާ މީހުންވެސް ގާނޫނާ ޚިލާފް ވުމުން ޑިޕޯޓް ކުރުމާއި އަނބުރާ ފޮނުވާލުމުގެ ކަންކަން ކުރިޔަށްދާކަމަށް މިނިސްޓަރު ވިދާޅުވިއެވެ.މިގޮތުން 2022 ވަނަ އަހަރު 20،331 މީހުން، އަދި 2023 ގައި 23،065 މީހުން ޑީޕޯޓް ކުރަން ނުވަތަ އަނބުރާ ފޮނުވާލަން ޖެހުނު ކަމަށް މިނިސްޓަރު ވިދާޅުވިއެވެ.
ވިސާގެ މުއްދަތު ހަމަވުމަށްފަހުވެސް އެގައުމުގައި ތިބުމުން މި މުއްދަތުގައި 790 މީހުން ހައްޔަރުކޮށްފައިވާ ކަމަށްވެސް މިނިސްޓަރު ވިދާޅުވެފައިވެއެވެ.
ރާއްޖެއަކީވެސް ވަރަށް ގިނަ އަދަދެއްގެ ބަންގްލާދޭޝް މަސައްކަތްތެރިން އުޅެމުންދާ ގައުމެކެވެ.
އިންޓަރނެޓުން ލިބޭ މައުލޫމާތަށް ބަލާއިރު، ޑިސެމްބަރ 2023 ހިސާބުގައި ގާތްގަނޑަކަށް ބަންގްލާދޭޝްގެ 90،650 މަސައްކަތު މީހުން ރާއްޖޭގައި އުޅެމުން އައެވެ. މިއަދަދު މިހާރު ލައްކަޔަކާ ގާތްކުރާނެކަމަށް ވަނީ ބެލިފައެވެ. ރާއްޖޭގެ އާބާދީ އަކީ ގާތްގަނޑަކަށް ފަސްލައްކަ ކަމަށްވާއިރު މިއީ މުޅި އާބާދީގެ 20 އިންސައްތައެވެ.
