އިއްޔެ ކުރި އިހުތިޖާޖުގައި ނޫސްވެރިންތަކެއް ހައްޔަރުކޮށްފައިވަނީ އެއްވެ އުޅުން މަނާ ސަރަހައްދަކަށް އެއްވެ އިހުތިޖާޖު ކުރުމުން ކަމަށް ދިވެހި ފުލުހުންގެ ޚިދުމަތުން ބުނެފިއެވެ
ފުލުހުން މިހެން ބުނެފައިވަނި ނޫސްވެރިންގެ ބިލަށް ގެންނަ އިސްލާހުތަކާ ދެކޮޅަށް އިހުތިޖާޖުކުރި ނޫސްވެރިންތަކެއް ހައްޔަރުކުރި ކަމަށް ޚަބަރުތައް ފެތުރުމާ ގުޅިގެން ނެރުނު ނޫސްބަޔާނެއްގައެވެ.
ފުލުހުން ބުނީ، އެ ސަރަހައްދަކީ އެއްވެ އުޅުން ގާނޫނީގޮތުން މަނާ ސަރަހައްދަކަށް ވުމާއެކު، އެއްވެ ތިބި ނޫސްވެރިންނަށް އެތަން ދޫކޮށް ދިއުމަށް ތަކުރާރުކޮށް ނަސޭހަތްދީފައި ވާނެކަމަށެވެ.
އެހެންކަމާއެކުވެސް، އަމުރަށް ނުކިޔަމަންތެރިވުމުގެ ސަބަބުން ބައެއް ނޫސްވެރިންނާމެދު ފިޔަވަޅު އަޅާފައިވަނީ އޮންނަ އުސޫލުގެ ދަށުން ކަމަށާއި، މި ކަމަކީ އެންމެންގެ ސަލާމަތާއި ރައްކާތެރިކަމަށް ކަނޑައަޅާފައިވާ އުސޫލުތަކެއް ކަމަށް ފުލުހުން ވަނީ ބުނެފައެވެ.
ފުލުހުންގެ ބަޔާނުގައި ބުނެފައިވަނީ، ހުރިހާ ފަރާތްތަކުގެ ޙައްޤުތައް ކަށަވަރުކުރުމާއެކު، ޑިމޮކްރަސީގައި މީޑިއާ ކުޅޭ މުހިންމު ރޯލަށްވެސް އެ މުއައްސަސާއިން އިޙުތިރާމް ކުރާނެކަމަށެވެ.
އަދި ހަމަ އެހެންމެ، ގާނޫނާ އެއްގޮތްވާ ގޮތުގެ މަތިން އެއްވެ އުޅުމާއި އިހުތިޖާޖު ކުރުމުގައި ފުލުހުންގެ އެއްބާރުލުން ލިބޭނެ ކަމަށާއި، މުޖުތަމަޢުގެ އެންމެންގެ ސަލާމަތާއި ރައްކާތެރިކަން ކަށަވަރު ކުރުމަށްޓަކައި، މިފަދަ އެއްވުންތައް ބާއްވަމުންދަނީ ގާނޫނާ އެއްގޮތަށްތޯ އެ މުއައްސަސާއިން ކަށަވަރު ކުރާނެކަމަށް ދިވެހި ފުލުހުންގެ ޚިދުމަތުން ވަނީ ބުނެފައެވެ.
