ކައުންސިލްތައް އިންތިޚާބުވެ ފަހު އަހަރުގެ ތެރޭ ލާމަރުކަޒީ ގާނޫނު އިސްލާހުކުރުމުން ހައްގުތަކެއް ގެއްލި، ކައުންސިލްތަކަށް ގެއްލުންވާ ކަމަށް ކުޅުދުއްފުށި ސިޓީގެ މޭޔަރު މުޙައްމަދު ޢާޠިފް ވިދާޅުވެއްޖެއެވެ.
އޭނާ މިހެން ވިދާޅުވެފައިވަނީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހދ އަތޮޅަށް ކުރައްވާ ދަތުރުފުޅުގައި ކުޅުދުއްފުށީ ރައްޔިތުންނާ ބައްދަލުކުރެއްވުމަށް ރޭ ބޭއްވި ޖަލްސާގައެވެ.
މި ޖަލްސާގައި ވާހަކަފުޅުދައްކަވަމުން ޢާޠިފް ވިދާޅުވީ، ލާމަރުކަޒީ ނިޒާމަކީ ރާއްޖެ ހިނގަން އެންމެ ރަނގަޅު ނިޒާމު ކަމަށާއި، މާލޭގައި ހުންނަ ވުޒާރާއަކުން ރަށްރަށުގައި ޚިދުމަތްދިނުމަކީ ރައްޔިތުން ބޭނުންވާ ގޮތް ނޫންކަމަށެވެ.
ލާމަރުކަޒީ ނިޒާމަށް މި ގެނެވުނު އިސްލާހަކީ ކައުންސިލްތަކަށް ވަރަށް ބޮޑަށް ގެއްލުންވާ އިސްލާހެއް ކަމަށާއި، އޭގެ ސަބަބުން ރައްޔިތުންނަށް ދޭ ޚިދުމަތްތަކަށްވެސް ބުރޫއެރުން އެކަށީގެންވާ ގޮތަކަަށް އޮތް އިސްލާހުތަކެއްކަން އޭނާ ވަނީ ފާހަގަކުރައްވާފައެވެ.
ހަމަ އެއާއެކު، ގާނޫނަށް ގެނައި މި އިސްލާހުގެ ސަބަބުން ކައުންސިލްތަކުގެ ދައުރުގެ ފަހު އަހަރު ރަށުގައި އިގުތިސާދީ މަސައްކަތްތަކަށް ބިން ދޫކުރުމާއި، ކައުންސިލްތަކަށް ވަޒީފާއަށް މުވައްޒަފުން ނެގުމަށް ހުރަސްއެޅޭ ކަމަށާއި، އޭގެ ސަބަބުން ކައުންސިލްގެ މަސައްކަތަށް ބުރޫއަރާނެ ކަމަށް ޢާޠިފް ވިދާޅުވިއެެވެ.
ފަސް އަހަރުގެ ދައުރަކަށް ކައުންސިލް އިންތިޚާބުކޮށްފައި ވަނިކޮށް، ދައުރުގެ ފަހު އަހަރު މަސައްކަތްތަކެއް ނުކުރެވޭ ގޮތް ހެދުމުގެ ސަބަބުން ގިނަ ޕްލޭންތަކެއްގެ ބޭނުން ނުހިފި ދާނެކަންވެސް މޭޔަރު ވަނީ ފާހަގަކުރައްވާފައެވެ.
ގާނޫނަށް ގެނައި މި އިސްލާހާއެކު، އަސާސީ ޚިދުމަތް ދޭ ތަންތަނުން ކައުންސިލަށް ބިމު ކުލި ނުލިބޭގޮތަށް އޮތުމުން ހަތަރު މިލިއަން ރުފިޔާގެ ގެއްލުމެއް ވާނެކަމަށް ބެލެވޭކަމަށް އޭނާ ވިދާޅުވިއެވެ.
ކަން މިހެން އޮތުމާއެކު، މޭޔަރުގެ ހައިސިއްޔަތުން ޢާޠިފް އެދިވަޑައިގެންފައިވަނީ މި ގާނޫނާމެދު ރައީސުލްޖުމްހޫރިއްޔާ އިތުރަށް ވިސްނާވަޑައިގެން، ކައުންސިލްތަކަށް ފަސޭހަވާނެ ގޮތަކަށް މި ބަދަލުތައް އިންތިޒާމު ކޮށްދެއްވުމަށެވެ.
