މީޑިއާއާ ގުޅޭގޮތުން ރައްޔިތުންގެ މަޖިލީހުން ހުށަހަޅައިފައިވާ ބިލާ ދެކޮޅަށް މުޒާހަރާ ކުރަމުން ދިޔަ ނޫސްވެރިން ރައީސް އޮފީސްދޮށުގައި ތިއްބައި އިންޒާރު ދިންފަހުންވެސް އެ ސަރަހައްދުގައި މުޒާހަރާކުރުމަށްފަހު މުލީއާގޭދޮށަށް އެއްވެ އިހުތިޖާޖު ކުރަންފަށައިފިއެވެ.
މަޖިލީހުގެ މިއަދު ޖަލްސާގައި ވަނީ 49 މެންބަރުންގެ ތާއީދާއެކު މި ބިލު މަޖިލީހަށް ބަލައިގެންފައެވެ. މި ބިލާ ދެކޮޅަށް ވޯޓު ދެއްވީ 12 މެންބަރުންނެވެ.
މި ބިލާ ދެކޮޅު ހެދުމުގެ ގޮތުން ނޫސްވެރިން ފުރަތަމަ ދެއްވީ މަޖިލިސްކުރާގޭދޮށަށެވެ. އެއަށްފަހު ނޫސްވެރިން ދެން ދިޔައީ ރައީސް އޮފީސްދޮށަށެވެ.
ރައީސް އޮފީސް ދޮރުމަތީގައި ތިއްބައި ފުލުހުން ނޫސްވެރިންނަށް ހުރަސްއަޅައި ބައެއް ނޫސްވެރިން ހައްޔަރުކުރުމާއެކު ދެން ނޫސްވެރިން ގޮސްފައިވަނީ މުލީއާގެދޮށަށެވެ.
މި ވަގުތާ ހަމައަށް އެ ސަރަހައްދުގައި ނޫސްވެރިން ގޮވާލަމުން އަންނަނީ، ޑިމޮކްރަސީގެ ހަތަރުވަނަ ބާރު ކަމަށްވާ މީޑިއާ، ސީދާ ސަރުކާރުން ކޮންޓްރޯލްކުރެވޭ ގޮތަށް ގާނޫނު ނުހެދުމަށެވެ.
އަދި، އެއީ ގާނޫނުއަސާސީން ދީފައިވާ ޚިޔާލު ފާޅުކުރުމުގެ މިނިވަންކަމާއި ނޫސްވެރިކަމުގެ މިނިވަންކަމަށް ހުރަސްއެޅުން ކަމަށް ނޫސްވެރިން ދަނީ ގޮވާލަމުންނެވެ.