މާލޭ ސިޓީގެ މޭޔަރުކަމުގައި ހުންނެވި އިރު ކުރިމަތިލައްވަން ޖެހިވަޑައިގެންނެވި ފަދަ ހުރަސްތަކާއި އުނދަގޫތައް، މި ސަރުކާރުގައި ކައުންސިލްތަކަށް ކުރިމަތިވިޔަނުދެއްވާނެ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ، ހދ. އަތޮޅުގެ ރަށްތަށަށް މިހާރު ކުރައްވަމުން ގެންދަވާ ދަތުރުފުޅުގައި، ކުޅުދުއްފުށި ސިޓީގެ ރައްޔިތުންނާ ބައްދަލުކުރައްވައި ވާހަކަ ދައްކަވަމުންނެވެ.

ރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނަށް ގެނައި 16 ވަނަ އިޞްލާހާ ގުޅިގެން ބައެއް ފަރާތްތަކުން ސަރުކާރަށް އަމާޒުކުރާ ފާޑުކިޔުމަށް އިޝާރާތްކުރައްވަމުން ރައީސް ވަނީ، އެ މަނިކުފާނު އެދިވަޑައިގަންނަވަނީ ލާމަރުކަޒީ ނިޒާމު ޗެމްޕިއަން ކުރެއްވުމަށް ކަމަށް ތަކުރާރުކޮށް ވިދާޅުވެފައެވެ.

މޭޔަރު ކަމުގައި ހުންނެވި އިރު، އޭރުގެ ސަރުކާރުން ސިޓީ ކައުންސިލަށް ކުރިމަތިކުރެއްވި ފިއްތުންތަކަށް އިޝާރާތްކުރައްވާ ރައީސް ވިދާޅުވީ، މި ސަރުކާރުން ކައުންސިލްތަކަށް އެފަދަ ފިއްތުންތައް ކުރިމަތިވިޔަ ނުދެއްވާނޭ ކަމަށެވެ.

ކައުންސިލްތައް ބާރުވެރިކުރެއްވުމަށް ޤާނޫނީ ގޮތުންނާއި އެ ނޫން ގޮތްގޮތުންވެސް ފިޔަވަޅުތައް އަޅުއްވަމުން ގެންދަވަނީ އެ މަޤްޞަދުގައި ކަމަށް ރައީސް ވިދާޅުވިއެވެ.

އެގޮތުން އަންހެނުން ކުރިއަރުވާ ކޮމިޓީތަކުގެ އިނާޔަތަށް ގެންނެވި ބަދަލާއި ކައުންސިލްތަކުގެ އާ އިމާރާތްތަކުގެ މަޝްރޫޢުތަކުން ރައީސް މިސާލު ދެއްކެވިއެވެ.

ހަމައެހެންމެ ކައުންސިލްތަކުން މުސްތަޤިއްލުކަމާއެކު އިޤްތިޞާދީ މަންފާ ހޯދުމަށް މަގުފަހިކުރެއްވުމަށްޓަކައި، ރަށްރަށާއި ފަޅުތައް ރަށްރަށުގެ އިޙްތިޞާސްގައި ހިމެނުއްވުމާއި ރަށްރަށުގެ ބައިތަކުގެ ގޮތުގައި ހަމަޖެއްސެވުން ފަދަ ފިޔަވަޅުތަކުންވެސް އެމަނިކުފާނު މިސާލު ދެއްކެވިއެވެ.

މީގެ އިތުރުން، ރައްޔިތުންގެ ޚިޔާލާއެކު ހުށަހަޅާ ތަރައްޤީގެ ޕްލޭނާއި ފާސްކޮށްފައިވާ ލޭންޑް ޔޫސް ޕްލޭނާ އެއްގޮތަށް ހުށަހަޅާ ކަންކަމަށް ސަރުކާރުން މަގުފަހިކޮށްދެއްވާނޭކަންވެސް ރައީސް ފާހަގަކުރެއްވިއެވެ.